യാമ്പുവിൽ റെയ്​ഡ്​; അനധികൃത  തെരുവ് കച്ചവടക്കാർ പിടിയിൽ

യാമ്പു: അനധികൃത തെരുവ് കച്ചവടക്കാരെ കണ്ടു പിടിക്കാൻ യാമ്പു ബലദിയ സംഘം നടത്തിയ പരിശോധനയിൽ പത്തുപേർ പിടിയിലായി. 
യാമ്പു ടൗണിലെ അബൂബക്കർ സിദ്ദീഖ് മസ്ജിദ്​ പരിസരത്തും ബംഗ്ല​ാേദശ്​ സ്വദേശികൾ കൂടുതലായി തിങ്ങിക്കൂടുന്ന തെരുവുകളിലുമാണ് കഴിഞ്ഞ ദിവസം രാത്രി മിന്നൽ പരിശോധന നടന്നത്. 
വാരാന്ത്യമായതിനാൽ ധാരാളം തെരുവുകച്ചവടക്കാരും  ബംഗാളി തൊഴിലാളികളും ഇവിടെ ഉണ്ടായിരുന്നു. ഒരു ടൺ പച്ചക്കറി, മുന്നൂറോളം വളർത്തു കോഴികൾ, വൻതോതിൽ തുണിത്തരങ്ങൾ എന്നിവ റെയ്​ഡിൽ പിടികൂടി. പുകയില ഉൽപന്നങ്ങൾ വിൽക്കുന്ന ബംഗാളി കച്ചവടക്കാരുടെ മൂന്നുകടകളിലും പരിശോധന നടത്തി. നിരോധിത പുകയില, പാൻ ഉൽപന്നങ്ങളും കണ്ടുകെട്ടി കേസ് ചാർജ് ചെയ്തിട്ടുണ്ട്​. 
പുകയില ഉൽപന്നങ്ങൾ വിൽക്കാൻ അനുമതിയുള്ള കച്ചവട സ്ഥാപനങ്ങളിൽ നിരോധിത വസ്​തുക്കൾ വ്യാപകമായി വിൽക്കുന്നത് ബലദിയ ഉദ്യോഗസ്ഥർ  ഗൗരവപൂർവം നിരീക്ഷിക്കുന്നുണ്ട്. 
അബൂബക്കർ മസ്ജിദിന്​ ഇരുവശവും അനധികൃത തെരുവ് കച്ചവടക്കാരുടെ വർധിച്ച സാന്നിധ്യം പരിസരത്തെ പല കടകളേയും സാരമായി ബാധിച്ചിരുന്നു.