ചെമ്മീന്‍ ചാകര; കിഴക്കൻ പ്രവിശ്യയിലെ മത്സ്യ വിപണിയിൽ പുത്തനുണർവ്​

ദമ്മാം: മാസങ്ങൾ നീണ്ട ട്രോളിംഗ് നിരോധത്തിന്​ ശേഷം ചെമ്മീൻ സീസൺ സമാഗതമായതോടെ കിഴക്കൻ പ്രവിശ്യയിലെ മത്സ്യ വിപണി വീണ്ടുമുണർന്നു. അതേ സമയം, ചെമ്മീൻ ഒഴികെ മറ്റു മത്സ്യങ്ങളുടെ പൊള്ളുന്ന വില  തുടരുകയാണ്​. ആഗസ്​റ്റ്​ ഒന്നു മുതല്‍ ട്രോളിംഗ് നിരോധം നീങ്ങിയതോടെ 800 ഓളം യന്ത്ര ബോട്ടുകളാണ് സൗദിയുടെ കിഴക്കന്‍ പ്രവിശ്യയില്‍ നിന്ന്​ മത്സ്യ ബന്ധനത്തിന് പോയത്​. അഞ്ച് ദിവസത്തോളമുള്ള കടല്‍ വാസത്തിന് ശേഷം ഇവര്‍ തിരിച്ചെത്തിത്തുടങ്ങിയതോടെയാണ് മത്സ്യ വിപണി  സജീവമായത്. കടുത്ത ചൂടും ഈര്‍പ്പം നിറഞ്ഞതുമായ കാലാവസ്ഥയായതിനാല്‍ ചെമ്മീന്‍ ചാകരയാണ് സാധാരണയായി ലഭിക്കാറുള്ളത് എന്ന്​ തൊഴിലാളികൾ പറഞ്ഞു. 
ഗൾഫ് മേഖലയിൽ കടലിലെ ചൂട് അസാധാരണമാം വിധം വർധിച്ചതിനാൽ മത്സ്യ സമ്പത്ത് കുറഞ്ഞതും മത്സ്യ ബന്ധനം മുമ്പത്തേതു പോലെ ഫലപ്രദമല്ലാതായതും കാരണം വിപണിയിൽ കടുത്ത മാന്ദ്യമാണ്​ മാസങ്ങളായി നിലനിൽക്കുന്നത്​.  ചെമ്മീനി​​െൻറ ലഭ്യത കൂടിയതോടെ ഇതി​​െൻറ വിലയിലും കുറവ് വന്നിട്ടുണ്ട്. കിലോക്ക്​ 40 റിയാലുണ്ടായിരുന്നതിപ്പോൾ 15^20 ആയി കുറഞ്ഞിട്ടുണ്ട്​. എന്നാല്‍ മറ്റു മത്സ്യങ്ങളുടെ വിലയും ക്ഷാമവും അതേ പടി തുടരുകയാണ്. മലയാളിയുടെ ഇഷ്​ട മത്സ്യയിനങ്ങളായ മത്തി, അയില എന്നിവയുടെ ലഭ്യതയിലും കാര്യമായ കുറവുണ്ട്. മത്സ്യ ലഭ്യത കുറഞ്ഞതിനാൽ വിപണിയിലുള്ളവക്ക്​ നല്ല വിലയാണ് ഈടാക്കുന്നത്. മത്തിയുടെ വില നാലിൽ നിന്ന്  എട്ടിലേക്കും അയിലയുടേത് 15^ൽ നിന്ന്  25 റിയാലുമായാണ് വർധിച്ചിരിക്കുന്നത്. സ്വദേശികൾ ധാരാളമായി ഉപയോഗിക്കുന്ന ശേരി, ഹമൂർ എന്നിവക്കും​ പതിൻമടങ്ങായാണ്​ വില കൂടിയത്​.  സുലഭമായി ലഭിച്ചിരുന്ന ഇത്തരം മത്സ്യങ്ങളുടെ വരവ് കുറഞ്ഞതിനാൽ  ഉപഭോക്താക്കൾ വിപണിയിൽ നിന്ന്​ മടങ്ങുന്നതായും വ്യാപാരികൾ പറയുന്നു. ഏതാനും ആഴ്​ചകൾക്കകം ചെറു മത്സ്യങ്ങളടക്കമുള്ളവയുടെ ലഭ്യത കൂടുമെന്നും വിലക്കുറവുണ്ടാവുമെന്നുമാണ്​ ഇൗ മേഖലയിലുള്ളവരുടെ  അഭിപ്രായം.