ലോകകപ്പ്​ ഏഷ്യൻ യോഗ്യത: സൗദിക്ക്​ ജയം

ദോഹ: 2022ൽ ആസ്​ട്രേലിയ വേദിയാവുന്ന ട്വൻറി20 ലോകകപ്പ്​ ​ക്രിക്കറ്റിനുള്ള ഏഷ്യൻ യോഗ്യതാ റൗണ്ടിൽ സൗദി അറേബ്യക്ക്​ രണ്ടാം ജയം. ഏഷ്യൻ ടൗണിൽ നടന്ന മത്സരത്തിൽ കുവൈത്തിനെ നാലു വിക്കറ്റിനാണ്​ തോൽപിച്ചത്​. ആദ്യം ബാറ്റ്​ ചെയ്​ത കുവൈത്ത്​ എട്ട്​ വിക്കറ്റ്​ നഷ്​ടത്തിൽ 146 റൺസെടുത്തു. ക്യാപ്​റ്റൻ മുഹമ്മദ്​ അസ്​ലം (55), മീറ്റ്​ ഭവ്​സർ (36), രവിജ സന്ദറുവൻ (23) എന്നിവരാണ്​ ടോപ്​ സ്​കോറർമാർ. മറുപടി ബാറ്റിങ്ങിനിറങ്ങിയ സൗദി അറേബ്യ ആറ്​ വിക്കറ്റ്​ നഷ്​ടത്തിൽ 149 റൺസെടുത്ത്​ വിജയം കുറിച്ചു. സാജിദ്​ ചീമയും (52), ഫൈസൽ ഖാനും (37) നൽകിയ ഓപണിങ് മികവിൽ നന്നായി തുടങ്ങിയ സൗദി, മധ്യനിരയിലെ വീഴ്​ചക്കിടയിലും വിജയം സ്വന്തമാക്കി. 19 ഓവറിൽ ആറ്​ വിക്കറ്റ്​ നഷ്​ടത്തിൽ ലക്ഷ്യം കണ്ടു. രണ്ടു​ കളിയും ജയിച്ച സൗദിയാണ്​ പട്ടികയിൽ ഒന്നാമത്​. ചൊവ്വാഴ്​ച മത്സരമില്ല. ബുധനാഴ്​ച ബഹ്​റൈൻ മാലദ്വീപിനെയും, ഖത്തർ സൗദിയെയും നേരിടും.