മകനെക്കുറിച്ചുള്ള ഒാർമകൾ ജീവിതസമ്പാദ്യമാക്കി അവർ മടങ്ങുന്നു

റിയാദ്: മൂന്നര പതിറ്റാണ്ട്​ മൂപ്പെത്തിയ പ്രവാസം അവസാനിപ്പിക്കു​േമ്പാൾ ആ അച്ഛനും അമ്മക്കും ബാക്കി തങ്ങളുടെ ഏക മകനെക്കുറിച്ചുള്ള ഒാർമകൾ മാത്രം. ​പഠിക്കാനയച്ച കോളജിലെ നീന്തൽക്കുളത്തിൽ അസ്​തമിച്ച ജസ്​റ്റി​ൻ എന്ന മകൻ. നീന്തൽ താരമായ അവൻ നീന്തൽക്കുളത്തിൽ മുങ്ങിമരിച്ച ദുരൂഹതയുടെ ചുരുളഴിക്കാൻ ഇന്ത്യൻ നീതിന്യായ വഴികളിൽ ഒരു വ്യാഴവട്ടക്കാലമായി നിയമപോരാട്ടം നടത്തുന്ന ആലുവ സൗത്ത് വാഴക്കുളം സ്വദേശി ജോൺ സേവ്യറും ഭാര്യ അന്ന ജോണും റിയാദിൽനിന്ന്​ പ്രവാസം അവസാനിപ്പിച്ച്​ മടങ്ങുന്നത്​ നിയമപോരാട്ടം തുടരാൻ തന്നെയാണ്​. പക്ഷേ, നീതികിട്ടുമെന്ന പ്രതീക്ഷ തരിമ്പുമില്ല. എങ്കിലും, അവസാനനിമിഷം വരെയും പോരാടും. അത്​ മക​ൻെറ ആത്മാവിനോട്​​ ചെയ്​ത പ്രതിജ്ഞയാണെന്ന്​ ജോൺ പറയുന്നു.

പ്രായമേറിയെന്ന്​ വാർധക്യം തൊട്ടുണർത്തിയിട്ടും സൗദി അറേബ്യ വിടാൻ ഇപ്പോഴും പ്രയാസമാണ്​. ആറ്റുനോറ്റുണ്ടായ പൊന്നോമന മക​നെക്കുറിച്ചുള്ള നല്ല ഒാർമകളെല്ലാം ഇവിടെയാണ്​. അവൻ പിറന്നുവീണത്​, പിച്ചവെച്ചത്​, പ്ലേസ്​കൂളിൽ പോയത്, എട്ടാം ക്ലാസുവരെ പഠിച്ചത്​ എല്ലാം റിയാദിലാണ്​. ചിറകുമുളച്ചപ്പോൾ പഠിക്കാൻ അയച്ച ജന്മനാട്ടിലാണ്​ ചതിപറ്റിയത്​. ഇന്ത്യയെന്നാൽ ഇപ്പോൾ മകനെക്കുറിച്ചുള്ള വേദനയാണ്​​.​ എന്നാലും പിറന്ന നാട്ടിലേക്ക്​ മടങ്ങാതിരിക്കാനാവില്ലല്ലോ. എന്തിനെന്നറിയാതെ കൊല്ലപ്പെട്ട മകനെയോർത്ത്​ വേദനിച്ചു​ വേദനിച്ച്​ മരിച്ചുപോയ ഇൗച്ചരവാര്യരെ പോലൊരു അച്ഛനാണ്​ ജോൺ സേവ്യറും. ത​ൻെറ മകനെ എന്താണ്​ നിങ്ങൾ ചെയ്​തതെന്ന്​ ഇൗച്ചരവാര്യർ ചോദിച്ചതുപോലെ നീന്തൽ താരമായ എ‍ൻെറ മകൻ നീന്തൽക്കുളത്തിൽ മുങ്ങിമരിക്കുന്നതെങ്ങനെ എന്നാണ്​​ കഴിഞ്ഞ 12 വർഷമായി ജോൺ സേവ്യറും ഇന്ത്യൻ നീതിപീഠത്തോട് ചോദിച്ചുകൊണ്ടിരിക്കുന്നത്​.

