വാക്​സിനേഷൻ: മുപ്പത്​ ലക്ഷം ഡോസ്​ പിന്നിട്ടു

ദോഹ: കോവിഡ്​ വാക്​സിൻ കുത്തിവെപ്പിൽ 30 ലക്ഷം ഡോസ്​ കടന്ന്​ ഖത്തർ. ശനിയാഴ്​ച 19,576 പേർക്ക്​ കൂടി വാക്​സിനേഷൻ പൂർത്തിയാക്കിയതോടെയാണ്​ ഖത്തറിൻെറ ആകെ ഡോസ്​ 30,08,822ലെത്തിയത്​. രാജ്യത്തെ ജനസംഖ്യയുടെ 71.3 ശതമാനം പേർ ആദ്യ ഡോസ്​ വാക്​സിനെങ്കിലും സ്വീകരിച്ചതായി ആരോഗ്യ മന്ത്രാലയം അറിയിച്ചു. 58.2 ശതമാനം ആളുകൾ ​രണ്ട്​ ഡോസും സ്വീകരിച്ചു. 40 വയസ്സിന്​ മുകളിലുള്ളവരിൽ 90.3 ശതമാനം പേർ ഒരു ഡോസ്​ വാക്​സിനെങ്കിലും സ്വീകരിച്ചതായാണ്​ ഖത്തർ ആരോഗ്യ മന്ത്രാലയത്തിൻെറ കണക്കുകൾ.

ഈ വർഷം ഫെബ്രുവരി 17ന്​ രാജ്യത്തെ വാക്​സിനേഷൻ ഒരുലക്ഷ്യത്തിലെത്തിച്ച ഖത്തർ പിന്നീട്​ അതിവേഗത്തിലാണ്​ ഇത്​ തുടർന്നത്​.രാജ്യത്ത്​ കോവിഡ്​ വാക്​സിനേഷൻ നടപടികൾക്കായി ഊർജിത ശ്രമമാണ്​ മന്ത്രാലയവും ഹമദ്​മെഡിക്കൽ കോർപറേഷനും ചേർന്ന്​ നടത്തുന്നത്​. ഇൻഡസ്​ട്രിയൽ ഏരിയയിൽ ലോകത്തെ ഏറ്റവും വിശാലമായ വാക്​സിനേഷൻ സെൻറർ പ്രവർത്തനസജ്ജമാക്കിയാണ്​ ഖത്തർ രാജ്യത്തെ കോവിഡ്​ പ്രതിരോധ പ്രവർത്തനങ്ങൾ ഉൗർജിതമാക്കിയത്​.

മൂന്ന്​ ലക്ഷം ചതുരശ്ര മീറ്റർ വിശാലതയിൽ ഒരുക്കിയ സെൻററിൽ 300​ലേറെ സ്​റ്റേഷനുകളാണ്​ സജ്ജീകരിച്ചത്​. 700ഓളം ജീവനക്കാരുടെ സേവനവും ലഭിക്കുന്ന ഇവിടെ പ്രതിദിനം 25,000 ഡോസ്​ കുത്തിവെക്കാൻ സൗകര്യമുണ്ട്​. 27 ഹെൽത്ത്​ സെൻററുകൾ ഉൾപ്പെടെ രാജ്യത്തെ പ്രതിദിന വാക്​സിനേഷ​ൻ ശേഷി 40,000 ഡോസാണ്​.