സൗദിയിൽ തലക്കടിയേറ്റ്​ മരിച്ച മലയാളിയുടെ കുടുംബത്തിന്​ 71 ലക്ഷം രൂപ നഷ്​ടപരിഹാരം ലഭിച്ചു

റിയാദ്​: നാലര വർഷം മുമ്പ്​ റിയാദിൽ തലക്കടിയേറ്റ്​ മരിച്ച മലയാളിയുടെ കുടുംബത്തിന്​ വൻ തുക നഷ്​ടപരിഹാരമായി ലഭിച്ചു. വാക്കുതർക്കത്തിനിടെ, സഹോദരങ്ങളായ രണ്ട്​ സൗദി യുവാക്കളുടെ അടിയേറ്റ്​ മരിച്ച പാലക്കാട് കൈപ്പുറം സ്വദേശി പനച്ചിക്കൽ ഹൗസിൽ മുഹമ്മദലി പൂഴിക്കുന്നത്തി​​​െൻറ കുടുംബത്തിനാണ്​ പ്രതികൾ മോചനദ്രവ്യമായി കോടതിൽ കെട്ടിവെച്ച നാലുലക്ഷം റിയാൽ (71 ലക്ഷത്തിലധികം രൂപ) ലഭിച്ചത്​. 

കുടുംബം മാപ്പ്​ നൽകിയതിനാൽ വധശിക്ഷ ലഭിക്കാവുന്ന കേസിൽ നിന്ന്​ പ്രതികളായ ഹസൻ അലി, യാസിർ അലി എന്നിവർ രക്ഷപ്പെട്ടിരുന്നു. റിയാദിലെ കോടതിയിൽ സമർപ്പിച്ച ചെക്ക്​ പണമായി അനന്തരാവകാശികളുടെ അക്കൗണ്ടിലെത്താൻ രണ്ടുവർഷത്തിലേറെ സമയമെടുത്തു. നിയമനടപടികളുടെ നിരവധി കടമ്പകൾ അനന്തരാവകാശികളുടെ മുന്നിലുണ്ടായിരുന്നു. എല്ലാ നടപടികളും പൂർത്തിയായി​ ഭാര്യയുടെയും മക്കളുടെയും ബാങ്ക്​ അക്കൗണ്ടുകളിൽ പണം ക്രെഡിറ്റ്​ ചെയ്​തതായ വിവരം റിയാദിലെ ഇന്ത്യൻ എംബസിക്കും വിഷയത്തിൽ ഇടപെട്ട സാമൂഹിക പ്രവർത്തകൻ ശിഹാബ്​ കൊട്ടുകാടിനും ലഭിച്ചു. 

2013 ആഗസ്​റ്റ് ആറിനാണ് മരണത്തിനിടയാക്കിയ സംഭവമുണ്ടായത്. റിയാദ് ദാഖൽ മഅദൂദിൽ ഹൗസ്​ ൈഡ്രവറായിരുന്ന മുഹമ്മദലിക്ക് ബദീഅയിലെ സൂഖ് ശഅബിയയുടെ മുമ്പിൽ വെച്ച്​ യുവാക്കളിൽ നിന്ന് അടിയേറ്റു. വാഹനത്തിന്​ സൈഡ്​ കൊടുക്കുന്നതുമായി ബന്ധപ്പെട്ടുണ്ടായ തർക്കമാണ്​ അടിയിൽ കലാശിച്ചത്​. പ്രകോപിതരായ പ്രതികൾ മുഹമ്മദലിയുടെ തലയിലും മുഖത്തും ഇടിക്കുകയായിരുന്നു. ദൃസാക്ഷിയായ സ്വദേശി പൗരൻ ഇടപെട്ട്​ ഇരുകൂട്ടരേയും പിന്തിരിപ്പിച്ചു. തിരികെ വീട്ടിലെത്തിയ മുഹമ്മദലി കുഴഞ്ഞുവീണു. കിങ് സൽമാൻ ആശുപത്രിയിൽ പ്രവേശിപ്പിച്ചെങ്കിലും ആറു ദിവസത്തിനുശേഷം മരിച്ചു. ബദീഅ പൊലീസ്​ നടത്തിയ അന്വേഷണത്തിൽ പ്രതികൾ പിടിയിലായി. കേസ്​ തുടരുന്നതിനിടെ ഇന്ത്യൻ എംബസിയുടെ ചെലവിൽ മൃതദേഹം നാട്ടിലയച്ചു. 

