സൗദിയിൽ തിരിച്ചെത്തുന്ന തൊഴിലാളികൾ​ 14 ദിവസം താമസസ്ഥ​ലത്ത്​ കഴിയണം

ജിദ്ദ: സൗദി അറേബ്യയിൽ തിരിച്ചെത്തുന്ന മുഴുവൻ രാജ്യങ്ങളിൽ നിന്നുമുള്ള തൊഴിലാളികൾ 14 ദിവസത്തെ മെഡിക്കൽ ലീവിൽ സ ്വന്തം വീടുകളിൽ തന്നെ കഴിയണമെന്ന് സൗദി ആരോഗ്യ മന്ത്രാലയം. കോവിഡ് 19 വൈറസ് വ്യാപനം തടയാനാണിത്.

വെള്ളിയാഴ്​ ച മുതൽ സൗദിയിലേക്ക് പ്രവേശിച്ച എല്ലാ രാജ്യക്കാരും തീരുമാനം നിർബന്ധമായും പാലിച്ചിരിക്കണമെന്നും മന്ത്രാലയം ട്വീറ്റിൽ ആവശ്യപ്പെട്ടു. രാജ്യത്തേക്ക് പ്രവേശിച്ച ഒരോരുത്തർക്കും 14 ദിവസത്തെ മെഡിക്കൽ ലീവ് അനുവദിക്കും.

വിദേശത്തുനിന്ന് തിരിച്ചെത്തുന്ന തങ്ങളുടെ തൊഴിലാളികൾക്ക് അതത് കമ്പനികളും തൊഴിലുടമകളും നിയമാനുസൃത ലീവ് അനുവദിക്കണം. രാജ്യത്ത് എത്തിയാൽ രണ്ട് ദിവസത്തിനുള്ളിൽ ‘സിഹ്വത്തി’ എന്ന പോർട്ടലിൽ രജിസ്​റ്റർ ചെയ്​ത്​ മെഡിക്കൽ ലീവ് ഉറപ്പാക്കണം.

കഴിഞ്ഞ ദിവസം ചില രാജ്യങ്ങളിൽ നിന്നെത്തുന്നവർക്ക് മാത്രമായിരുന്നു ഇൗ ആനുകൂല്യം അനുവദിച്ചിരുന്നത്. പ്രവേശന തീയതി മുതൽ രണ്ടാഴ്​ച വീടിനുള്ളിൽ കഴിയണമെന്നും അവരോട് ആവശ്യപ്പെട്ടിരുന്നു. ശനിയാഴ്​ച അത് എല്ലാ രാജ്യക്കാർക്കും ബാധകമാക്കുകയായിരുന്നു.