അങ്കാറയിലും മസ്കത്തിലും സൗദി പൗരന്‍മാര്‍ സുരക്ഷിതര്‍

ജിദ്ദ: അങ്കാറയിലെയും മസ്കത്തിലെയും സൗദി പൗരന്‍മാര്‍ സുരക്ഷിതരെന്ന് രണ്ടിടത്തെയും എംബസികള്‍ വ്യക്തമാക്കി. ബുധനാഴ്ച തുര്‍ക്കി തലസ്ഥാനമായ അങ്കാറയിലുണ്ടായ ബോംബ് സ്ഫോടനത്തില്‍ 28 പേര്‍ മരിച്ചിരുന്നു. 60 പേര്‍ക്ക് പരിക്കേല്‍ക്കുകയും ചെയ്തു. സിറിയന്‍ കുര്‍ദ് വിഭാഗമായ വൈ.പി.ജി ആണ് സ്ഫോടനത്തിന് പിന്നിലെന്നാണ് തുര്‍ക്കി ആരോപിക്കുന്നത്. മരിച്ചവരിലോ പരിക്കേറ്റവരിലോ സൗദി പൗരന്‍മാരില്ളെന്ന് അങ്കാറയിലെ എംബസി ഇന്നലെ പത്രക്കുറിപ്പിറക്കി. ഒമാന്‍ തലസ്ഥാനമായ മസ്കത്തിലെ സുല്‍ത്താന്‍ ഖാബൂസ് സര്‍വകലാശാലയില്‍ ബുധനാഴ്ച രാത്രി വന്‍ അഗ്നിബാധയുണ്ടായിരുന്നു. സൗദിയില്‍ നിന്നുള്ള വിദ്യാര്‍ഥിനികളുടെ വാസസ്ഥലത്താണ് തീപടര്‍ന്നത്. സിവില്‍ ഡിഫന്‍സ് വിഭാഗം സമയോചിതമായി ഇടപെട്ട് അഗ്നിബാധ നിയന്ത്രണ വിധേയമാക്കി. ഇവിടെയും ആര്‍ക്കും അപായമൊന്നുമുണ്ടായിട്ടില്ല.