ഗൾഫ്​ യാത്രക്കാർക്കുള്ള വിലക്ക്​ തീരുമാനം മാറ്റി ശ്രീലങ്ക

ദോഹ: ഗൾഫ്​ യാത്രക്കാർക്ക്​ വിലക്കു പ്രഖ്യാപിച്ച്​ 24 മണിക്കൂറിനുള്ളിൽ ചുവടുമാറ്റി ശ്രീലങ്ക. ഖത്തർ ഉൾപ്പെടെയുള്ള ഗൾഫ്​ രാജ്യങ്ങളിൽനിന്നുള്ളവർക്ക്​ ജൂ​െ​െല​ ഒന്നു മുതൽ 13 വരെ രാജ്യത്തേക്ക്​ പ്രവേശനാനുമതിയില്ലെന്ന്​ പ്രഖ്യാപിച്ച ലങ്ക, ബുധനാഴ്​ച തീരുമാനം മാറ്റി.

ചില നിയന്ത്രണങ്ങളോടെ ഇവർക്ക്​ രാജ്യത്ത്​ പ്രവേശിക്കാമെന്നാണ്​ ​ശ്രീലങ്കൻ വ്യോമയാന മന്ത്രാലയത്തിൻെറ പുതിയ അറിയിപ്പ്​. യാത്രക്ക് 96 മണിക്കൂറിനുള്ളിലുള്ള ആർ.ടി.പി.സി.ആർ നെഗറ്റിവ്​ പരിശോധനാ ഫലം, നിർബന്ധിത ഹോട്ടൽ ക്വാറൻറീ​ൻ എന്നിവക്ക്​ വിധേയമായി രാജ്യ​ത്ത്​ പ്രവേശിക്കാം. ഖത്തറിനു പുറമെ, ഒമാൻ, ബഹ്​റൈൻ, യു.എ.ഇ, സൗദി അറേബ്യ, കുവൈത്ത്​ എന്നീ ഗൾഫ്​ രാജ്യങ്ങൾക്കാണ്​ പുതിയ നിയന്ത്രണം.

ഈ മേഖലയിൽനിന്നുള്ള യാത്രക്കാരിൽ കോവിഡ്​ കേസുകൾ ​കൂടുന്ന സാഹചര്യത്തിലാണ്​ നിയന്ത്രണമെന്ന്​ സർക്കാർ വക്​താവ്​ അറിയിച്ചു. തിങ്കളാഴ്​ച ഇത്തരത്തിൽ 110 പോസിറ്റിവ്​ കേസ്​ റിപ്പോർട്ട്​ ചെയ്​തതായി ശ്രീലങ്കൻ വാർത്ത വിനിമയ മന്ത്രി കെഹ്​ലിയ റാംബുകേല അറിയിച്ചു. ജൂലൈ​ ഒന്നു​ മുതൽ 13ന്​ അർധരാത്രി വരെയാണ്​ നിയന്ത്രണം പ്രഖ്യാപിച്ചത്​.