ഖത്തറിൽ നിന്നുള്ള സംഘടനകളു​െട രണ്ടാം ചാർ​ട്ടേർഡ്​ വിമാനവും പറന്നു

ദോഹ: കോവിഡിൻെറ പശ്​ചാത്തലത്തിൽ ഖത്തറിൽ നിന്ന്​ സംഘടനകൾ ഏർപ്പെടുത്തിയ രണ്ടാം ചാർ​ട്ടേർഡ്​​ വിമാനവും ഇന്ത്യയിലേക്ക്​ പറന്നു. കോൺഗ്രസിൻെറ പ്രവാസി സംഘടനയായ ഇൻകാസിൻെറ വിമാനം തിങ്കളാഴ്​ച പുലർച്ചെ 2.15ഓടെ ദോഹയിൽ നിന്ന്​ പുറപ്പെട്ട്​ 9.30ഓടെ കൊച്ചിയിൽ എത്തിയിരുന്നു​. 170 യാത്രക്കാരാണ്​ ഇൻഡിഗോ വിമാനത്തിൽ നാടണഞ്ഞത്​. 

ഖത്തറിൽ നിന്ന്​ ഒരു സംഘടനയുടെ ചാർ​ട്ടേർഡ്​ വിമാനം ആദ്യമായി തങ്ങൾക്ക്​ ഏർപ്പെടുത്താൻ  കഴിഞ്ഞതിലും അതിൽ വിജയിച്ചതിലും ഏറെ അഭിമാനമുണ്ടെന്ന്​ ഇൻകാസ്​ പ്രസിഡൻറ്​ സമീർ ഏറാമല പറഞ്ഞു. ചാർ​ട്ടേർഡ്​ വിമാനം പറത്തുക എന്നത്​ ഏറെ ശ്രമകരമായ ദൗത്യമാണെന്നും ഖത്തറിലെ ഇന്ത്യൻ എംബസി അടക്കമുള്ള വിവിധ അധികൃതർ ഏറെ സഹായങ്ങളാണ്​ ഇക്കാര്യത്തിൽ നൽകിയതെന്നും അദ്ദേഹം പറഞ്ഞു. 

കേരളത്തിലെ കോൺഗ്രസ്​ നേതാക്കളും പിന്തുണയുമായി കൂടെ നിന്നു. രാഹുൽ ഗാന്ധിയുടെ പിന്തുണയും ഏറെ ഉപകാരപ്പെട്ടു. ഖത്തറിലെ നേതാക്കളുടെയും പ്രവർത്തകരുടെയും സഹായവും ​പ്രവർത്തനവും നിർണായകമായിരുന്നുവെന്നും അദ്ദേഹം പറഞ്ഞു. അർഹരായ ചില യാത്രക്കാർക്ക്​ സൗജന്യനിരക്കിലാണ്​ ടിക്കറ്റ്​ അനുവദിച്ചതെന്നും അദ്ദേഹം പറഞ്ഞു. 

ഇന്ത്യൻ എംബസിയുടെ അനുബന്ധ സംഘടനയായ ഇന്ത്യൻ കമ്മ്യൂണിറ്റി ബെനവലൻറ്​ ഫോറം (ഐ.സി.ബി.എഫ്​)  ഏർപ്പെടുത്തിയ ആദ്യവിമാനം തിങ്കളാഴ്​ച രാവിലെ 11.05നാണ്​ ദോഹയിൽ നിന്ന്​ പുറപ്പെട്ടത്​. ഇന്ത്യൻ സമയം വൈകുന്നേരം ആറ്​ മണിക്ക്​ ബംഗളൂരു വിമാനത്താവളത്തിൽ എത്തും. 179 മുതിർന്നവരും അഞ്ച്​ കുഞ്ഞുങ്ങളുമടക്കം ആകെ 184  യാത്രക്കാരാണ്​ ‘ഗോ എയർ’ വിമാനത്തിൽ ഉള്ളത്​. യാത്രക്കാർ ബംഗളൂരുവിൽ എത്തിക്കഴിഞ്ഞാൽ അവർക്കുള്ള ഹോട്ടൽ ക്വാറ​ൻറീൻ അടക്കമുള്ള സൗകര്യങ്ങൾക്കുള്ള പ്രാഥമിക കാര്യങ്ങളടക്കം ചെയ്​തിട്ടുണ്ടെന്ന്​ ഐ.സി.ബി.എഫ്​ പ്രസിഡൻറ്​ പി.എൻ. ബാബുരാജൻ പറഞ്ഞു. 

