സൗദിയിൽ ഇന്ന് 138 പുതിയ കോവിഡ് രോഗികൾ മാത്രം; ചികിത്സയിലുള്ളവർ 2,708 ആയി കുറഞ്ഞു

ജിദ്ദ: സൗദിയിൽ ഇന്ന് റിപ്പോർട്ട് ചെയ്തത് 138 പുതിയ കോവിഡ്​ കേസുകൾ മാത്രം. 211 പേർ രോഗമുക്തിനേടി. ഇതോടെ രാജ്യത്തെ ആകെ കോവിഡ് ബാധിച്ചവരുടെ എണ്ണം 5,45,123 ഉം രോഗമുക്തി നേടിയവരുടെ എണ്ണം 5,33,843 ഉം ആയി. ഏഴ് പേർ ഇന്ന് മരിച്ചു. ഇതോടെ രാജ്യത്തെ ആകെ മരണം 8,572 ആയി.

നിലവിൽ ചികിത്സയിലുള്ളവരുടെ എണ്ണം 2,708 ആയി കുറഞ്ഞു. ഇവരിൽ 750 പേർ ഗുരുതരാവസ്ഥയിലാണ്. ഇതുവരെ രാജ്യത്തെ രോഗ മുക്തിനിരക്ക് 97.93 ശതമാനവും മരണനിരക്ക് 1.56 ശതമാനവുമാണ്.

വിവിധ പ്രവിശ്യകളിൽ പുതുതായി റിപ്പോർട്ട് ചെയ്ത രോഗികളുടെ എണ്ണം: റിയാദ് 43, മക്ക 25, കിഴക്കൻ പ്രവിശ്യ 14, മദീന 10, ജീസാൻ 10, അസീർ 9, അൽ ഖസീം 7, നജ്റാൻ 5, തബൂക്ക് 4, ഹായിൽ 4, വടക്കൻ അതിർത്തി മേഖല 3, അൽ ജൗഫ് 2, അൽബാഹ 2. ഇതുവരെ രാജ്യത്ത് 3,77,40,661 ഡോസ് കോവിഡ് വാക്സിൻ വിതരണം നടത്തിയതായി സൗദി ആരോഗ്യ മന്ത്രാലയം അറിയിച്ചു.