അനിശ്ചിതത്വത്തി​െൻറ പകൽ

ദോഹ: മണിക്കൂറുകൾ മാത്രമായിരുന്നു അനിശ്ചിതത്വമെങ്കിലും നാട്ടിലും ഇവിടെയുമുള്ള ഖത്തർ പ്രവാസികളുടെ മനസ്സിൽ തീക്കോരിയിട്ട പകലായിരുന്നു കഴിഞ്ഞത്​. ഒട്ടുമിക്ക ഗൾഫ്​ രാജ്യങ്ങളും ഇന്ത്യയിലേക്കുള്ള വ്യോമഗതാഗതത്തിന്​ വിലക്കേർപ്പെടുത്തിയപ്പോൾ ഇരുകൈകളും നീട്ടി സ്വീകരിച്ച രാജ്യമാണ്​ ഖത്തർ. ആർ.ടി.പി.സി.ആർ ടെസ്​റ്റും 10 ദിവസ നിർബന്ധ ക്വാറൻറീനും പാലിച്ചാൽ ആർക്കും നാട്ടിലേക്ക്​ പോയി തിരിച്ചുവരാം. ക്വാറൻറീൻ എന്ന ദുരിതകാലം താണ്ടിയാലും തടസ്സങ്ങളില്ലാത്ത യാത്ര ഉറപ്പാണെന്നതായിരുന്നു മറ്റു ജി.സി.സികളിൽനിന്ന്​ വ്യത്യസ്​തമായി ഖത്തർ പ്രവാസികൾക്ക്​ ആശ്വാസമായതും. എന്നാൽ, ഈ വിശ്വാസങ്ങളിലേക്ക്​ തീക്കോരിട്ട മണിക്കൂറുകളായിരുന്നു ബുധനാഴ്​ച അർധരാത്രിക്കും വ്യാഴാഴ്​ച വൈകുന്നേരത്തിനുമിടയിൽ സംഭവിച്ചത്​.

ഇന്ത്യ- ഖത്തർ എയർ ബബ്​ൾ കരാർ പുതുക്കുന്നതിൽ കാലതാമസം നേരിട്ടതോടെ നാട്ടിലേക്കും തിരിച്ചും പറക്കാൻ ഷെഡ്യൂൾ ചെയ്​ത വിമാനക്കമ്പനികൾ തുടർച്ചയായി യാത്രാസമയം മാറ്റിക്കൊണ്ടിരുന്നു. ഒടുവിൽ എയർ ഇന്ത്യയും ഇൻഡിഗോ എയർലൈൻസും ഷെഡ്യൂൾ കാൻസൽ ചെയ്യാൻ തീരുമാനിക്കുകയും ചെയ്​തതോടെ ആശങ്കകൾ ഉച്ചസ്​ഥായിയിലായി.

ടെൻഷൻ, പിന്നെ ആശ്വാസം

ദോഹയിൽനിന്ന്​ രാവിലെ 7.30 കണ്ണൂരിലേക്ക്​ പറക്കാനിരുന്ന ഇൻഡിഗോ എയർലൈനിലെ യാത്രക്കാരനായിരുന്നു കണ്ണൂർ ജില്ല ആശുപത്രിക്കുസമീപം താമസിക്കുന്ന റിയാസ്​. അവധിക്ക്​ നാട്ടിൽ പോകാൻ നേരത്തെ ടി​ക്കറ്റെടുത്ത ഇദ്ദേഹം, ബുധനാഴ്​ചതന്നെ കോവിഡ്​ ആർ.ടി.പി.സി.ആർ ടെസ്​റ്റ്​ പൂർത്തിയാക്കി നെഗറ്റിവ്​ സർട്ടിഫിക്കറ്റുമായി തയാറായി. ഇതിനിടെയാണ്​ ബുധനാഴ്​ച അർധരാത്രിയോടെ യാത്രാ​​സമയം 10.30ലേക്ക്​ മാറ്റിയതായി വിമാനക്കമ്പനിയുടെ അറിയിപ്പ്​ മെയിൽ വഴിയും ഫോൺ വഴിയുമെത്തുന്നത്​. വ്യാഴാഴ്​ച രാവിലെ യാത്രക്കുള്ള ഒരുക്കങ്ങൾക്കിടെ അടുത്ത ​സന്ദേശമെത്തി. വിമാനം പുറപ്പെടുന്ന സമയം വൈകീട്ട്​ നാലിലേക്ക്​ മാറ്റിയിരിക്കുന്നുവെന്ന്​. ശേഷം ഇൻഡിഗോ ഓഫിസിലെത്തിയപ്പോൾ അറിയുന്നത്​ വിമാനം റദ്ദാക്കിയെന്ന്​.

