സിറിയൻ പ്രതിസന്ധി; യു.എസ് പ്രതിനിധിയുമായി കൂടിക്കാഴ്ച നടത്തി

ദോഹ: സിറിയൻ പ്രതിസന്ധിയും പ്രാദേശിക സാഹചര്യങ്ങളും ചർച്ച ചെയ്ത് ഖത്തർ വിദേശകാര്യ സഹമന്ത്രി ഡോ. മുഹമ്മദ് ബിൻ അബ്ദുൽ അസീസ് ബിൻ സാലിഹ് അൽ ഖുലൈഫി, സിറിയക്കായുള്ള യു.എസ് പ്രത്യേക പ്രതിനിധി ടോം ബാരാക്കുമായി ദോഹയിൽ കൂടിക്കാഴ്ച നടത്തി.

സിറിയയിലെയും ലെബനാനിലെയും നിലവിലെ രാഷ്ട്രീയ -സുരക്ഷാ സാഹചര്യങ്ങളും ഏറ്റവും പുതിയ സംഭവവികാസങ്ങളും ഇരുനേതാക്കളും വിലയിരുത്തി. മേഖലയിലെ സംഘർഷങ്ങൾ ലഘൂകരിക്കുന്നതിനും സമാധാനം പുനഃസ്ഥാപിക്കുന്നതിനുമുള്ള നയതന്ത്ര ശ്രമങ്ങൾ കൂടിക്കാഴ്ചയിൽ പ്രധാന വിഷയമായി. സിറിയയുടെ പരമാധികാരവും പ്രാദേശിക അഖണ്ഡതയും സംരക്ഷിക്കുന്നതിന് ഖത്തറിന്റെ പൂർണ്ണ പിന്തുണ ഡോ. മുഹമ്മദ് ബിൻ അബ്ദുൽ അസീസ് ബിൻ സാലിഹ് അൽ ഖുലൈഫി ആവർത്തിച്ചു.