‘വിങ്​സ്​ ഒാഫ്​ കംപാഷൻ’ പദ്ധതി: അസീം ടെക്​നോളജീസ്​ പത്ത്​ വിമാനടിക്കറ്റുകൾ നൽകും

ദോഹ: അർഹതയുണ്ടായിട്ടും ടിക്കറ്റിന്​ പണമില്ലാത്തതിനാൽ നാട്ടിലെത്താൻ കഴിയാത്തതിൻെറ നെരിപ്പോടിൽ ഇനി  ദിനങ്ങൾ തള്ളിനീക്കേണ്ട. നാടി​​െൻറ തണലിൽ അഭയം തേടാൻ കൊതിക്കുന്ന അർഹരായ പ്രവാസികൾക്കായി ‘ഗൾഫ്​  മാധ്യമ’വും മീഡിയ വണ്ണും ചേർന്നൊരുക്കുന്ന ‘വിങ്​സ്​ ഒാഫ്​ കംപാഷൻ’ പദ്ധതിയെ നെഞ്ചിലേറ്റി ദോഹയിലെ പ്രശസ്​ തസ്​ഥാപനങ്ങളും ഉദാരമനസ്​കരും.

ഖത്തറിലെ പ്രമുഖ കമ്പനിയായ അസീം ടെക്​നോളജീസ്​ പദ്ധതിയിലേക്ക്​ പത്ത്​  വിമാനടിക്കറ്റുകളാണ്​ നൽകുക. ദോഹ ആസ്ഥാനമായി പ്രവര്‍ത്തിക്കുന്ന മലയാളി സ്റ്റാര്‍ട്ട് അപ്പ് സംരംഭമാണ്​ അസീം  ടെക്നോളജീസ്​. മലയാളി യുവസംരംഭകനായ ഷഫീഖ് കബീർ ആണ്​ സ്​ഥാപകനും സി.ഇ.ഒയും. അസീം ടെക്നോളജീസ്  ബഹുരാഷ്ട്ര ഐടി സൊല്യൂഷന്‍സ് കമ്പനിയാണ്. ഖത്തറിൽ നിന്നും തെര​െഞടുക്കപ്പെട്ട പത്ത്​ പേർ ഇനി അസീം ടെക്​ നോളജിയുടെ കാരുണ്യത്തണലിൽ ജൻമനാടിൻെറ തണലിലെത്തും. പദ്ധതിയുമായി സഹകരിക്കാൻ കഴിയുന്നതിൽ ഏറെ  സന്തോഷമുണ്ടെന്ന്​ ഷഫീഖ് കബീർ പറഞ്ഞു. 

കോവിഡിൻെറ പശ്​ചാത്തലത്തിൽ ഇന്ത്യക്കാരെ നാട്ടിലെത്തിക്കാൻ ഇന്ത്യൻ സർക്കാർ അയക്കുന്ന പ്രത്യേക വിമാനങ്ങളിലെ  യാത്രക്ക്​ തെരഞ്ഞെടുക്കപ്പെട്ടിട്ടും ടിക്കറ്റിന്​ പണമില്ലാതെ കഷ്​ടപ്പെടുന്ന അർഹർക്കാണ്​ പദ്ധതിയിലൂടെ സൗജന്യമായി  വിമാനടിക്കറ്റുകൾ നൽകുന്നത്​. 

ഇന്ത്യൻ എംബസിയിൽ പേര്​ രജിസ്​റ്റർ ചെയ്​ത്​ യാത്രക്ക്​ അനുമതി കിട്ടിയവരിൽ നിന്ന്​ തെരഞ്ഞെടുക്കുന്നവർക്കാണ്​ ടിക്കറ്റ്​  നൽകുക. നൻമ വറ്റാത്ത പ്രവാസി സമൂഹവും വ്യവസായ നായകരും നിശബ്​ദ സേവകരും കൈകോർത്താണ്​ ‘വിങ്​സ്​ ഒാഫ്​  കംപാഷൻ’ പദ്ധതി യാഥാർത്ഥ്യമാക്കുന്നത്​. പ്രവാസലോകത്ത്​ നിന്നടക്കം മുറവിളി ഉയർന്നതിൻെറ അടിസ്​ഥാനത്തിലാണ്​  പ്രത്യേക വിമാനങ്ങൾ ഇന്ത്യൻ സർക്കാർ വിദേശങ്ങളിലേക്ക്​ അയക്കുന്നത്​.

എന്നാൽ ടിക്കറ്റിന്​ പണം ഇല്ലാത്ത അർഹരായ  നിരവധിപേരുടെ യാത്ര ഈ ഒറ്റക്കാരണത്താൽ മുടങ്ങുന്ന സ്​ഥിതിയുമുണ്ട്​. ഇതിനെ തുടർന്നാണ്​ ‘ഗൾഫ്​ മാധ്യമ’വും മീഡിയ  വണ്ണും ‘വിങ്​സ്​ ഒാഫ്​ കംപാഷൻ’ പദ്ധതി തുടങ്ങിയത്​. ഇതുമായി സഹകരിക്കാൻ താൽപര്യമുള്ളവർക്ക്​ 00974 5509 1170  നമ്പറിൽ വാട്​സ്​ആപ്പ്​ ചെയ്യാം. ടിക്കറ്റ്​ ലഭിക്കുന്നതിനുള്ള മാനദണ്ഡമടക്കമുള്ള വിശദവിവരങ്ങൾ പിന്നീട്​ അറിയിക്കും.