സുഡാന് മേലുള്ള എല്ലാ സാമ്പത്തിക നിയന്ത്രണങ്ങളും നീക്കണമെന്ന് ഖത്തർ

ദോഹ: സുഡാന് മേലുള്ള എല്ലാ സാമ്പത്തിക നിയന്ത്രണങ്ങളും നീക്കണമെന്ന് ഖത്തർ ആവശ്യപ്പെട്ടു. രാഷ്​ട്രത്തി​​െൻറ വികസനത്തിനും ജനങ്ങളുടെ ജീവിത മുന്നേറ്റത്തിനും സുഡാന് മേലുള്ള നിയന്ത്രണങ്ങൾ നീക്കേണ്ടത് അനിവാര്യമാണ്​. ഭീകരവാദത്തെ സ്​പോൺസർ ചെയ്യുന്ന രാഷ്​ട്രങ്ങളുടെ പട്ടികയിൽ നിന്നും സുഡാനെ നീക്കം ചെയ്യണമെന്നും ഖത്തർ ആവശ്യപ്പെട്ടു. രാജ്യത്ത്​ സ്​ഥിരതയും സുരക്ഷയും സമാധാനവും വികസനവും സാധ്യമാക്കുന്നതിലേക്ക് നയിക്കുന്ന സുഡാൻ സർക്കാറി​​െൻറ എല്ലാ ശ്രമങ്ങളെയും സ്വാഗതം ചെയ്യുന്നു. ഖത്തറിനുവേണ്ടി ജനീവയിലെ ഖത്തർ മിഷൻ സെക്കൻഡ്​​ സെക്രട്ടറി അബ്​ദുല്ല അൽ സുവൈദിയാണ് ഇക്കാര്യങ്ങൾ വ്യക്തമാക്കിയത്. 

സുഡാൻ ജനതയുടെ മനുഷ്യാവകാശങ്ങളെ സംരക്ഷിക്കുന്നതിനും ഉയർത്തിപ്പിടിക്കുന്നതിനുമുള്ള എല്ലാ ശ്രമങ്ങളെയും ഖത്തർ പ്രതിബദ്ധതയോടെ നോക്കിക്കാണുന്നു. സുസ്​ഥിരമായ സമാധാനവും വികസനവും സുഡാൻ ജനത അർഹിക്കുന്നുവെന്നും അൽ സുവൈദി പറഞ്ഞു. സുഡാനിൽ മനുഷ്യാവകാശ ഹൈകമീഷണർ ഓഫിസ്​ പ്രവർത്തനമാരംഭിക്കുന്നതുമായി ബന്ധപ്പെട്ട് വിവരങ്ങൾ മുന്നോട്ടുവെച്ച ഹ്യൂമൻ റൈറ്റ്സ്​ ഹൈകമീഷണർ ഓഫിസിനും സുഡാൻ സർക്കാറിനും ഖത്തർ നന്ദി അറിയിക്കുന്നുവെന്നും അദ്ദേഹം വ്യക്തമാക്കി.മനുഷ്യാവകാശ ഹൈകമീഷണർ ഓഫിസും സുഡാൻ സർക്കാറും തമ്മിലുള്ള സഹകരണം ശ്ലാഘനീയമാണെന്നും സുഡാനിലെ മനുഷ്യാവകാശ മേഖലയിൽ ഇത് നിർണായക സ്വാധീനം ചെലുത്തുമെന്നും അൽ സുവൈദി പറഞ്ഞു.