ആകാശത്ത്​ ഇനി ടൈഫൂൺ കരുത്ത്

ദോഹ: ഖത്തറിന്‍റെ ആകാശത്ത്​ കരുത്താവാൻ അത്യാധുനിക പോർവിമാനമായ ടൈഫൂൺ ജെറ്റ്​ (അൽ ദാരിയാത്ത്​) പറന്നിറങ്ങി. ഖത്തരി അമിരി എയർഫോഴ്​സിന്‍റെ ​ശക്​തിദുർഗമായി മാറുന്ന പോർവിമാന ശ്രേണിയിലേക്കുള്ള യൂറോഫൈറ്റർ ടൈഫൂൺ ജെറ്റ്​ വിമാനങ്ങളുടെ ആദ്യ ബാച്ചാണ്​ ശനിയാഴ്ച ഉച്ചകഴിഞ്ഞ്​ ദുഖാനിലെ എയർബേസിൽ പറന്നിറങ്ങിയത്​. രാജ്യത്തിന്‍റെ സുരക്ഷയിൽ പ്രധാനിയാവുന്ന വിമാനത്തിന്‍റെ വരവിന്​ സാക്ഷിയാവാൻ അമീർ ശൈഖ്​ തമീം ബിൻ ഹമദ്​ ആൽഥാനിയും എത്തിയിരുന്നു. വിമാനങ്ങളുടെയും ​അമിരി ഫോഴ്​സ്​ സേനകളുടെയും ചിത്രം പങ്കുവെച്ചുകൊണ്ട്​ അമീർ ട്വീറ്റ്​ ചെയ്തു. 'ഖത്തരി അമിരി സേനയുടെ കരുത്ത്​ വർധിപ്പിക്കുന്നതിന്‍റെ ഭാഗമായി ആദ്യ ബാച്ച്​ ടൈഫൂൺ ​പോർവിമാനങ്ങൾ ഖത്തറിലെത്തി. മികച്ച അന്താരാഷ്ട്ര നിലവാരത്തിലുള്ള പ്രതിരോധ സംവിധാനങ്ങൾ ഒരുക്കത്തിന്‍റെ തുടർച്ചയായാണ്​ ഈ നടപടി' - ട്വിറ്ററിലൂടെ അറിയിച്ചു.

എയർബേസിൽ വിമാനങ്ങളെ സ്വീകരിച്ച അമീർ ഇവ പരിശോധിക്കുകയും ചെയ്തു. വിമാനങ്ങളുടെ സാ​ങ്കേതിക മികവിനെ കുറിച്ചും പ്രവര്‍ത്തനങ്ങളെ കുറിച്ചും ഉദ്യോഗസ്ഥര്‍ വിശദീകരിച്ചു നല്‍കി. ഉപപ്രധാനമന്ത്രിയും പ്രതിരോധമന്ത്രിയുമായ ഡോ. ഖാലിദ്​ ബിൻ മുഹമ്മദ്​ അൽ അതിയ്യ, ഖത്തർ ആംഡ് ഫോഴ്സ് ചീഫ് ഓഫ് സ്റ്റാഫ് ലഫ്​. ജനറൽ സാലിം ബിൻ ഹമദ്​ ബിൻ അഖീൽ അൽ നാബിത്​, അമിരി എയർഫോഴ്​സ്​ കമാൻഡർ ബ്രിഗേഡിയർ ജനറൽ ജാസിം മുഹമ്മദ്​ അൽ മന്നായി എന്നിവർ ഉൾപ്പെടെ മുതിർന്ന ഉദ്യോഗസ്ഥരും അമീറിനെ അനുഗമിച്ചു. രാജ്യത്തിന്‍റെ പ്രതിരോധ മേഖല കൂടുതൽ ശക്​തിപ്പെടുത്തുന്നതിന്‍റെ ഭാഗമായാണ്​ ബ്രിട്ടനിൽ നിന്നും ഖത്തർ 24 ടൈഫൂൺ പോർവിമാനങ്ങൾ സ്വന്തമാക്കുന്നത്​. 2017ൽ 600 കോടി ​പൗണ്ടിനാണ്​ ഇതു സംബന്ധിച്ച്​ കരാറിൽ ഒപ്പുവെച്ചത്​.

വിമാന നിർമാണത്തിനു പുറമെ, സംയുക്​ത പരി​ശീലനം, ഓപറേഷൻ, ഇലക്​ട്രോണിക്​ യുദ്ധമേഖല എന്നിവ ഉൾപ്പെടുന്ന ജോയിന്‍റ്​ ഓപറേഷണൻ സ്​ക്വാഡ്രൺ കരാറിലും ധാരണയായിരുന്നു. ഖത്തരി-ബ്രിട്ടീഷ്​ പൈലറ്റുമാരുടെയും സാ​ങ്കേതിക വിദഗ്​ധരുടെയും സംയുക്​ത സേവനവും പ്രവർത്തനവുമെല്ലാം ഇതിന്‍റെ ഭാഗമായുണ്ടാവും. ലോകകപ്പ്​ വേളയിൽ ഖത്തർ ആകാശത്തെ സുരക്ഷക്കായി റോയൽ എയർഫോഴ്​സിന്‍റെ പങ്കാളിത്തവുമുണ്ടാവും. ലോകകപ്പ്​ സുരക്ഷയൊരുക്കുന്നതിന്‍റെ ഭാഗമായി അമിരി വ്യോമസേന ബ്രിട്ടീഷ്​ ​സേനയുമൊത്ത്​ നേരത്തെ തന്നെ പരിശീലനം പുർത്തിയാക്കിയിരുന്നു.

ബ്രിട്ടൻ, ജർമനി, സ്​പെയിൻ, ഇറ്റലി എന്നീ രാജ്യങ്ങൾ സംയുക്​തമായാണ്​ യൂറോഫൈറ്റർ ടൈഫൂൺ ജെറ്റ്​ നിർമിക്കുന്നത്​. ഖത്തർ അമിരി വ്യോമസേനയുടെ എഫ്​ 15, റാഫേൽ യുദ്ധവിമാനങ്ങളുടെ ശ്രേണിയിലേക്കാണ്​ ടൈഫൂണും ഉൾപ്പെടുന്നത്​. നിരവധി അത്യാധുനിക നിരീക്ഷണ-റഡാർ സംവിധാനങ്ങളും, ആക്രമണ ശേഷിയും ഉൾപെടുന്നതാണ്​ ടൈഫൂൺ.