കണ്ണൂര്‍ കെ.എം.സി.സി ‘മരുപ്പച്ച’ പ്രവര്‍ത്തക ക്യാമ്പ്

റിയാദ്: കെ.എം.സി.സി കണ്ണൂര്‍ ജില്ലാ കമ്മിറ്റി ‘മരുപ്പച്ച 2017’ എന്ന പേരില്‍ പ്രവര്‍ത്തക ക്യാമ്പ് സംഘടിപ്പിച്ചു. രാവിലെ 8.30 മുതല്‍ വൈകീട്ട് 6.30 വരെ നീണ്ട ക്യാമ്പില്‍ നാല് സെഷനുകളിലായി പഠന ക്ളാസുകള്‍ നടന്നു. സെന്‍ട്രല്‍ കമ്മിറ്റി വൈസ് പ്രസിഡന്‍റ് സി.പി മുസ്തഫ ഉദ്ഘാടനം ചെയ്തു. ജില്ലയിലെ മുഴുവന്‍ മണ്ഡലങ്ങളില്‍ നിന്നുമായി തെരഞ്ഞെടുക്കപ്പെട്ട 170ഓളം പ്രതിനിധികള്‍ പങ്കെടുത്തു. മുതിര്‍ന്ന അംഗം അബ്ദുസ്സലാം തോട്ടിക്കല്‍ പതാക ഉയര്‍ത്തി. ന്യൂസനഇയ്യ ഇസ്ലാമിക് സെന്‍റര്‍ പ്രബോധകന്‍ അശ്റഫ് മരുത, യൂത്ത് ലീഗ് സംസ്ഥാന കമ്മിറ്റി അംഗം അഷ്ക്കര്‍ ഫറോക്ക്, ഹമീദ് വാണിമേല്‍,  റിയാദ് വില്ലാസ് ജനറല്‍ മാനേജര്‍ പി. സൂരജ് എന്നിവര്‍ വിവിധ വിഷയങ്ങള്‍ അവതരിപ്പിച്ചു. വി.കെ മുഹമ്മദ്, ഹാഷിം നീര്‍വേലി, റസാഖ് വളക്കൈ, അബ്ദുല്‍ മജീദ് പയ്യന്നൂര്‍, മുഹമ്മദ് മണ്ണേരി, യാക്കൂബ് ഹാജി, കെ.ടി മുഹമ്മദ്, ഹുസൈന്‍ കുപ്പം, ശൗക്കത്ത്, മഹബൂബ്, അബ്ദുറഹ്മാന്‍, അന്‍വര്‍ എന്നിവര്‍ വിവിധ സെഷനുകള്‍ നിയന്ത്രിച്ചു. ക്യാമ്പ് ഡയറക്ടര്‍ യു.പി മുസ്തഫ ക്യാമ്പ് സംഗ്രഹം നടത്തി. കോഓര്‍ഡിനേറ്റര്‍ ശഫീക്ക് കൂടാളി സ്വാഗതവും മുഖ്താര്‍ നന്ദിയും പറഞ്ഞു.