ജിദ്ദ തീരത്ത് വന്‍ മയക്കു മരുന്നു വേട്ട; 274 കിലോ ഹഷീഷ് പിടികൂടി

ജിദ്ദ: കടല്‍ വഴി കടത്താന്‍ ശ്രമിച്ച വന്‍ ഹഷീഷ് ശേഖരം തീര സേന പിടികൂടി. ജിദ്ദ തീരത്ത് പട്രോളിങ്ങിനിടെ സംശയകരമായ സാഹചര്യത്തില്‍ കണ്ടത്തെിയ ബോട്ട് വളഞ്ഞ് പരിശോധിച്ചപ്പോഴാണ് 274 കി. ഗ്രാം വരുന്ന മയക്കു മരുന്ന് കണ്ടത്തെിയത്. സംഭവവുമായി ബന്ധപ്പെട്ട് അഞ്ചു യമന്‍ പൗരന്മാര്‍ പിടിയിലായി. പട്രോളിങ് ബോട്ട് വരുന്നത് കണ്ട് ഹഷീഷ് പാക്കറ്റുകള്‍ കടലിലെറിഞ്ഞ് രക്ഷപ്പെടാന്‍ ബോട്ടിലുണ്ടായിരുന്നവര്‍ ശ്രമിച്ചെങ്കിലും വിജയിച്ചില്ല. കടലിലെറിഞ്ഞ പാക്കറ്റുകളും തീര സേന കണ്ടെടുത്തു. നാലു പേരാണ് ബോട്ടിലുണ്ടായിരുന്നത്. ബോട്ട് വരുന്നതും കാത്ത് തീരത്ത് നിന്നിരുന്ന അഞ്ചാമനും തീര സേനയുടെ വലയിലാവുകയായിരുന്നു. പിടികൂടിയവരെയും മയക്കു മരുന്നു ശേഖരവും ബന്ധപ്പെട്ടവര്‍ക്ക് കൈമാറിയതായി സൗദി വാര്‍ത്ത ഏജന്‍സി റിപ്പോര്‍ട്ട് ചെയ്തു.