വ്യാഴാഴ്​ച പകലിൽ റിയാസി​െൻറ മാത്രം അവസ്​ഥയല്ല ഇത്​. വീടണയാനായി നാളുകൾ എണ്ണി കാത്തിരിക്കവെ, അപ്രതീക്ഷിതമായി യാത്ര മുടങ്ങി നിരാശയിലായ ഇരുനൂറോളം മലയാളിയാത്രക്കാരുടെ സ്​ഥിതി ഇതായിരുന്നു. ഭാര്യയും മക്കളുമായി കുടുംബസമേതം പുറപ്പെട്ട്​, യാത്ര മുടങ്ങിയവരുമുണ്ട്​ കൂട്ടത്തിൽ. നാലും അഞ്ചും പേരുള്ള യാത്രാസംഘം 1500 റിയാ​ൽ വരെ മുടക്കി ആർ.ടി.പി.സിആർ ടെസ്​റ്റ്​ ചെയ്​താണ്​ നാട്ടിലേക്ക്​ മടങ്ങാൻ ഒരുങ്ങിയത്​.

ഇതിനിടയിലായിരുന്നു അപ്രതീക്ഷിതമായ തടസ്സങ്ങൾ. തുടർന്ന്​, വിമാനക്കമ്പനി ഓഫിസിലും ഇന്ത്യൻ എംബസിയിലും മാധ്യമ ഓഫിസുകളിലും ആശങ്കയോടെ നിരന്തരം ബന്ധപ്പെട്ടു. ഇന്ത്യൻ എംബസി ഓഫിസുകളിൽ നിരന്തര ബന്ധപ്പെടു​േമ്പാഴും ആശങ്ക പരിഹരിക്കാൻ ശ്രമംനടക്കുന്നു, വൈകാതെ നല്ലവാർത്ത എത്തും എന്നായിരുന്നു മറുപടികൾ.

ഒടുവിൽ ഉച്ച ര​േണ്ടാടെ ആശ്വാസവാർത്തയെത്തി. ഇന്ത്യ-ഖത്തർ എയർ ബബ്​ൾ കരാർ പുനഃസ്​ഥാപിച്ചു, വിമാന സർവിസ്​ പതിവ്​ ഷെഡ്യൂൾ പ്രകാരം പുനരാരംഭിക്കുമെന്നാണ്​ അറിയിപ്പ്​.എന്നാൽ, വ്യാഴാഴ്​ച രാവിലെ പുറപ്പെടാനിരുന്ന വിമാനങ്ങൾ ജൂ​ൈല​ മൂന്നിന്​ പുലർച്ചയിലേക്കാണ്​ റീ ഷെഡ്യൂൾ ചെയ്​തത്​. ഇവർക്കെല്ലാം ആർ.പി.സി.ആർ ടെസ്​റ്റ്​ വീണ്ടും നടത്തേണ്ട അവസ്​ഥയിലാണ്​.

കണ്ണൂരിലേക്കുള്ള ഇൻഡിഗോ എയർലൈൻ യാത്ര റദ്ദാക്കിയതോടെ, വ്യാഴാഴ്​ച കണ്ണൂരിൽനിന്ന്​ തിരിച്ച്​ ദോഹയിലേക്കുള്ള സർവിസും മുടങ്ങി. ഖത്തറിൽ ഹോട്ടൽ ക്വാറ​ൻറീ​ൻ ബുക്​ചെയ്​ത്​ യാത്രക്കൊരുങ്ങിയവരാണ്​ ഇവർ. വിമാനം റദ്ദായാൽ ക്വാറൻറീ​ൻ തീയതി ​െചലവില്ലാതെതന്നെ പുതുക്കാമെന്നാണ്​ 'ഡിസ്​കവർ ഖത്തർ' നിയമമെങ്കിലും മുകയ്നിസ്​ ഉൾപ്പെടെയുള്ളവ തിരഞ്ഞെടുത്തവർക്ക്​ തിരിച്ചടിയാവും. നിലവിൽ ഈ മാസം 23വരെ മുകയ്​നിസുകളിൽ ഒഴിവില്ലെന്നാണ്​ റിപ്പോർട്ട്​. അതേസമയം, ഹോട്ടൽ ക്വാറ​ൻറീ​ൻ തിരഞ്ഞെടുത്തവർക്ക്​ പ്രയാസമുണ്ടാവില്ല.

