പാസ്പോര്‍ട്ട് സമ്മതം കൂടാതെ തൊഴിലുടമ സൂക്ഷിക്കുന്നത് നിയമ വിരുദ്ധം

ജിദ്ദ: തൊഴിലാളിയുടെ പാസ്പോര്‍ട്ട് സമ്മതം കൂടാതെ തൊഴിലുടമ സൂക്ഷിക്കുന്നത് നിയമ വിരുദ്ധമാണെന്ന് തൊഴില്‍ സാമൂഹിക വികസന മന്ത്രാലയം ഒൗദ്യോഗിക വക്താവ് ഖാലിദ് അബ ഖൈല്‍ പറഞ്ഞു. തൊഴിലാളിയുടെ പാസ്പോര്‍ട്ട് തൊഴിലുടമ സൂക്ഷിക്കുന്നത് വിലക്കിയിട്ടുണ്ട്. തൊഴിലാളി പാസ്പോര്‍ട്ട് സൂക്ഷിക്കാന്‍ തൊഴിലുടമയോട് ആവശ്യപ്പെടുകയാണെങ്കില്‍ അറബിയിലും തൊഴിലാളിയുടെ ഭാഷയിലും കരാര്‍ എഴുതി ഒപ്പിടണമെന്നാണ് വ്യവസ്ഥ. തൊഴിലാളികളുടെ പാസ്പോര്‍ട്ട് നിയമാനുസൃതമായി സൂക്ഷിക്കുന്നതിന് തൊഴിലാളികളും തൊഴിലുടമക്കുമിടയില്‍ തൊഴിലുടമ നിര്‍ബന്ധമായും കരാറുണ്ടാക്കണം. അല്ലാത്ത രീതിയില്‍ പാസ്പോര്‍ട്ട് സൂക്ഷിക്കല്‍ നിയമവിരുദ്ധമാണ്. 2000 റിയാല്‍ വരെ ഇതിനു തൊഴില്‍ വ്യവസ്ഥ ശിക്ഷ കണക്കാക്കിയിട്ടുണ്ടെന്നും തൊഴില്‍ മന്ത്രാലയ വക്താവ് പറഞ്ഞു. തൊഴില്‍ മേഖലയെ വ്യവസ്ഥാപിതമാക്കാനാണ് ഉദ്ദേശിക്കുന്നത്. നിയമം ലംഘിക്കുന്നവര്‍ക്കെതിരെ നടപടി സ്വീകരിക്കുന്നതില്‍ ഒരു അലംഭാവവുമുണ്ടാകില്ല. നിയമ ലംഘനങ്ങള്‍ കണ്ടാല്‍ 19911കസ്റ്റമര്‍ സര്‍വീസ് നമ്പറില്‍ അറിയിച്ചാല്‍ ഉടനെ നടപടിയുണ്ടാകും. തൊഴില്‍ സംബന്ധമായ വ്യവസ്ഥകള്‍ അറിയാന്‍ മന്ത്രാലയത്തിന്‍െറ വെബ്സൈറ്റ് www.mosa.gov.sa സന്ദര്‍ശിക്കാം.