ഉപരാഷ്​ട്രപതിക്കൊപ്പം 35 അംഗ വ്യാപാര പ്രതിനിധി സംഘവും

ദോഹ: വിവിധ വ്യാപാര, ​വ്യവസായ പ്രതിനിധികളുടെ 35 അംഗ സംഘവും ഉപരാഷ്ട്രപതി വെങ്കയ്യ നായിഡുവിനെ അനുഗമിച്ച്​ ഖത്തറിലെത്തിയിട്ടുണ്ട്​. ഇരു രാജ്യങ്ങളും തമ്മിലെ വിവിധ വ്യാപാര മേഖലകളിലെ സഹകരണകരാറുകൾ ചർച്ച ചെയ്യുന്നതിന്‍റെയും ഒപ്പുവെക്കുന്നതിന്‍റെയും ഭാഗമായാണ്​ ​ ഉന്നത വ്യാപാര സംഘത്തിന്‍റെ വരവ്​. ഫെഡറേഷൻ ഓഫ്​ ഇന്ത്യൻ ചേംബർ ഓഫ്​ കോമേഴ്​സ്​ ആൻഡ്​ ഇൻഡസ്​ട്രി, അസോചം, സി.എ.ഐ തുടങ്ങി വിവിധ വ്യാപാര -വ്യവസായ സംഘടന പ്രതിനിധികളായി 35 പേരാണ്​ സംഘത്തിലുള്ളത്​.

ഇന്ത്യയിൽ നിന്നുള്ളവരും, ഖത്തറിലെ ഇന്ത്യൻ ബിസിനസുകാരും, ഖത്തർ ബിസിനസ്​ പ്രമുഖരും പ​ങ്കെടുക്കുന്ന ബിസിനസ്​ ഫോറത്തിന്​ ഞായറാഴ്ച ഷെറാട്ടൺ ഹോട്ടൽ വേദിയാവും.

പരിപാടിയിൽ ഉപരാഷ്ട്രപതിയും പ​ങ്കെടുക്കും. ഖത്തര്‍ ചേംബര്‍ ഓഫ് കോമേഴ്‌സ് ചെയർമാൻ ശൈഖ്​ ഖലീഫ ബിൻ ജാസിം ആൽഥാനി, ഖത്തർ ബിസിനസ്​ അസോസിയേഷൻ ചെയർമാൻ ശൈഖ്​ ഫൈസൽ ബിൻ ഖാസിം ആൽഥാനി എന്നിവർ ഉള്‍പ്പെടെ ഉന്നതരും ഫോറത്തില്‍ ​പ​ങ്കെടുക്കുമെന്ന്​ അംബാസഡർ ഡോ. ദീപക് മിത്തല്‍ പറഞ്ഞു. ഖത്തര്‍ വാണിജ്യ-വ്യവസായ മന്ത്രി ഉൾപ്പെടെയുള്ള പ്രതിനിധികളും പ​​ങ്കെടുക്കും. 30ലേറെ പേരുടെ ഖത്തർ വ്യാപാര, വ്യവസായ പ്രതിനിധികളും പ​ങ്കെടുക്കുന്നുണ്ട്​. ഇന്ത്യ, ഖത്തർ തമ്മിലെ പുതു വ്യവസായ സാധ്യതകൾ കൂടിക്കാഴ്ചയിൽ ചർച്ച ചെയ്യപ്പെടും. വിവിധ മേഖലകളിലെ സഹകരണ കരാറുകൾക്കും ഫോറം വേദിയൊരുക്കുമെന്നാണ്​ പ്രതീക്ഷ.

കഴിഞ്ഞ വര്‍ഷങ്ങളിലായി ഖത്തറും ഇന്ത്യയും തമ്മില്‍ ഊര്‍ജം, വ്യാപാരം, വാണിജ്യം, ആരോഗ്യം തുടങ്ങിയ മേഖലകളിലെ സഹകരണം കൂടുതല്‍ ശക്തമാണെന്നും സ്ഥാനപതി വ്യക്തമാക്കി. ആരോഗ്യ സഹമന്ത്രി ഡോ. ഭാരതി പ്രവീണ്‍ പവാര്‍ ഖത്തർ ആരോഗ്യ മന്ത്രാലയം പ്രതിനിധികളുമായി കൂടിക്കാഴ്ച നടത്തുന്നുണ്ട്​.