ഖത്തർ എയർവേയ്സ്​ ടിക്കറ്റുകൾക്ക് രണ്ട് വർഷം വരെ കാലാവധി 

ദോഹ: ടിക്കറ്റുകൾക്ക് രണ്ട് വർഷം വരെ കാലാവധി പ്രഖ്യാപിച്ച് ലോകത്തെ മുൻനിര എയർലൈൻസായ ഖത്തർ എയർവേയ്സ്​. കോവിഡ്–19 പശ്ചാത്തലത്തിൽ യാത്രക്കാർക്കിടയിൽ ഏറെ ആത്മവിശ്വാസവും ആശ്വാസവും പകരാൻ  ഖത്തർ എയർവേയ്സി​െൻറ പുതിയ പ്രഖ്യാപനം സഹായിക്കും.

2020 സെപ്റ്റംബർ 30ന് മുമ്പായി ബുക്ക് ചെയ്യുന്ന ടിക്കറ്റുകൾക്കും നേരത്തെ ബുക്ക് ചെയ്തവർക്കും ഖത്തർ എയർവേയ്സി​െൻറ ഈ ആനുകൂല്യം ലഭിക്കും. ഖത്തർ എയർവേയ്സി​െൻറ വെബ്സൈറ്റിലാണ് ഇക്കാര്യം  പുറത്തുവിട്ടിരിക്കുന്നത്.
നിലവിൽ ടിക്കറ്റെടുത്തവർ ടിക്കറ്റ് സൂക്ഷിക്കണം. ടിക്കറ്റ് ഇഷ്യു ചെയ്ത തിയതി മുതൽ രണ്ട് വർഷം വരെ ഏത് ദിവസവും യാത്രക്ക് ടിക്കറ്റ് നിയമസാധുതയുണ്ട്​.

ടിക്കറ്റുകളിൽ മാറ്റം വരുത്തുന്നതിന് ഖത്തർ എയർവേയ്സി​െൻറ ഓഫിസുകളുമായോ കോൺടാക്ട് സ​െൻററുകളുമായോ  ബന്ധപ്പെടണം. ടിക്കറ്റി​െൻറ തിയതികളിൽ എത്ര തവണ വേണമെങ്കിലും സൗജന്യമായി മാറ്റം വരുത്താനും സാധിക്കും. 
യാത്ര ചെയ്യാനുള്ള സ്​ഥലം, തിയതി എന്നിവ എത്ര തവണ വേണമെങ്കിലും സൗജന്യ നിരക്കിൽ മാറ്റം വരുത്താനാകും. നേരത്തെ നിശ്ചയിച്ച സ്​ഥലത്ത് നിന്നും 5000 മൈൽ പരിധിയിലെ ഏത് സ്​ഥലത്തേക്ക് വേണമെങ്കിലും ഡെസ്​റ്റിനേഷൻ മാറ്റാനും സാധിക്കും.

ഈ ടിക്കറ്റുകൾ ക്യൂമൈൽസിനായി ഉപയോഗിക്കാം. ഒരു ഡോളറിന് 100 ക്യൂമൈൽസ്​ പോയൻറ് നിരക്കിൽ ലഭിക്കും. ഇത് മൂന്ന് വർഷത്തേക്ക് ഉപയോഗിക്കാനും സാധിക്കുമെന്നും ഖത്തർ എയർവേയ്സ്​ വ്യക്തമാക്കുന്നു.

കോവിഡ്–19 പശ്ചാത്തലത്തിൽ നിർത്തിവെച്ചിരുന്ന സർവിസുകൾ ആരംഭിക്കാനിരിക്കെ പുതിയ തീരുമാനം യാത്രക്കാർക്ക്  വലിയ ആശ്വാസമാകും. ജൂൺ അവസാനത്തോടെ ഇന്ത്യയുൾപ്പെടെയുള്ള രാജ്യങ്ങളിലേക്ക് സർവിസ്  പുനരാരംഭിക്കുമെന്ന് ഖത്തർ എയർവേയ്സ്​ നേരത്തെ അറിയിച്ചിരുന്നു. മെയ് 26 മുതൽ കേരളത്തിലേക്കുള്ള ബുക്കിങ്ങും ഖത്തർ എയർവേയ്സ്​ ആരംഭിച്ചിട്ടുണ്ട്.