ബന്ധുക്കളും എംബസിയും കേസ്​ നടത്താൻ ശിഹാബ് കൊട്ടുകാടിനെ ചുമതലപ്പെടുത്തി. കേസിൽ പബ്ലിക്​ റൈറ്റ്​ പ്രകാരം കോടതി ഒന്നാം പ്രതി ഹസൻ അലിക്ക് അഞ്ചുവർഷത്തേയും രണ്ടാം പ്രതി യാസർ അലിക്ക് രണ്ടര വർഷത്തേയും തടവുശിക്ഷ വിധിച്ചു. പ്രൈവറ്റ്​ റൈറ്റ്​ പ്രകാരം കൊലപാതക കേസിൽ വിധിക്കുക വധശിക്ഷയാണ്​. എന്നാൽ ഇക്കാര്യത്തിൽ മരണപ്പെട്ടയാളുടെ അനന്തരാവകാശികളുടെ അഭിപ്രായം ആരാഞ്ഞശേഷമേ കോടതി വിധി തീർപ്പിലെത്താറുള്ളൂ. ഈ സാധ്യത മുന്നിൽ കണ്ട്​ കുടുംബത്തെ കൊണ്ട്​ മാപ്പ്​ നൽകാൻ പ്രേരിപ്പിക്കുന്നതിന്​ പ്രതികളുടെ പിതാവ്​ ശിഹാബിനെ സമീപിച്ച്​ ഒത്തുതീർപ്പിന്​ ശ്രമം നടത്തി. പകരം മോചനദ്രവ്യമായി കോടതി നിശ്ചയിക്കുന്ന തുക നൽകാമെന്നും വാഗ്​ദാനം ചെയ്​തു. ഷാഫി പറമ്പിൽ എം.എൽ.എ വഴി നടന്ന ശ്രമത്തിൽ കുടുംബം മാപ്പ് നൽകാൻ സമ്മതിച്ചു. ഇത്​ സംബന്ധിച്ച രേഖകൾ കോടതിയിൽ ഹാജരാക്കിയതോടെ 2015 ഒക്​ടോബർ 25ന്​ കോടതി ​പ്രതികൾക്ക്​ ഇളവ്​ നൽകി. ആദ്യം വിധിച്ച തടവുശിക്ഷ മാത്രം അനുഭവിച്ച ശേഷം ജയിൽ മോചിതരാവാൻ അനുവാദവും നൽകി. അന്ന്​ മോചനദ്രവ്യമായി കോടതിയിൽ നൽകിയ നാലു ലക്ഷം റിയാലി​​​െൻറ ചെക്ക്​ 2017 ജനുവരിയിലാണ്​ ഇന്ത്യൻ എംബസിയിലെത്തിയത്​. അവിടെ നിന്ന്​ ഒമ്പത്​ മാസം മുമ്പ്​ പാലക്കാട്​ കലക്​ട്രേറ്റിലെത്തി. മരിച്ച മുഹമ്മദലിയുടെ ഉമ്മ നഫീസ, ഭാര്യ മൈമൂന, മക്കളായ മുഹ്​നിസ്​, മിസ്​ഹബ്, മുഹ്​മിന, ഹന്നത്ത് എന്നിവരാണ്​ അന്തരാവകാശികൾ. ഇതിൽ മിസ്​ഹബും ഹന്നത്തും പ്രായപൂർത്തിയാവത്തരായതിനാൽ മൈനറായി കണക്കാക്കി അവരുടെ പേരിൽ പ്രത്യേക അക്കൗണ്ട്​ തുടങ്ങി അതിലും ബാക്കി തുക ഭാര്യ മൈമൂനയുടെ അക്കൗണ്ടിലുമാണ്​ നിക്ഷേപിച്ചത്​. ഉമ്മ നഫീസയും മറ്റു മക്കളും മൈമൂനയുടെ പേരിൽ നിക്ഷേപിക്കാൻ സമ്മത പത്രം നൽകുകയായിരുന്നു