പ്രവാസികളുടെ സ്വപ്​നം പൂവണിയും; 100 ടിക്കറ്റുകൾ നൽകി ഖത്തർ വ്യവസായി റിയാസ് ആദം 

ദോഹ: അർഹതയുണ്ടായിട്ടും ടിക്കറ്റിന്​ പണമില്ലാത്തതിനാൽ നാട്ടിലെത്താൻ കഴിയാത്ത ​പ്രവാസികൾക്കായി ഗൾഫ്​  മാധ്യമവും മീഡിയ വണ്ണും ചേർന്നൊരുക്കുന്ന ‘വിങ്​സ്​ ഒാഫ്​ കംപാഷൻ’ പദ്ധതി നാട്​ ഏറ്റെടുക്കുന്നു. ദിനംതോറും പദ്ധതിയുമായി സഹകരിക്കാൻ ഉദാരമനസ്​കർ എത്തുകയാണ്​. 

പദ്ധതിയിലേക്ക്​ ഖത്തറിലെ പ്രമുഖ വ്യവസായിയും ദോഹ ആസ്ഥാനമായ ബെയ് വൂ ഇൻറര്‍നാഷനല്‍ കമ്പനി ഉടമയുമായ റിയാസ് ആദം 100 വിമാനടിക്കറ്റുകൾ നൽകി​. ഓയില്‍ ആൻഡ്​​ ഗ്യാസ് മേഖലയിലെ പ്രമുഖ സ്​ഥാപനമാണിത്​. മെഡിക്കല്‍ രംഗത്തെ സുരക്ഷാ ഉപകരണങ്ങളുടെ മൊത്ത  വിതരണക്കാര്‍ കൂടിയാണ്. നിലവില്‍ ഖത്തറിലെ സര്‍ക്കാര്‍ മേഖലയിലടക്കം കോവിഡ് പ്രതിരോധ മെഡിക്കല്‍  ഉപകരണങ്ങള്‍ വിതരണം ചെയ്യുന്നതും ബെയ് വൂ ആണ്.  

ഗൾഫ്​ മാധ്യമവും മീഡിയ വണ്ണും ചേർന്നൊരുക്കുന്ന ‘വിങ്​സ്​ ഒാഫ്​ കംപാഷൻ’ പദ്ധതിയിലേക്കുള്ള 100 വിമാനടിക്കറ്റിനുള്ള തുകയുടെ ചെക്ക്​ ബെയ് വൂ ഇൻറര്‍നാഷനല്‍ കമ്പനി ഉടമ റിയാസ് ആദം മീഡിയവണ്‍ ഖത്തര്‍ മാര്‍ക്കറ്റിങ് മാനേജര്‍ നിഷാന്ത് തറമ്മേലിന് കൈമാറുന്നു

 

എല്ലാ അര്‍ത്ഥത്തിലും നിരാലംബരായ പ്രവാസികള്‍ക്ക് പ്രവാസ ലോകത്തുനിന്ന് തന്നെ ആശ്വാസം നല്‍കുക  എന്നതിനാലാണ്​ പദ്ധതിയുമായി സഹകരിക്കുന്നതെന്ന്​ റിയാസ് ആദം പറഞ്ഞു. ടിക്കറ്റിനായുള്ള തുകയുടെ ചെക്ക് റിയാസ് ആദം മീഡിയവണ്‍ ഖത്തര്‍ മാര്‍ക്കറ്റിങ് മാനേജര്‍ നിഷാന്ത് തറമ്മേലിന് കൈമാറി.

അർഹതയുണ്ടായിട്ടും ടിക്കറ്റിന്​ പണമില്ലാത്തതിനാൽ നാട്ടിലെത്താൻ കഴിയാത്ത ​പ്രവാസികൾക്കാണ്​ ‘വിങ്​സ്​ ഒാഫ്​  കംപാഷൻ’ പദ്ധതി വഴി സൗജന്യ വിമാനടിക്കറ്റ്​ നൽകുക. കോവിഡിൻെറ പശ്ചാത്തലത്തിൽ ഇന്ത്യക്കാരെ നാട്ടിലെത്തിക്കാൻ ഇന്ത്യൻ സർക്കാർ അയക്കുന്ന പ്രത്യേക വിമാനങ്ങളിലെ  യാത്രക്ക്​ തെരഞ്ഞെടുക്കപ്പെട്ടിട്ടും ടിക്കറ്റിന്​ പണമില്ലാതെ കഷ്​ടപ്പെടുന്നവക്കാണ്​ വിമാനടിക്കറ്റുകൾ നൽകുന്നത്​.  

https://woc.madhyamam.com/ എന്ന വെബ്​സൈറ്റിലൂടെ ടിക്കറ്റിനായി രജിസ്​റ്റർ ചെയ്യാം. നൻമ വറ്റാത്ത പ്രവാസി സമൂഹവും വ്യവസായ നായകരും നിശബ്​ദ സേവകരും കൈകോർത്താണ്​ ‘വിങ്​സ്​ ഒാഫ്​  കംപാഷൻ’ പദ്ധതി യാഥാർത്ഥ്യമാക്കുന്നത്​. പദ്ധതിയുമായി സഹകരിക്കാൻ താൽപര്യമുള്ളവർക്ക്​ ഖത്തറിൽ 00974 5509  1170 നമ്പറിൽ വാട്​സ്​ആപ്പ്​ ചെയ്യാം.