ബി.ജെ.പിയുടെ പ്രവാസി ഘടകം രണ്ടായി

റിയാദ്​: ബി.ജെ.പിയുടെ പ്രവാസി ഘടകത്തിൽ ചേരിതിരിവ്​. റിയാദിലെത്തിയ കേന്ദ്ര മന്ത്രി വി.കെ സിങ്ങിനെ സന്ദർശിച്ചത്​ വെവ്വേറെ​ സംഘങ്ങളായി. രണ്ട്​ വർഷത്തിലേറെയായി സൗദിയിൽ പ്രവർത്തിക്കുന്ന ‘സമന്വയ’ എന്ന സംഘടനയുടെ ഭാരവാഹികൾ മന്ത്രിയെ കാണുകയും പ്രവാസി വിഷയങ്ങൾ ഉന്നയിച്ച നിവേദനം സമർപ്പിക്കുകയും ചെയ്​തപ്പോൾ കേരള ബി.ജെ.പി എൻ.ആർ.​െഎ സെൽ എന്ന പേരിലാണ്​ മറ്റൊരു സംഘം മന്ത്രിയുമായി കൂടിക്കാഴ്​ച നടത്തിയത്​. എന്നാൽ ഇത്​ ചേരിതിരിവല്ലെന്നും സമന്വയ ഇന്ത്യൻ പ്രവാസികളുടെ പൊതുസംഘടനയാണെന്നും സംസ്​ഥാനടിസ്ഥാനത്തിൽ അടുത്തിടെ രൂപവത്​കരിച്ച ഘടകമാണ്​ എൻ.ആർ.​െഎ സെല്ലെന്നും ബി.ജെ.പി വിശ്വവിഭാഗ്​ സൗദി മുൻ സംയോജകും സമന്വയ നാഷനൽ കോഒാഡിനേറ്ററുമായ സതീഷ്​ കുമാർ ദീപക്​ ‘ഗൾഫ്​ മാധ്യമ’ത്തോട്​ പറഞ്ഞു. സമന്വയ റിയാദ്​ ഘടകം പ്രസിഡൻറ്​ ശ്രീജേഷ്​, വൈസ്​ പ്രസിഡൻറ്​ മഗേഷ്​ പ്രഭാകർ, യോഗാചാര്യ സൗമ്യ, ജനറൽ സെക്രട്ടറി മധു എടച്ചേരി, സെക്രട്ടറിമാരായ വിനോദ്​, സ്വപ്​ന, ട്രഷറർ രവികുമാർ, ഉപദേശക സമിതിയംഗങ്ങളായ ബാബു, അജേഷ്​, കുഞ്ഞു, ദീപക്​ എന്നിവരാണ്​ മന്ത്രിയെ കാണുകയും വിവിധ ആവശ്യങ്ങളടങ്ങിയ നിവേദനം നൽകുകയും ചെയ്​തത്​. ജനാദിരിയ ഉത്സവത്തിൽ അതിഥി രാജ്യമായി തെരഞ്ഞെടുക്കപ്പെട്ടതിൽ ഭാരത സർക്കാറി​​െൻറ സന്തോഷം മന്ത്രി പങ്കുവെച്ചതായും പരസ്പര സഹകരണത്തിലും ബഹുമാനത്തിലും ഊന്നി നിന്നുകൊണ്ട് മാതൃരാജ്യത്തി​​െൻറയും കർമ രാജ്യത്തി​​െൻറയും അന്തസ്​ ഉയർത്തിപ്പിടിക്കുന്ന തരത്തിൽ പ്രവർത്തിക്കുകയും ഓരോ പ്രവാസിയും ഭാരതത്തി​​െൻറ സാംസ്കാരിക അംബാസഡർ എന്ന നിലയിൽ പ്രവർത്തിക്കണമെന്നും അഭിപ്രായപ്പെട്ടതായും സമന്വയ ഭാരവാഹികൾ വാർത്താക്കുറിപ്പിൽ പറഞ്ഞു. മന്ത്രി റിയാദിലെത്തിയ ശനിയാഴ്​ചയാണ്​ ഇൻറർകോണ്ടിന​െൻറൽ ഹോട്ടലിലെത്തി സമന്വയ റിയാദ്​ ഘടകത്തി​​െൻറ മുൻ ഭാരവാഹിയും കേരള ബി.ജെ.പി എൻ.ആർ.​െഎ സെൽ സ്​റ്റേറ്റ്​ കമ്മിറ്റി മെമ്പറുമായ ജി. ഗോപകുമാർ എന്ന ബാബു കല്ലുമലയുടെ നേതൃത്വത്തിൽ​ മറ്റൊരു സംഘം കൂടിക്കാഴ്​ച നടത്തിയത്​. സംഘത്തിലുൾപ്പെട്ടവരെല്ലാം നേരത്തെ സമന്വയയിലുണ്ടായിരുന്നവരാണ്​. എൻ.ആർ.​െഎ സെൽ സൗദി ഘടകത്തി​​െൻറ ഭാരവാഹി പട്ടിക ഒരാഴ്​ചക്ക്​ ശേഷം പുറത്തുവിടുമെന്ന്​ ബാബു കല്ലുമല ‘ഗൾഫ്​ മാധ്യമ’ത്തോട്​ പറഞ്ഞു. ബി.ജെ.പി സംസ്​ഥാന നേതാവ്​ കെ. സുരേന്ദ്ര​ൻ മേൽനോട്ടം നൽകി ഗൾഫിൽ രൂപവത്​കരിച്ച ഒാവർസീസ്​ ഫ്രണ്ട്​സ്​ ഒാഫ്​ ബി.ജെ.പി എന്ന സംഘടനയുടെ സൗദി രൂപമാണ്​ സമന്വയ.