സന്ദർശക പ്രവാഹം; ഹോട്ടലുകളിൽ തിരക്കേറുന്നു

ദോഹ: യാത്രാനിയന്ത്രണങ്ങൾ കൂടുതൽ ലളിതമാക്കുകയും കോവിഡ്​ നിയന്ത്രണങ്ങളിൽ ഇളവുകൾ പ്രാബല്യത്തിൽ വരുകയും ചെയ്​തതോടെ ഖത്തറിലേക്കുള്ള സന്ദർശകരുടെ എണ്ണത്തിൽ ഗണ്യമായ വർധന​. കഴിഞ്ഞ ആഗസ്​റ്റ്​ മുതലുള്ള സ്​ഥിതിവിവര കണക്കുകളുടെ അടിസ്​ഥാനത്തിലാണ്​ രാജ്യത്തേക്ക്​ ഒഴുകിയെത്തുന്ന വിദേശികളുടെ എണ്ണത്തിൽ കാര്യമായ വർധനവുണ്ടായതായി ചൂണ്ടിക്കാണിക്കുന്നത്​. ഈ വർഷം ആഗസ്​റ്റിൽ മാത്രം 62,114 സന്ദർശകർ ഖത്തറിലെത്തിയെന്ന്​ പ്ലാനിങ് ആൻഡ് സ്​റ്റാറ്റിസ്​റ്റിക്സ്​ അതോറിറ്റി പുറത്തുവിട്ട റിപ്പോർട്ടുകളിൽ വ്യക്തമാക്കുന്നു. 2020 ആഗസ്​റ്റിൽ 3019 സന്ദർശകർ മാത്രമായിരുന്നു രാജ്യത്തെ സന്ദർശകർ. ഈ വർഷം ജൂലൈയിൽ 38,289 സന്ദർശകരാണ് രാജ്യത്ത് എത്തിയത്​. ആഗസ്​റ്റിൽ 62 ശതമാനം വർധനവാണ് സന്ദർശകരുടെ എണ്ണത്തിൽ രേഖപ്പെടുത്തിയിരിക്കുന്നതെന്ന്​ പി.എസ്.എ വ്യക്തമാക്കി. സന്ദർശകരിൽ വ്യോമമാർഗം 47,925 പേരാണ് എത്തിയത്, അതേസമയം, കരമാർഗം 13,406 സന്ദർശകരും കടൽമാർഗം 783 സന്ദർശകരും രാജ്യത്തെത്തി. ഖത്തറിലെത്തുന്ന സന്ദർശകരുടെ എണ്ണത്തിലുണ്ടായ വർധന, ഹോട്ടൽ വിപണിയിൽ വലിയ ഉണർവിന് വഴിയൊരുക്കിയതായും ആഗസ്​റ്റ് മാസത്തിൽ ഹോട്ടൽ ബുക്കിങ്ങിൽ ഗണ്യമായ വർധനവുണ്ടായതായും പ്ലാനിങ്​ സ്​റ്റാറ്റിസ്​റ്റിക്​സ്​ റിപ്പോർട്ട്​ ചൂണ്ടിക്കാട്ടുന്നു. ഖത്തർ ടൂറിസം കലണ്ടറിലെ ഏറ്റവും തിരക്കുപിടിച്ച സമയമായ ശൈത്യകാലം അടുത്തെത്തിനിൽക്കെ വരും മാസങ്ങളിൽ സന്ദർശകരുടെ എണ്ണത്തിൽ വലിയ വർധന പ്രതീക്ഷിക്കാം. ഉയർന്ന വാക്സിനേഷൻ നിരക്കും യാത്രാനിബന്ധനകളിലെ ഇളവും ഖത്തറിലേക്ക് സന്ദർശകരെ ആകർഷിക്കുന്നതിൽ മുഖ്യ പങ്കുവഹിക്കുന്നുണ്ട്. ഒക്​ടോബർ ആറ്​ മുതൽ പുതിയ യാത്രാനയം പ്രാബല്യത്തിൽ വരുകയും കൂടുതൽ ഇളവുകൾ നടപ്പാവുകയും ചെയ്​തതോടെ തിരക്ക്​ ഇരട്ടിയായി വർധിക്കുകയും ചെയ്യും. ആഗസ്​റ്റിലെ കണക്ക്​ പ്രകാരം 51 ശതമാനം സന്ദർശകരും ഏഷ്യൻ രാജ്യങ്ങളിൽനിന്നുള്ളവരാണ്. ജി.സി.സിയിൽനിന്ന് 34 ശതമാനം സന്ദർശകരും അറബ് രാജ്യങ്ങളിൽനിന്ന് മൂന്ന് ശതമാനവും സന്ദർശകർ ഖത്തറിലെത്തി. ആഗസ്​റ്റ് മാസത്തിൽ ആഫ്രിക്കയിൽനിന്ന്​ 264ഉം, യൂറോപ്യൻ രാജ്യങ്ങളിൽനിന്ന് 5029 പേരും ആഗസ്​റ്റ് മാസം ഖത്തറിലെത്തി. അമേരിക്കൻ നാടുകളിൽനിന്ന് 2025 പേരാണ് സന്ദർശനത്തിനായി ഖത്തറിലെത്തിയത്.