വാക്​സിനെടുത്തവർ ഇരുപത്​ ലക്ഷത്തിലേക്ക്​

ദോഹ: ഖത്തറിൽ ഒരു ഡോസ്​ വാക്സിനെങ്കിലും സ്വീകരിച്ചവരുടെ എണ്ണം 20 ലക്ഷത്തിലേക്ക്​. ഈദ്​ അവധിയിലും മുടക്കമില്ലാതെ വാക്​സിനേഷൻ നടപടികൾ സജീവമായപ്പോൾ, ഈ വർഷംതന്നെ സമ്പൂർണ വാക്​സിനേഷൻ എന്ന ലക്ഷ്യത്തിലേക്ക്​ അതിവേഗം സഞ്ചരിക്കുകയാണ്​ ഖത്തർ.

കഴിഞ്ഞ 24 മണിക്കൂറിനിടെ 20,169 ഡോസ്​ വാക്സിനാണ് രാജ്യത്ത് വിതരണം ചെയ്തത്. ഒരു ഡോസ്​ വാക്സിൻ സ്വീകരിച്ചവരുടെ എണ്ണം ഇതോടെ 19.65 ലക്ഷം ആയി ഉയർന്നു.

ദിവസങ്ങൾക്കകം ഒരു ഡോസെങ്കിലും സ്വീകരിച്ചവരുടെ എണ്ണം 20 ലക്ഷം എന്ന നാഴികക്കല്ലിൽ എത്താനുള്ള ഒരുക്കത്തിലാണ്​ ആരോഗ്യ മന്ത്രാലയം. ഈദ്​ ദിനങ്ങളിൽ രാജ്യ​ത്തെ സർക്കാർ, സ്വകാര്യ മേഖലകൾ അവധിയിലായപ്പോഴും വാക്​സിനേഷൻ നടപടികൾക്ക്​ വേഗം കുറച്ചില്ല. ഈ കാലയളവ്​ തൊഴിലാളികൾ ഉൾപ്പെടെയുള്ള വിഭാഗങ്ങൾക്ക്​ വാക്​സിനേഷന്​ കൂടുതൽ ഫലപ്രദമായി ഉപയോഗപ്പെടുത്താൻ അവസരം നൽകിയാണ്​ അധികൃതർ തങ്ങളുടെ സ്വപ്​നത്തിലേക്ക്​ മുന്നേറുന്നത്​.

ഇതുവരെയായി 19,65,422 പേർ ഒരു ഡോസ്​ വാക്സിനെങ്കിലും സ്വീകരിച്ചതായി പൊതുജനാരോഗ്യ മന്ത്രാലയം അറിയിച്ചു.36,62,171 ഡോസ്​ വാക്സിൻ ആകെ നൽകി. രണ്ട് ഡോസ്​ വാക്സിൻ സ്വീകരിച്ചവരുടെ എണ്ണം 16,70,850 പിന്നിട്ടു.ദേശീയ വാക്സിനേഷൻ പരിപാടിയുടെ ഭാഗമായി വാക്സിനേഷന് യോഗ്യരായ 79 ശതമാനം പേരും ഒരു ഡോസ്​ വാക്സിൻ സ്വീകരിച്ചിട്ടുണ്ട്.

60 വയസ്സിന് മുകളിലുള്ള 98.6 ശതമാനം പേരും ഒരു ഡോസ്​ വാക്സിനെങ്കിലും സ്വീകരിച്ചപ്പോൾ ഇതിൽ 93.5 ശതമാനം പേരും രണ്ട് ഡോസ്​ വാക്സിൻ സ്വീകരിച്ചതായും അധികൃതർ അറിയിച്ചു.വാക്സിൻ സ്വീകരിക്കുന്നവരുടെ എണ്ണം വർധിക്കുന്നതിനനുസരിച്ച് കോവിഡ് പോസിറ്റിവാകുന്നവരുടെ എണ്ണം നിയന്ത്രിക്കാനായിട്ടുണ്ട്.

കഴിഞ്ഞ 24 മണിക്കൂറിനിടെ ഒരു രോഗിയെപോലും തീവ്രപരിചരണ വിഭാഗത്തിൽ പ്രവേശിപ്പിച്ചിട്ടില്ല. തീവ്രപരിചരണ വിഭാഗത്തിൽ 28 രോഗികളാണ്​ ആകെ ചികിത്സയിലുള്ളത്​.ഒരു ദിവസത്തിനിടെ എട്ട് പേരെയാണ് വിവിധ ആശുപത്രികളിലായി പ്രവേശിപ്പിക്കപ്പെട്ടത്. നിലവിൽ 69 രോഗികളാണ് ആശുപത്രിയിൽ ചികിത്സയിലുള്ളത്.