വാക്​സിൻ: മുൻഗണന പട്ടികയിൽ 30 വയസ്സുള്ളവരും

ദോഹ: കോവിഡ്​ വാക്​സിൻ സ്വീകരിക്കാനുള്ള മുൻഗണനാ പട്ടികയിൽ ഇനി 30 വയസ്സുള്ളവരും. ഇനിമുതൽ 30ഉം അതിന്​ മുകളിലും പ്രായമുള്ളവർ കൂടി ആരോഗ്യമന്ത്രാലയത്തി​െൻറ മുൻഗണനാ പട്ടികയിൽ ഉൾ​െപ്പടും. നിലവിൽ 35 വയസ്സാണ്​ പ്രായപരിധി. ഇനിമുതൽ 30 വയസ്സും അതിന്​ മുകളിലും പ്രായമുള്ളവർക്ക്​ പി.എച്ച്​.സികളിൽനിന്ന്​ വാക്​സിൻ എടുക്കാനുള്ള അപ്പോയ്​ൻമെൻറുകൾ അയക്കും. ദീർഘകാലരോഗമുള്ളവർ, ആരോഗ്യപ്രവർത്തകർ, പ്രധാന മന്ത്രാലയങ്ങളുമായി ബന്ധ​െപ്പട്ടവർ, സ്​കൂൾ അധ്യാപകരും ജീവനക്കാരും എന്നിവരാണ്​ നിലവിൽ വാക്​സിൻ മുൻഗണനാ പട്ടികയിലുള്ള മറ്റുള്ളവർ.

ഇൗ ഗണത്തിലുള്ളവരെ പ്രാഥമികാരോഗ്യകേന്ദ്രങ്ങളിൽനിന്ന്​ നേരിട്ട്​ ബന്ധപ്പെടും. ഇതിന്​ ശേഷമാണ്​ അവർ എ​പ്പോഴാണ്​ വാക്​സിൻ സ്വീകരിക്കാനായി ആശുപത്രിയിൽ എത്തേണ്ടത്​ എന്ന്​ അറിയിക്കുക. പൊതുജനാരോഗ്യമന്ത്രാലയത്തി​െൻറ വെബ്​ സൈറ്റിലൂടെ വാക്​സിനേഷൻ അപ്പോയ്​ൻ​മെൻറിനായി രജിസ്​റ്റർ ചെയ്യാം. മന്ത്രാലയത്തി​െൻറ വെബ്​സൈറ്റിലെ https://appcovid19.moph.gov.qa/en/instructions.html എന്ന ലിങ്കിലൂടെ രജിസ്​ട്രേഷൻ നടത്താനാകും.

മുൻഗണനാ പട്ടികയിൽ ഇല്ലാത്തവർക്കും വെബ്​സൈറ്റിലൂടെ രജിസ്​റ്റർ ചെയ്യാം. ഇവരുടെ പേര്​ വിവരങ്ങൾ മന്ത്രാലയം സൂക്ഷിച്ചുവെക്കും. പിന്നീട്​ ഇവരെ ആരോഗ്യപ്രവർത്തകർ ബന്ധപ്പെടുകയും പിന്നീട്​ വാക്​സിൻ നൽകുകയുമാണ്​ ചെയ്യുക. നാലുഘട്ടമായി രാജ്യത്തെ എല്ലാവർക്കും വാക്​സ​ിൻ നൽകുകയാണ്​ ആരോഗ്യ മന്ത്രാലയത്തി​െൻറ ലക്ഷ്യം. ഇതുവരെ ആകെ 19,76,748 ഡോസ്​ വാക്​സിനാണ്​ നൽകിയിരിക്കുന്നത്​.

കോവിഡ്​: പുതിയ രോഗികൾ 244 മാത്രം

ദോഹ: രാജ്യത്ത്​ ഇന്നലെ പുതിയ കോവിഡ്​ രോഗികൾ 244 മാത്രം. ദിനേന രോഗികൾ കുറഞ്ഞുവരുകയാണ്​. കോവിഡ്​ ബാധിച്ച്​ ചികിത്സയിലായിരുന്ന രണ്ടുപേർ കൂടി വെള്ളിയാഴ്​ച മരിച്ചു. 56, 74 വയസ്സുള്ളവരാണ്​ മരിച്ചതെന്ന്​ ആരോഗ്യമന്ത്രാലയം അറിയിച്ചു. ഇതോടെ ആകെ മരണം 524 ആയി. ഇന്നലെ രോഗം സ്​ഥിരീകരിച്ചവരിൽ 151 പേർ സമ്പർക്കം മൂലം രോഗം ബാധിച്ചവരാണ്​. 93 പേർ വിദേശത്തു​ നിന്ന്​ തിരിച്ചെത്തിയവരുമാണ്​. 590 പേർക്ക്​ ഇന്നലെ രോഗമുക്തിയുണ്ടാവുകയും ചെയ്​തു.

നിലവിലുള്ള ആകെ രോഗികൾ 6393 ആണ്​. ഇന്നലെ 14,139 പേർക്കാണ്​ പരിശോധന നടത്തിയത്​. ആകെ 19,64,598 പേരെ പരിശോധിച്ചപ്പോൾ 2,12,667 പേർ​ക്കാണ്​ ഇതുവരെ വൈറസ് ​ബാധയുണ്ടായത്​. മരിച്ചവരും രോഗം​ ഭേദമായവരും ഉൾ​െപ്പടെയാണിത്​.

ഇതുവരെ ആകെ 2,05,750 പേർക്കാണ്​ രോഗമുക്തിയുണ്ടായത്​. 377 പേരാണ്​ ആശുപത്രികളിൽ ചികിത്സയിലുള്ളത്​. 215 പേർ തീവ്രപരിചരണവിഭാഗത്തിലാണ്​.