ന​വീ​ക​രി​ച്ച കാ​ൻ​സ​ർ ഡേ ​കെ​യ​ർ യൂ​നി​റ്റ്​ പ്ര​വ​ർ​ത്ത​നം തു​ട​ങ്ങി

ദോഹ: ദേശീയ കാൻസർ കെയർ ആൻഡ്​​ റിസർച്​ സെൻററിലെ (എൻ.സി.സി.സി.ആർ) നവീകരിച്ച ഡേ കെയർ യൂനിറ്റ്​ പ്രവർത്തനം തുടങ്ങി. പൊതുജനാരോഗ്യമന്ത്രി ഡോ. ഹനാൻ മുഹമ്മദ്​ അൽ കുവാരിയാണ്​ ഉദ്​ഘാടനം ചെയ്​തത്​. കോവിഡ്​ പ്രതിസന്ധിക്കിടയിലും രാജ്യത്തിൻെറ മറ്റ്​ ആരോഗ്യമേഖലകളിൽ ഒരുതരത്തിലുള്ള ശ്രദ്ധക്കുറവും വരുത്തിയിരുന്നി​െല്ലന്ന്​ മന്ത്രി പറഞ്ഞു.

ഇതിനുള്ള മികച്ച ഉദാഹരണമാണ്​ നവീകരിച്ച കാൻസർ ഡേ കെയർ സെൻറർ. 16 കിടക്കകളിൽനിന്ന്​ 52 കിടക്കകളായാണ്​ സൗകര്യം വർധിപ്പിച്ചിരിക്കുന്നത്​. കോവിഡ്​ സാഹചര്യത്തിലും മറ്റ്​ മേഖലകളിൽ കൂടുതൽ ശ്രദ്ധചെലുത്തിയിരുന്നു എന്നതിൻെറ തെളിവാണിത്​. എല്ലാവർക്കും ഉന്നത ഗുണനിലവാരമുള്ള ചികിത്സ നൽകുക എന്നതാണ്​ രാജ്യത്തിൻെറ ലക്ഷ്യം. വിദഗ്​ധ പരിചരണമാണ്​ ഡേ കെയർ സെൻററിൽ ലഭിക്കുക​. ഉദ്​ഘാടനത്തിനെത്തിയ മന്ത്രി എൻ.സി.സി.സി.ആർ അർജൻറ്​ കെയർ യൂനിറ്റും ഔട്ട്​പേഷ്യൻറ്​ വിഭാഗവും സന്ദർശിച്ചു.