ഇന്ന്​ മുതൽ ടെന്നിസ്​ അങ്കം

​​ദോഹ: വിശ്വ ഫുട്​ബാളിനെ വരവേൽക്കാനൊരുങ്ങുന്ന ഖത്തറിന്‍റെ മണ്ണ്​ ടെന്നിസ്​ ആവേശത്തിലേക്ക്​. രാജ്യാന്തരതലത്തിലെ സൂപ്പർതാരങ്ങൾ മാറ്റുരക്കുന്ന എക്​സോൺ ഖത്തർ ഓപൺ ചാമ്പ്യൻഷിപ്പിന്​ ​തിങ്കളാഴ്ച ഖലീഫ ഇന്‍റർനാഷനൽ ടെന്നിസ്​ കോപ്ലക്സിൽ കോർട്ടുണരും.

മാറ്റുരക്കുന്ന താരങ്ങളുടെ സീഡ്​ ​കഴിഞ്ഞദിവസം പ്രഖ്യാപിച്ചു. എ.ടി.പി റാങ്കിങ്ങിൽ 12ാം സ്ഥാനത്തുള്ള കാനഡയുടെ ഡെനിസ്​ ഷ​പലോവാണ്​ ടോപ്​ സീഡ്​. സ്​പെയിനിന്‍റെ റോബർടോ ബൗറ്റിസ്റ്റ, ജോർജിയയുടെ നികോളോസ്​ ബസിലാഷിവി, മുൻ യു.എസ്​ ഓപൺ ചാമ്പ്യൻ ക്രൊയേഷ്യയുടെ മരിൻ സിലിച്​, ബ്രിട്ടന്‍റെ ഡാൻ ഇവാൻസ്​ എന്നിവരാണ്​ ടോപ്​ സീഡിലുള്ള മറ്റ്​ താരങ്ങൾ. ഇവർക്ക്​ പുറമെ, ബ്രിട്ടന്‍റെ സൂപ്പർതാരം ആൻഡി മറെയും ഖത്തറിന്‍റെ കോർട്ടിലിറങ്ങുന്നുണ്ട്​. നിലവിലെ ചാമ്പ്യൻകൂടിയാണ്​ ജോർജിയയു​ടെ നികോളോസ്​ ബസിലാഷിവി. അതേസമയം, ക്വാർട്ടർ ഫൈനലിസ്റ്റാണ്​ ​ഒന്നാം സീഡ്​ ഡെനിസ്​ ഷപലോവ്​.

എ.ടി.പി ടൂർ 250 സീരീസിന്‍റെ ഭാഗമായ ഖത്തർ ഓപണിന്‍റെ 30ാം എഡിഷനാണ്​ ദോഹ വേദിയാവുന്നത്​. 11 ലക്ഷം ഡോളറാണ്​ സമ്മാനത്തുക. 22കാരനായ ഷപലോവ്​ ആദ്യറൗണ്ടിൽ ബൈ നേടി. അലക്സ്​ മോൾകാൻ-ഫിലിപ്​ ക്രജിനോവിച്​ മത്സരത്തിലെ വിജയികളാവും രണ്ടാം റൗണ്ടിൽ ഷപലോവിന്‍റെ എതിരാളികൾ. ബസിലാഷിവി, മരിൻ സിലിച്​, ബൗറ്റിസ്റ്റ എന്നിവരും ഒന്നാം റൗണ്ടിൽനിന്നും ബൈ നേടി. ആൻഡി മറെ ജപ്പാന്‍റെ ടറോ ഡനിയേലിനെ ഒന്നാം റൗണ്ടിൽ നേരിടും.