നാട്​ പെരുന്നാൾ സന്തോഷത്തിലേക്ക്

ദോഹ: പുണ്യങ്ങളുടെ പൂക്കാലമായ റമദാൻ വിടപറയാനൊരുങ്ങുന്നു, നാട്​ പതിയെ ചെറിയപെരുന്നാൾ സന്തോഷത്തിലേക്ക്​ നീങ്ങുകയാണ്​. കോവിഡിൻെറ പ്രയാസങ്ങൾ മാറിവരുന്നതിൻെറ ആശ്വാസത്തിലാണ്​ എല്ലാവരും. കോവിഡ്​ ചട്ടങ്ങൾ പാലിച്ച്​ ​ സാധ്യമാകുന്ന തരത്തിൽ പെരുന്നാൾ ആഘോഷിക്കാനൊരുങ്ങുകയാണ്​ എല്ലാവരും. എന്നാൽ, കുടുംബസന്ദർശനങ്ങളടക്കം ഒഴിവാക്കണമെന്ന്​ അധികൃതർ ഉണർത്തുന്നുണ്ട്​. വ്യാപാരസ്ഥാപനങ്ങളിൽ നേരത്തേതന്നെ ഈദ്​ വിൽപന സജീവമായിട്ടുണ്ട്​. പ്രധാന മാളുകളും ​ൈഹപർമാർക്കറ്റുകളും പ്രത്യേക ഈദ്​ ഓഫറുകളും തുടങ്ങിയിട്ടുണ്ട്​.

ഉപഭോക്താക്കളെല്ലാം കോവിഡ്​ പ്രതിരോധമാർഗങ്ങൾ സ്വീകരിച്ചാണ്​ പുറത്തിറങ്ങുന്നത്​. കടകളിലടക്കം സാമൂഹിക അകലം പാലിക്കുന്നതടക്കമുള്ള കാര്യങ്ങളിൽ ​പൊലീസ്​ പരിശോധന കർശനമാണ്​. റമദാൻ 28 ആണ്​ ഇന്ന്​. മാസം കണ്ടില്ലെങ്കിൽ റമദാൻ 30ഉം പൂർത്തിയാക്കി മേയ്​ 13നായിരിക്കും ചെറിയപെരുന്നാൾ. മാസം കണ്ടാൽ 12നും. ജ്യോതിശാസ്​ത്രപരമായ കണക്കുകൾ പ്രകാരം ചെറിയ പെരുന്നാൾ (ഈദുൽ ഫിത്ർ) മേയ് 13നായിരിക്കുമെന്ന് ഖത്തർ കലണ്ടർ ഹൗസ്​ നേരത്തേ അറിയിച്ചിട്ടുണ്ട്​. മേയ് 12ന് ഹിജ്റ വർഷം 1442 റമദാനിലെ അവസാനദിനമായിരിക്കുമെന്നും മേയ് 13 ശവ്വാൽ ഒന്നായിരിക്കുമെന്നും ഖത്തർ കലണ്ടർ ഹൗസ്​ പറയുന്നു. എന്നാൽ, മാസപ്പിറവിയുമായി ബന്ധപ്പെട്ട ഔദ്യോഗിക തീരുമാനം ഔഖാഫ് മതകാര്യമന്ത്രാലയത്തിലെ മാസപ്പിറവി നിർണയ സമിതിക്കായിരിക്കും.

മേയ് 11ന് പ്രാദേശിക സമയം രാത്രി 10 ഓടെയാണ്​ ശവ്വാൽ മാസം പിറക്കുന്നത്​. അതിനാൽ വൈകുന്നേരം മാസപ്പിറവി ദൃശ്യമാകുകയില്ലെന്നും ശൈഖ് അബ്​ദുല്ല അൽ അൻസാരി കോംപ്ലക്സിലെ എക്സിക്യൂട്ടിവ് ഡയറക്ടർ എൻജി. ഫൈസൽ അൽ അൻസാരി പറയുന്നു. റമദാൻ അവസാനിക്കാറായതോടെ ഫിത്ർ സകാത്​ ശേഖരിക്കുന്ന തിരക്കിലാണ്​ അധികൃതർ. പെരുന്നാൾ ദിനങ്ങളിൽ ആരും ഭക്ഷണത്തിനായി പ്രയാസ​െപ്പടരുത്​ എന്ന ഉദ്ദേശ്യത്തിലാണ്​ എല്ലാവരിൽനിന്നും ഇതു​ ശേഖരിച്ച്​ അർഹരായവർക്ക്​ എത്തിച്ചുനൽകുന്നത്​. ഈ വർഷം ഫിത്ർ സകാത് തുക ഒരാൾക്ക് 15 റിയാലായിരിക്കുമെന്ന് ഔഖാഫിന് കീഴിലെ സകാത് ഫണ്ട് അറിയിച്ചിട്ടുണ്ട്​. വിശ്വാസികളായ സ്​ത്രീകളും പുരുഷന്മാരും കുട്ടികളും മുതിർന്നവരുമായ എല്ലാവരും സകാത് നൽകാൻ ബാധ്യസ്ഥരാണ്​. കൃത്യ സമയത്തുതന്നെ സകാത് നൽകണം.