എന്താണ്​ സംഭവിച്ചത്​?

കോവിഡ്​ വ്യാപനം മുതൽ ഡയറക്​ടർ ജനറൽ ഓഫ്​ സിവിൽ ഏവിയേഷൻ (ഡി.ജി.സി.എ) ഇന്ത്യയിൽനിന്ന്​ വിദേശരാജ്യങ്ങളിലേക്കുള്ള അന്താരാഷ്​ട്ര യാത്രാവിമാന സർവിസ്​ വിലക്കിയിരിക്കുകയാണ്​. ജൂൺ 30വരെ വിലക്ക്​ തുടരമെന്നാണ്​ മേയി​ലെ ഡി.ജി.സി.എ സർക്കുലറിലെ ഉത്തരവ്​. കഴിഞ്ഞ അർധരാത്രിയിൽ അവസാനിക്കുന്ന ഈ വിലക്ക്​ ജൂലൈ​ 31വരെ നീട്ടിക്കൊണ്ടുള്ള അറിയിപ്പ്​ ബുധനാഴ്​ച രാത്രി മാത്രമാണ്​ പുറത്തുവന്നത്​. ​എന്നാൽ, ഇതിനിടയിൽ ഖത്തർ ഉൾ​െപ്പടെ യാത്രാ ഇളവുള്ള രാജ്യങ്ങളിലേക്ക്​ സർവിസ്​ നടത്തുന്നതുമായി ബന്ധപ്പെട്ട എയർബബ്​ൾ കരാർ പുതുക്കുന്നതിൽ കാലതാമസമുണ്ടായി.

കരാർ കാലാവധി കഴിഞ്ഞതോടെ കഴിഞ്ഞ അർധരാത്രി മുതൽ ഇരുരാജ്യങ്ങൾക്കുമിടയിലെ വിമാനയാത്ര തടസ്സപ്പെടുകയും ചെയ്​തു. പുലർച്ചെ മുതൽ ഇൻഡിഗോ, എയർ ഇന്ത്യ എന്നിവയുടെ സർവിസ്​ മുടങ്ങിയതോടെ ഉണർന്ന അധികൃതർ പിന്നീട്​ തിരക്കിട്ട ചർച്ചകളിലൂ​െട ഉച്ചയോടെ പ്രശ്​നങ്ങൾക്ക്​ പരിഹാരം കാണുകയായിരുന്നു.

'ചുരുങ്ങിയ സമയത്തേക്കാണ്​ ഇന്ത്യക്കും ഖത്തറിനുമിടയിലെ വിമാനയാത്ര മുടങ്ങിയതെങ്കിലും യാത്രക്കാർക്ക്​ ആശങ്കയുടെ മണിക്കൂറുകളായിരുന്നു അത്​. ദോഹയിൽനിന്ന്​ ഇൻഡിഗോയുടെ ബംഗളൂരു, കണ്ണൂർ, ഹൈദരാബാദ്​ സർവിസുകളും വ്യാഴാഴ്​ച ഇതേ നഗരങ്ങളിൽനിന്ന്​ ദോഹയിലേക്കുള്ള സർവിസുകളും മുടങ്ങി. എന്നാൽ, എയർ ഇന്ത്യ എക്​സ്​പ്രസി​െൻറ കണ്ണൂർ, മംഗളൂരു, കൊച്ചി സർവിസുകൾ വൈകിയാണെങ്കിലും ഇന്നലെതന്നെ പുറപ്പെട്ടത്​ യാത്രക്കാർക്ക്​ ആശ്വാസകരമാണ്​.

ഡിസ്​കവർ ഖത്തർ നിയമപ്രകാരം വിമാനം കാൻസലായാൽ ക്വാറൻറീ​ൻ തീയതി പുതുക്കി നൽകുമെങ്കിലും മുകയ്​നിസ്​ തിരഞ്ഞെടുത്തവർക്ക്​ റൂം ലഭ്യത പ്രയാസകരമാവും. നിലവിൽ ഈ മാസം 23 വരെ മുകയ്​നിസുകൾ ഒഴിവില്ല. ചുരുങ്ങിയ മണിക്കൂറുകളാണ്​ വിമാനം മുടങ്ങിയതെങ്കിലും വരുംദിവസങ്ങളിൽ യാത്രചെയ്യേണ്ടവരും പരിഭ്രാന്തരായിരുന്നു. എന്നാൽ, എയർബബ്​ൾ കരാർ പുതുക്കിയതോടെ ഈ ആശങ്കക്ക്​ വകയില്ല'