ഗര്‍ഭിണിയുടെ വയറ്റില്‍ നിന്ന് മൂന്ന് കിലോ ഭാരമുള്ള മുഴ നീക്കി

റിയാദ്: ഗര്‍ഭിണിയുടെ വയറ്റില്‍ നിന്ന് മൂന്ന് കിലോ ഭാരമുള്ള മുഴ നീക്കം ചെയ്തു. ജീസാനിലെ കുട്ടികളുടെ ആശുപത്രിയിലാണ് വിജയകരമായ ശസ്ത്രക്രിയ നടന്നതെന്ന് ആരോഗ്യ വകുപ്പ് അറിയിച്ചു. അഞ്ചു മാസം ഗര്‍ഭിണിയായിരുന്ന 35 കാരിയുടെ വയറ്റില്‍ നിന്നാണ് മുഴ നീക്കം ചെയ്തത്. കഠിനമായ വയറുവേദനയെ തുടര്‍ന്നാണ് ഇവരെ ആശുപത്രിയില്‍ പ്രവേശിപ്പിച്ചത്. വിദഗ്ധ പരിശോധനയിലാണ് വയറ്റിനുള്ളില്‍ മുഴ കണ്ടത്തെിയത്.
തുടര്‍ന്നാണ് അടിയന്തര ശസ്ത്രക്രിയക്ക് വിധേയമാക്കിയത്. ഗൈനക്കോളജി വിഭാഗം മേധാവി ഡോ. നാസര്‍ അദാവിയുടെ നേതൃത്വത്തിലാണ് ശസ്ത്രക്രിയ നടന്നത്. ഗര്‍ഭസ്ഥ ശിശുവിന് അപകടമൊന്നും സംഭവിക്കാതെയാണ് മുഴ നീക്കം ചെയ്തത്. യുവതി സുഖമായിരിക്കുന്നുവെന്നും ആരോഗ്യ മന്ത്രാലയം അറിയിച്ചു.
കഴിഞ്ഞ രണ്ടു മാസത്തിനിടെ ഇതേ ആശുപത്രിയില്‍ നടക്കുന്ന നാലാമത്തെ ശസ്ത്രക്രിയയാണിതെന്നും അധികൃതര്‍ വ്യക്തമാക്കി.