കർണാടക സർക്കാറുമായി ബന്ധപ്പെട്ട നടപടികൾ നേരത്തേ തന്നെ  പൂർത്തിയാക്കിയിരുന്നു​. പുറകിലെ വരിയിലുള്ള ചില സീറ്റുകൾ ഒഴിച്ചിട്ടിരുന്നു. യാത്രക്കിടയിൽ ഏതെങ്കിലും തരത്തിൽ രോഗലക്ഷണങ്ങൾ കാണിക്കുന്നവരെ മാറ്റിയിരുത്താനുള്ള താൽകാലിക സമ്പർക്ക വിലക്ക്​ സ്​ഥലമാണ്​ ഇത്തരത്തിൽ സീറ്റുകൾ ഒഴിച്ചിട്ട്​ ക്രമീകരിച്ചത്​. 980 റിയാൽ ആണ്​ ബംഗളൂരിവിലേക്കുള്ള ടിക്കറ്റ്​ നിരക്ക്​. ആകെയുള്ളതിൽ പത്ത്​ സീറ്റുകൾ അർഹരായ സാമ്പത്തികപ്രയാസമനുഭവിക്കുന്നവർക്കാണ്​ നൽകിയത്​. 

ഇന്ത്യൻ എംബസിയിൽ പേര്​ ചേർത്തവരിൽ നിന്ന്​ തെരഞ്ഞെടുത്തവരെയാണ്​ പരിഗണിച്ചത്​. കണ്ണൂരിലേക്കും കൊച്ചിയിലേക്കുമുള്ള വിമാനങ്ങൾ ജൂൺ 20നുള്ളിൽ പറത്താൻ കഴിയുമെന്നാണ്​ പ്രതീക്ഷ. കണ്ണൂർ വിമാനം 19ന്​ ​പോകാനാണ്​ ഐ.സി.ബി.എഫ്​ ശ്രമിക്കുന്നത്​. 

അതേസമയം, ഖത്തറിൽ നിന്ന്​ മറ്റ്​ വിവിധ സംഘടനകൾ ഒരുക്കുന്ന ചാർ​​ട്ടേർഡ്​ വിമാനങ്ങളും ​പറത്താനുള്ള ശ്രമങ്ങൾ ഊർജിതമായി നടക്കുകയാണ്​.
ഇതുവരെ 40000ലധികം പ്രവാസികളാണ് ഇന്ത്യയിലേക്ക് മടങ്ങുന്നതിന് ഇന്ത്യൻ എംബസിയിൽ രജിസ്​റ്റർ ചെയ്തിരിക്കുന്നത്​. ജൂൺ ഒമ്പതു വരെ ഖത്തറിൽ നിന്നും ഇന്ത്യയിലെ വിവിധ നഗരങ്ങളിലേക്കായി 21 വിമാനങ്ങളാണ് വന്ദേഭാരത് മിഷനിൽ പുറപ്പെട്ടത്​. ഇതിൽ 3506 പേർക്ക്​ മാത്രമാണ്​ നാടണയാനായത്​. 98 കുഞ്ഞുങ്ങളും ഇതിലുൾപ്പെടും. ഇതിനാലാണ്​ അർഹരായ ആളുകളെ നാട്ടിലെത്തിക്കാനായി വിവിധ സംഘടനകൾ ചാർ​ട്ടേർഡ്​ വിമാനങ്ങൾക്കായി ശ്രമം നടത്തുന്നത്​. ചാർ​ട്ടേർഡ്​ വിമാനത്തിൽ യാത്ര ചെയ്യുന്നവർക്ക്​ മുൻകൂർ കോവിഡ്​ ടെസ്​റ്റ്​ നിർബന്ധമാക്കിയ നടപടി കേരളസർക്കാർ ഉടൻ പിൻവലിക്കുമെന്നാണ്​ പ്രതീക്ഷ.