തബൂക്കില്‍ വന്‍ മയക്ക്മരുന്ന് വേട്ട

തബൂക്ക്: അതിര്‍ത്തി സുരക്ഷ സേനയുടെ കണ്ണുവെട്ടിച്ച് കടല്‍ മാര്‍ഗം കടത്താന്‍ ശ്രമിച്ച രണ്ട് ദശലക്ഷം വരുന്ന നിരോധിത മരുന്നായ ‘ഇംഫെറ്റാമിന്‍’ഗുളിക പിടികൂടി. 
ദുബ കടല്‍തീരം വഴിയാണ് മയക്കുമരുന്ന് ഗുളിക കടത്താന്‍ ശ്രമിച്ചത്. ബോട്ട് മാര്‍ഗം അതിര്‍ത്തിയില്‍ പ്രവേശിച്ച യാത്രക്കാര്‍ കരയോടടുത്ത ഭാഗങ്ങളില്‍ ബോട്ടില്‍ നിന്ന് പാക്കറ്റുകള്‍ വെള്ളത്തിലേക്ക് വലിച്ചെറിയുന്നത് ശ്രദ്ധയില്‍പ്പെട്ട സുരക്ഷ സേന പ്രദേശം വളയുകയായിരുന്നു. 
തുടര്‍ന്ന് നടന്ന പരിശോധനയിലാണ് രണ്ട് ദശ ലക്ഷത്തിലധികം നിരോധിക ഗുളികയും ഒമ്പത് കിലോ ഹഷീഷും പിടികൂടിയത്. സംഭവുമായി ബന്ധപ്പെട്ട് ബോട്ടിലുണ്ടായിരുന്ന മൂന്ന് ഈജിപ്ഷ്യന്‍ വംശജരെയും അവരെ കരയില്‍ കാത്തുനില്‍ക്കുകയായിരുന്ന ഒരു സ്വദേശി പൗരനേയും സുരക്ഷ സേന പിടികൂടി തുടര്‍ നടപടികള്‍ക്കായി ബന്ധപ്പെട്ട വിഭാഗത്തിന് കൈമാറി.