ഡൽഹി നോയ്​ഡയിലെ അമിറ്റി ഡീംഡ് യൂനിവേഴ്സിറ്റിയിൽ ആദ്യവർഷ ഏയ്​റോസ്​പേസ്​ എൻജിനീയറിങ് വിദ്യാർഥിയായിരിക്കെ ജസ്​റ്റിനെ 2009 സെപ്റ്റംബർ മൂന്നിനാണ് കാമ്പസിലെ നീന്തൽക്കുളത്തിൽ മരിച്ചനിലയിൽ കണ്ടത്. അന്ന്​ 18 വയസ്സുണ്ടായിരുന്ന ​ജസ്​റ്റിൻ നീന്തൽക്കുളത്തിൽ മുങ്ങിമരിച്ചു എന്നായിരുന്നു പോസ്​​റ്റ്​മോർട്ടം റിപ്പോർട്ട്​​. എന്നാൽ, നീന്തൽ മത്സരങ്ങളിലെ ചാമ്പ്യനും ആറടി ഉയരവുമുള്ള മകൻ വെറും അഞ്ചടി മാത്രം ആഴമുള്ള നീന്തൽക്കുളത്തിൽ മുങ്ങിമരിച്ചുവെന്ന്​ വിശ്വസിക്കാൻ കഴിയാഞ്ഞതിനാൽ പിതാവ്​ ജോൺ സേവ്യർ ദുരൂഹതയാരോപിച്ച്​ കേ​ന്ദ്ര ആഭ്യന്തര മന്ത്രാലയം, സി.ബി.​െഎ പ്രത്യേക കോടതി, കേരള ഹൈകോടതി എന്നിവയുടെ സഹായത്തോടെ നിയമപോരാട്ടത്തിന്​ തുടക്കം കുറിച്ചു. കേരളത്തിൽ കൊണ്ടുവന്ന്​ സംസ്​കരിച്ച മൃതദേഹം തിരിച്ചെടുത്ത്​ രണ്ടാമതും പോസ്​റ്റ്​മോർട്ടം നടത്തുകയും കൊലപാതകമാണെന്ന സംശയത്തിൽ ഉറച്ച്​ സി.ബി.​െഎ അന്വേഷണം ഏറ്റെടുക്കുകയും ചെയ്​തു. സീനിയർ വിദ്യാർഥികളെ പ്രതികളാക്കി ലുക്കൗട്ട്​ നോട്ടീസും പുറപ്പെടുവിച്ചു. അന്വേഷണവും കേസും തുടരു​ന്നുണ്ടെങ്കിലും പുരോഗതിയൊന്നുമുണ്ടായിട്ടില്ല. അന്വേഷണ ഏജൻസിയും മറ്റും വേണ്ടത്ര താൽപര്യം കാട്ടുന്നില്ല എന്നതുതന്നെയാണ്​ കാരണം.

കഴിഞ്ഞ 12 വർഷത്തെ ജോൺ സേവ്യറി‍ൻെറയും ഭാര്യയുടെയും വരുമാനവും അധ്വാനവുമെല്ലാം ഇൗ അന്വേഷണവഴിയിൽ ചെലവഴിച്ചു. നീതി കിട്ടുന്നതുവരെ പോരാട്ടം തുടരുമെന്ന തീരുമാനത്തിലാണ്​ ഇരുവരും. റിയാദിലെ അദൗലിയ യൂനിവേഴ്സൽ കമ്പനിയിൽ ലോജിസ്​റ്റിക് മാനേജർ പദവിയിൽനിന്ന്​ സ്വന്തം ഇഷ്​ടപ്രകാരം വിരമിച്ചാണ്​ ജോൺ നാട്ടിലേക്ക്​ മടങ്ങുന്നത്​. റിയാദ്​ കിങ് സഈദ് മെഡിക്കൽ സിറ്റിയിൽ സ്​റ്റാഫ് നഴ്സായിരുന്നു അന്ന ജോൺ. അഞ്ചുവർഷം മുമ്പ്​ ജോലി രാജിവെച്ചു​. ഇരുവരും വ്യാഴാഴ്​ച കേരളത്തിലേക്ക്​ തിരിക്കും. മക​ൻെറ ഘാതകരെ കണ്ടെത്തി ശിക്ഷ വാങ്ങിക്കൊടുക്കാൻ നിയമപോരാട്ടം തുടരു​േമ്പാൾ തന്നെ മക​ൻെറ പേരിൽ ചാരിറ്റി പ്രവർത്തനങ്ങളും നടത്തിവരുകയാണ്​. മക​ൻെറ ഒാർമകൾ നിറച്ച ഒരു വെബ്​സൈറ്റ്​ (www.justinjohn.com) ആരംഭിച്ച്​ മകനെപ്പോലെ ലാളിച്ച്​ പരിപാലിക്കുന്നു. നാട്ടിലെ ഇനിയുള്ള ജീവിതകാലം നിയമപോരാട്ടത്തിനും മക​ൻെറ പേരിലുള്ള ജീവകാരുണ്യ പ്രവർത്തനങ്ങൾക്കുമായി മാറ്റിവെക്കുകയാണെന്ന്​ ജോൺ സേവ്യർ 'ഗൾഫ്​ മാധ്യമ'ത്തോട്​ പറഞ്ഞു.