ത​ദ്ദേശീയ ശൈത്യകാല പച്ചക്കറി മാർക്കറ്റുകൾ വൻ ഹിറ്റ്​

ദോഹ: രാജ്യത്ത്​ തദ്ദേശീയമായി ഉണ്ടാക്കുന്ന പച്ചക്കറികളും പഴ വർഗങ്ങളും കുറഞ്ഞ വിലക്ക്​ ഉപഭോക്​താക്കൾക്ക്​ നൽകുന്നതിനുള്ള ശൈത്യകാല പച്ചക്കറി മാർക്കറ്റുകൾ ​വമ്പൻ ഹിറ്റാകുന്നു. രാജ്യത്തെ ഫാമുകളിൽ ഉൽപാദിപ്പിക്കുന്ന പച്ചക്കറികളും പഴ വർഗങ്ങൾ ഉപഭോക്​താക്കൾക്ക്​ ലഭ്യമാക്കുന്നതിനായി നാല്​ വിപണികളാണ്​ വിവിധ ഭാഗങ്ങളിൽ പ്രവർത്തിക്കുന്നത്​. ഇൗ വർഷം ആദ്യമായി പ്രവർത്തനമാരംഭിച്ച അൽ ശമാൽ മാർക്കറ്റ്​ മുനിസിപ്പാലിറ്റി, പരിസ്ഥിതി മന്ത്രി മുഹമ്മദ്​ ബിൻ അബ്​ദുല്ല അൽ റുമൈതി ഉദ്​ഘാടനം ചെയ്​തു. ശമാലിലെ ചില സ്ഥാപനങ്ങളിൽ കരിമ്പും ഒാറഞ്ചും വരെ ലഭ്യമാണ്​.

അൽ ശമാൽ യാർഡ്​ എന്ന പുതിയ വിപണി അൽ ശമാൽ മുനിസിപ്പാലിറ്റിക്ക്​ എതിർവശത്താണ്​ പ്രവർത്തിക്കുന്നത്​. അൽ മസ്​റൗഹ്​, അൽഖോർ, വക്​റ എന്നിവിടങ്ങളിലാണ്​ മറ്റ്​ മൂന്ന്​ വിപണികൾ പ്രവർത്തിക്കുന്നത്​. മുനിസിപ്പാലിറ്റി ആൻറ്​ പരിസ്ഥിതി മന്ത്രാലയത്തി​ലെ കാർഷിക കാര്യ വകുപ്പി​​​െൻറ ​േനതൃത്വത്തിലുള്ള നാല്​ വിപണികളും വ്യാഴം, വെള്ളി, ശനി ദിവസങ്ങളിൽ രാവിലെ ഏഴ്​ മുതൽ ​ൈവകുന്നേരം അഞ്ച്​ വരെയാണ്​ പ്രവർത്തിക്കുന്നത്​.
അഞ്ചാമത്​ വിപണി ഏതാനും ഗാസങ്ങൾക്കുള്ളിൽ അൽ ശിഹാനിയയിൽ പ്രവർത്തനം ആരംഭിക്കുമെന്ന്​ മന്ത്രി മുഹമ്മദ്​ ബിൻ അബ്​ദുല്ല അൽ റുമൈതി വ്യക്​തമാക്കി. 2012 മുതൽ 2017 വരെ കാലയളവിൽ 40 ലക്ഷം ബോക്​സ്​ പച്ചക്കറികളാണ്​ വിറ്റിരുന്നതെങ്കിൽ കഴിഞ്ഞ വർഷം ഇത്​ 120 ലക്ഷം ബോക്​സ്​ ആയി വർധിച്ചു.

രാജ്യത്ത്​ റെഡ്​ മീറ്റ്​ ഉൽപാദനത്തിൽ സ്വയംപര്യാപ്​തത കൈവരിക്കുന്നതിനുള്ള പ്രവർത്തനങ്ങൾ മുന്നോട്ടുപോകുകയ​ാണെന്ന്​ മന്ത്രി പറഞ്ഞു. നേരത്തേ റെഡ്​ മീറ്റിൽ 15 ശതമാനമാണ്​ രാജ്യത്ത്​ ഉൽപാദിപ്പിച്ചിരുന്നതെങ്കിൽ ഇപ്പോൾ 30 ശതമാനമായി ഉയർന്നിട്ടുണ്ട്​. മുനിസിപ്പാലിറ്റി ആൻറ്​ പരിസ്ഥിതി മന്ത്രാലയമാണ്​ വിപണികളുടെ ചെലവുകൾ പൂർണമായും വഹിക്കുന്നതെന്നും കർഷകർക്ക്​ യാതൊരു ചെലവുകളും ഇല്ലാതെ ഉൽപന്നങ്ങൾ വിൽക്കാനുള്ള അവസരമാണ്​ ഒരുക്കിയിരിക്കുന്നതെന്നും മന്ത്രി പറഞ്ഞു. 12 ഫാമുകളാണ്​ ശമാലിലെ വിപണിയിൽ പങ്കാളിയായിട്ടുള്ളത്​.
കഴിഞ്ഞ വർഷം രാജ്യത്തെ ​െമാത്തം പച്ചക്കറി ഉൽപാദനത്തി​​​െൻറ 20 ശതമാനം വിറ്റഴിച്ചത്​ ശൈത്യകാല വിപണികൾ വഴിയാണ്​.