ലിസ്​റ്റേറിയ ബാക്​ടീരിയ: യു.എ.ഇ വിപണിയിൽ ആസ്​ട്രേലിയൻ  തണ്ണിമത്തൻ ഇല്ലെന്ന്​ മന്ത്രാലയം

അബൂദബി: ലിസ്​റ്റേറിയ ബാക്​ടീരിയയാൽ വിഷമയമായ ആസ്​ട്രേലിയൻ തണ്ണിമത്തൻ (ആസ്​ട്രേലിയൻ റോക്​ മെലൺ) യു.എ.ഇ വിപണിയിൽ ഇല്ലെന്ന്​ കാലാവസ്​ഥ വ്യതിയാന^പരിസ്​ഥിതി മന്ത്രാലയം അറിയിച്ചു. ഇതു സംബന്ധിച്ച്​ സമൂഹ മാധ്യമങ്ങളിൽ പ്രചരിക്കുന്ന വ്യാജ വാർത്തകളുടെ പശ്ചാത്തലത്തിലാണ്​ മന്ത്രാലയത്തി​​​െൻറ വിശദീകരണം.മാർച്ച്​ അഞ്ചിനാണ്​ ആസ്​ട്രേലിയൻ തണ്ണിമത്തൻ യു.എ.ഇ വിപണിയിൽനിന്ന്​ പിൻവലിക്കാൻ മന്ത്രാലയം ഉത്തരവിട്ടത്​. ലിസ്​റ്റേറിയ ബാക്​ടീരിയ കാരണം വിഷമയമാണെന്ന അന്താരാഷ്​ട്ര മാധ്യമങ്ങളുടെ റിപ്പോർട്ടുകൾ അടിസ്​ഥാനമാക്കിയാണ്​ ഇവ പിൻവലിച്ചതെന്ന്​ മന്ത്രാലയത്തിലെ ഭക്ഷ്യ സുരക്ഷ ഡയറക്​ടർ മാജ്​ദ്​ ആൽ ഹെർബാവി പറഞ്ഞു.

തീരുമാനം നടപ്പിലാക്കുന്നുണ്ടെന്ന്​ ഉറപ്പുവരുത്താൻ അബൂദബി ഭക്ഷ്യനിയന്ത്രണ അതോറിറ്റി, ദുബൈ, ഷാർജ, അജ്​മാൻ, ഉമ്മുൽ ഖുവൈൻ, റാസൽഖൈമ, ഫുജൈറ എമിറേറ്റുകളി​െല നഗരസഭ അതോറിറ്റികൾ എന്നിവയുമായി ചേർന്ന്​  മന്ത്രാലയം വിപണികളിൽ സൂക്ഷ്​മനിരീക്ഷണം നടത്തിവരികയാണ്​.  
ആസ്​ട്രേലിയൻ തണ്ണിമത്തൻ രാജ്യത്തേക്ക്​ കടത്തിവിടാതിരിക്കാൻ അതിർത്തി ചെക്​പോസ്​റ്റുകളിലും കർശനമായ നിയന്ത്രണമുണ്ടെന്ന്​ മാജ്​ദ്​ ആൽ ഹെർബാവി വ്യക്​തമാക്കി.