പെരുന്നാൾ നമസ്​കാരത്തിനു മുമ്പായി സകാത് നൽകണം. എന്നാൽ, മാത്രമേ അത് അർഹരിലേക്ക് എത്തിക്കാൻ കഴിയുകയുള്ളൂവെന്നും സകാത് ഫണ്ട് വ്യക്തമാക്കി. സകാത് നൽകാൻ ആഗ്രഹിക്കുന്നവർ സകാത് കലക്ഷൻ സെൻററുകളുമായാണ്​ ബന്ധപ്പെടേണ്ടത്​.

ജനങ്ങൾ അധികമായി ഉപയോഗിക്കുന്ന ഭക്ഷ്യവസ്​തുവായ അരിയുടെ 2.5 കിലോഗ്രാമാണ് ഫിത്ർ സകാതായി എടുക്കേണ്ടതെന്നതാണ് പൊതുതത്ത്വമെങ്കിലും പണമായി നൽകാനും സാധിക്കുമെന്നും അധികൃതർ വ്യക്തമാക്കുന്നു.

അതേസമയം, ഖത്തറിലെ ആയിരത്തിലധികം പള്ളികളിലും മൈാതാനങ്ങളിലും ചെറിയ പെരുന്നാൾ നമസ്​കാരം നടക്കും. ഇവയുടെ പട്ടിക ഔഖാഫ്​ ഇസ്​ലാമിക മതകാര്യമന്ത്രാലയം പുറത്തുവിട്ടു. മന്ത്രാലയത്തിൻെറ വെബ്​സൈറ്റിലും സമൂഹമാധ്യമഅക്കൗണ്ടുകളിലും ഇവയുടെ ലൊക്കേഷൻ അടക്കമുള്ള വിവരങ്ങൾ ലഭിക്കും. പള്ളികളിലെത്തുന്നവർ എല്ലാവിധ കോവിഡ്​ പ്രതിരോധചട്ടങ്ങളും പാലിക്കണമെന്ന്​ മന്ത്രാലയം ഉണർത്തി. സ്വന്തമായി നമസ്​കാരപടങ്ങൾ കൊണ്ടുവരണം. ഹസ്​തദാനം, ആലിംഗനം തുടങ്ങിയവ ഒഴിവാക്കണം.

പെരുന്നാൾ അവധി: ആഭ്യന്തരമന്ത്രാലയം സേവനങ്ങൾ ഇങ്ങനെ

ദോഹ: പെരുന്നാൾ അവധി ദിനങ്ങളിലെ ആഭ്യന്തരമന്ത്രാലയം സേവനങ്ങളുടെ സമയക്രമം നിശ്ചയിച്ചു. അവധി ദിനങ്ങളിലും മന്ത്രാലയത്തിൻെറ സുരക്ഷവകുപ്പും ട്രാഫിക്​ ഇൻവെസ്​റ്റിഗേഷൻ വിഭാഗവും ദിവസം 24 മണിക്കൂറും പ്രവർത്തിക്കും. സേവാനാധിഷ്​ഠിത വകുപ്പുകളുടെ സമയക്രമത്തിൽ മാറ്റമുണ്ടാകും. നാഷനാലിറ്റി ആൻഡ്​​ ട്രാവൽ ഡോക്യുമെൻറ്​സ്​, പാസ്​പോർട്​സ്​, ട്രാഫിക്​ ആൻഡ്​​ ഫിംഗർ പ്രിൻറ്​ തുടങ്ങിയ ഇത്തരം വകുപ്പുകൾ രാവിലെ എട്ടുമുതൽ ഉച്ചക്ക്​ 12 വരെ പ്രവർത്തിക്കും.

ഫാഹിസ്​ കേന്ദ്രങ്ങളുടെ പ്രവർത്തനം
വാഹനങ്ങളുടെ സാ​ങ്കേതികപരിശോധനകേന്ദ്രങ്ങളായ വുഖൂദ്​ വെഹിക്കിൾസ്​ ഇൻസ്​പെക്​ഷൻ അഥവാ ഫാഹിസ്​ കേന്ദ്രങ്ങളുടെ പ്രവർത്തനം പെരുന്നാൾ അവധിദിനങ്ങളിൽ പുനഃക്രമീകരിച്ചിട്ടുണ്ട്​. ഫാഹിസ്​ കേന്ദ്രങ്ങൾക്ക്​ മേയ്​ ഒമ്പതുമുതൽ 18 വരെയാണ്​ അവധി. എന്നാൽ, ജനങ്ങൾക്കുള്ള സേവനം മുടങ്ങാതിരിക്കാനായി മസ്​റൂഅ, വക്​റ എന്നിവിടങ്ങളിലെ ഫാഹിസ്​ കേന്ദ്രങ്ങൾ തുറന്നുപ്രവർത്തിക്കും. മേയ്​ ഒമ്പതുമുതൽ റമദാൻ അവസാനം വരെ രാവിലെ എട്ടുമുതൽ ഉച്ചക്ക്​ 12 വരെയായിരിക്കും ഇത്​. ഇവ മേയ്​ 16 മുതൽ 18 വരെ രാവിലെ എട്ട്​ മുതൽ ഉച്ചക്ക്​​ 12 വരെയും പ്രവർത്തിക്കും. 11.45ന്​ ഈ കേന്ദ്രങ്ങളുടെ ഗേറ്റ്​ അടക്കും. അതിനു​ മുമ്പ്​ എത്തുന്നവർക്ക്​ മാത്രമേ സേവനങ്ങൾ ലഭിക്കൂ.