ഇ- സ്കൂട്ടറിനും ഗതാഗത നിയമം ബാധകം

ദോഹ: ഖത്തറിൽ ജനപ്രിയ ഗതാഗത സംവിധാനമായി മാറിക്കൊണ്ടിരിക്കുന്ന ഇ സ്കൂട്ടറിനും ഗതാഗത നിയമങ്ങൾ ബാധകമാണെന്ന് ട്രാഫിക് ജനറൽ ഡയറക്ടറേറ്റിലെ ഗതാഗതബോധവത്​കരണ വിഭാഗം ഡയറക്​ടർ കേണൽ മുഹമ്മദ് റാദി അൽ ഹജ്​രി. യാത്രികരുടെയും പൊതുജനങ്ങളുടെയും സുരക്ഷയെ കരുതിയാണ് ഇത്.

മോട്ടോർ ബൈക്കുകൾക്ക് ബാധകമായ എല്ലാ ഗതാഗത നിയമങ്ങളും ഇ-സ്കൂട്ടറിനും ആവശ്യമാണ്. മോട്ടോർ ബൈക്കിൽ യാത്രികൻ ഇരുന്നാണ് വാഹനമോടിക്കുന്നതെങ്കിൽ ഇ-സ്കൂട്ടർ റൈഡർ നിന്ന് ഓടിക്കുന്നു എന്നത് മാത്രമാണ് വ്യത്യാസം. അതിനാൽ ഇ-സ്കൂട്ടർ യാത്രക്കാർക്കും ഗതാഗത നിയമങ്ങൾ ബാധകമാണ്. ഖത്തർ റേഡിയോയിലെ പരിപാടിയിൽ സംസാരിക്കുകയായിരുന്നു അദ്ദേഹം.

ഹെൽമറ്റ്, ഇരുട്ടില്‍ പ്രകാശിക്കുന്ന തരത്തിലുള്ള ജാക്കറ്റ് എന്നീ സുരക്ഷാ സംവിധാനങ്ങൾ ധരിച്ച് മാത്രമേ ഇ-സ്കൂട്ടർ ഓടിക്കാവൂ. സൈക്ലിങ്ങിനായി ഒരുക്കിയ പ്രത്യേക ട്രാക്കുകൾതന്നെ സഞ്ചാരത്തിനായി തെരഞ്ഞെടുക്കണം. പൊതുമരാമത്ത് അതോറിറ്റി അശ്​ഗാലിന്​ കീഴിൽ രാജ്യവ്യാപകമായി റോഡുകളിൽ ദൈർഘ്യമേറിയ പ്രത്യേക സൈക്കിൾ ട്രാക്കുകളുടെ നിർമാണവും പൂർത്തിയാക്കിയിട്ടുണ്ട്.

ഇ-സ്​കൂട്ടർ ഓടിക്കാം, മുൻകരുതലെടുത്ത്​ ശ്രദ്ധയോടെ

രാജ്യത്ത്​ ഇ-സ്​കൂട്ടർ ഉപയോഗിക്കുന്നവരുടെ എണ്ണം ഏറെ കൂടിയിട്ടുണ്ട്​. പലരും സുരക്ഷാമാനദണ്ഡങ്ങൾ പാലിക്കാതെയാണ്​ വാഹനം ഓടിക്കുന്നത്​. വൈദ്യുതിയിൽ ചാർജ്​ ചെയ്​താൽ അഞ്ചുമണിക്കൂർ വരെ ഓടാൻ ഇ-സ്​കൂട്ടറിന്​ കഴിയും. 12 വയസ്സിന് താഴെയുള്ള കുട്ടികൾക്ക് ഇ-സ്​കൂട്ടർ ഉപയോഗിക്കാൻ നൽകരുതെന്ന് ഹമദ് മെഡിക്കൽ കോർപറേഷൻ (എച്ച്.എം.സി) നിർദേശിക്കുന്നുണ്ട്​.

ഇ-സ്​കൂട്ടർ ൈഡ്രവ് ചെയ്യുന്നതിനിടെ അപകടത്തിൽപെട്ട് ആശുപത്രിയിലെത്തുന്നവരുടെ എണ്ണം കൂടിയിട്ടുണ്ട്​. ചെറിയ പരിക്കുകൾ മുതൽ സാരമായ പരിക്കുകളോടെയാണ് അപകടത്തിൽപെട്ടവരെ അടിയന്തര വിഭാഗത്തിൽ പ്രവേശിപ്പിക്കുന്നത്​.

പുതിയ ഉപയോക്താക്കൾ ഇ-സ്​കൂട്ടർ ഓടിക്കും മുമ്പ് കൃത്യമായ പരിശീലനം നേടണം. ഹെൽമറ്റ് നിർബന്ധമായും ധരിച്ചിരിക്കണം. രാത്രിയായാലും പകലായാലും സ്​കൂട്ടറുകളിലെ ലൈറ്റ് ഉപയോഗിക്കണം. റിഫ്ലക്ടിവ് വസ്​ത്രങ്ങൾ ധരിച്ചിരിക്കണം. രാത്രികളിൽ കാഴ്ചാപരിധി കുറഞ്ഞ സമയങ്ങളിൽ ഇ-സ്​കൂട്ടറുകൾ ഉപയോഗിക്കാതിരിക്കുക. എല്ലാ സമയവും രണ്ട് കൈകളും ഹാൻഡിലിൽ ഉപയോഗിക്കണം. ഓടിക്കു​േമ്പാൾ സെൽഫി എടുക്കാനോ മെസേജ് ടൈപ് ചെയ്യാനോ പാടില്ല.

കാറിൽ അകംകാഴ്​ച മറക്കുന്ന ഫിലിം പതിക്കാൻ അനുമതി വേണം

വാഹനങ്ങളിലെ ഗ്ലാസുകളിൽ അക​ത്തെ കാഴ്​ച മറക്കുന്ന രീതിയിലുള്ള ഫിലിം പതിക്കാൻ പ്രത്യേക അനുമതി വേണമെന്ന്​ ട്രാഫിക് ജനറൽ ഡയറക്ടറേറ്റിലെ ഗതാഗതബോധവത്​കരണ വിഭാഗം ഡയറക്​ടർ കേണൽ മുഹമ്മദ് റാദി അൽ ഹജ്​രി പറഞ്ഞു.

അകത്തെ കാഴ്ച മറക്കുന്ന രീതിയിലുള്ള ഫിലിം പതിക്കുന്നതിന് ഗതാഗതവകുപ്പിൽനിന്ന്​ പ്രത്യേക അനുമതി ആവശ്യമാണ്. മെഡിക്കൽ സംബന്ധമായത് ഉൾപ്പെടെയുള്ള ഇത്തരം അപേക്ഷകളിൽ പ്രത്യേക സമിതി അനുമതി നൽകും.

എന്നാൽ, കഠിനമായ സൂര്യപ്രകാശം തടയാൻ സുതാര്യമായ ഫിലിം ഉപയോഗിക്കാൻ അനുവാദമുണ്ട്.പ്രധാനപാതകളിലൂടെ വാഹനമോടിക്കുമ്പോൾ ഒരേ സമയം ഒന്നിലേറെ വരികളിൽ പ്രവേശിക്കുന്നത് ശിക്ഷാർഹമാണ്​. ഇത്തരം കുറ്റകൃത്യങ്ങൾക്ക് 500 റിയാൽ പിഴ ചുമത്തും. എന്നാൽ, നിലവിൽ ഇത്തരം കുറ്റകൃത്യങ്ങൾ താരതമ്യേന കുറവാണെന്നും അദ്ദേഹം പറഞ്ഞു.