പ്രതിഭകൾക്ക്​ അഭിനന്ദനങ്ങൾ

ദോഹ: എബ്രഹാം ലിങ്കൺ മുതൽ പ്രസംഗകലയിലെ ഭീഷ്​മർ ​സാക്ഷാൽ പനമ്പള്ളി ഗോവിന്ദമേനോനും സുകുമാർ അഴീക്കോടും വരെയുള്ള പ്രതിഭകൾ ഇവിടെ ഒളിഞ്ഞിരിപ്പുണ്ടെന്ന്​ പറഞ്ഞാൽ അതി​ശയോക്​തി ആയേക്കാം. പക്ഷേ, ഈ തലമുറയെ തള്ളിക്കളയാനാവില്ല. ഇവർ ഭാവി ഖത്തറിൻെറയും കേരളത്തിൻെറയും വാഗ്​ദാനങ്ങളാണ്​. പ്രസംഗം എന്നത്​ വെറും വാചകക്കസർത്തുകളും ബഹളങ്ങളുമല്ല, അതിനപ്പുറം അറിവിൻെറയും അവതരണത്തിൻെറയും സൗന്ദര്യം കൂടിയാണെന്ന്​ തെളിയിക്കുന്നതായിരുന്നു ഗൾഫ്​ മാധ്യമം 'സ്​പീക്കപ്​ ഖത്തർ' ഫൈനൽ പോരാട്ടം.

വിഷയ വൈവിധ്യവും അവതരണത്തിലെ മികവും ഭാഷാ നൈപുണ്യവും കൊണ്ട്​ കുട്ടികൾ വിധികർത്താക്കളെയും ഓൺലൈൻ വഴി ലോകത്തിൻെറ വിവിധ കോണിൽനിന്നും കാണികളായെത്തിയ​വരെയും വിസ്​മയിപ്പിച്ചു. നാലു മിനിറ്റ്​ സമയം കൊണ്ട്​ ഏറ്റവും മനോഹരമായും ചുരുങ്ങിയ വാക്കുകൾകൊണ്ടും വിഷയം അവതരിപ്പിക്കുന്നതിൽ വിദ്യാർഥി പ്രതിഭകൾ മത്സരിച്ചു. വെള്ളിയാഴ്​ച ഉച്ച കഴിഞ്ഞാണ്​ മത്സരങ്ങൾ ആരംഭിച്ചത്​. ആദ്യം, ജൂനിയർ-സീനിയർ വിഭാഗം മലയാളം മത്സരങ്ങളായിരുന്നു നടന്നത്​. ​ദോഹ പേൾ മോഡേൺ സ്​കൂളിൽ ഒരുക്കിയ വേദിയിൽ വിദ്യാർഥികൾ അണിനിരന്ന്​ തങ്ങളുടെ ഉൗഴം അനുസരിച്ച്​ പ്രസംഗിച്ചപ്പോൾ, കേരളത്തിലിരുന്ന്​ വിധികർത്താക്കൾ മത്സരം വീക്ഷിച്ചു.

മലയാള വിഭാഗത്തിൽ പൊതുവിദ്യാഭ്യാസ വകുപ്പ്​ പ്രിൻസിപ്പൽ സെക്രട്ടറി എ.പി.എം. മുഹമ്മദ്​ ഹനീഷ്​ ഐ.എ.എസ്​, എഴുത്തുകാരനും സാംസ്​കാരിക പ്രവർത്തകനുമായ കെ.ഇ.എൻ. കുഞ്ഞഹമ്മദ്​, 'മീഡിയവൺ' ചാനൽ അസി. എക്​സിക്യൂട്ടിവ്​ എഡിറ്റർ അഭിലാഷ്​ മോഹനൻ എന്നിവർ വിധികർത്താക്കളായി. തുടർന്നായിരുന്നു ഇംഗ്ലീഷ്​ വിഭാഗം മത്സരം നടന്നത്​. എ.പി.എം. മുഹമ്മദ്​ ഹനീഷിനൊപ്പം മുൻ പാർലമെൻറംഗവും മുതിർന്ന അഭിഭാഷകനുമായ ഡോ. സെബാസ്​റ്റ്യൻ പോൾ, 'മാധ്യമം' അസോസിയറ്റ്​ എഡിറ്റർ ഡോ. യാസീൻ അഷ്​റഫ്​ എന്നിവർ മത്സരം നിയന്ത്രിച്ചു. മതനിരപേക്ഷ ഇന്ത്യയുടെ ഭാവി, ലോകകപ്പ്​ അറബ്​ മണ്ണിൽ, മാതാപിതാക്കൾ, സാമൂഹിക സൗഹാർദം, എ.പി.ജെ. അബ്​ദുൽ കലാം, വായനയുടെ പ്രാധാന്യം തുടങ്ങി വിവിധ വിഷങ്ങളിൽ മത്സരം നടന്നു.

മഞ്​ജു മനോജ്​ പരിപാടിയുടെ അവതാരകയായി. എജ്യുവേറിൻെറ നേതൃത്വത്തിൽ മികവുറ്റ സ​ാ​ങ്കേതിക സംവിധാനത്തോടെയായിരുന്നു മത്സരം 'ഗൾഫ്​ മാധ്യമം ഖത്തർ' ഫേസ്​ബുക്ക്​​ പേജ്​ വഴി തത്സമയം സംപ്രേഷണം ചെയ്​തത്​. മത്സരശേഷം, വിവിധ വിഭാഗങ്ങളിൽ വിജയികളായവർക്ക്​ മെഡലുകളും സമ്മാനങ്ങളും വിതരണം ചെയ്​തു. ഐ.സി.ബി.എഫ്​ പ്രസിഡൻറ്​ സിയാദ്​ ഉസ്​മാൻ, പേൾ മോഡേൺ സ്​കൂൾ പ്രസിഡൻറ്​ സാം മാത്യു, സ്​കൂൾ ഡയറക്​ടർ അഷ്​റഫ്​, ടാറ്റ ​ൈഫ്ല മാനേജിങ്​ ഡയറക്​ടർ മുഹമ്മദ്​ ഹനീഫ, ഗൾഫ്​ മാധ്യമം ഖത്തർ മാർക്കറ്റിങ്​ മാനേജർ ആർ.വി. റഫീഖ്​, മീഡിയവൺ ടി.വി ഖത്തർ മാർക്കറ്റിങ്​ മാനേജർ നിശാന്ത്​ തറമേൽ, എജ്യൂ വേർ ഡയറക്​ടർ സി.കെ. ജസീം, ഗൾഫ്​ മാധ്യമം സീനിയർ റിപ്പോർട്ടർ കെ. ഹുബൈബ്​ എന്നിവർ സമ്മാന വിതരണം നടത്തി.

ജൂൺ അവസാന വാരത്തിൽ ആരംഭിച്ച മത്സരങ്ങളുടെ സമാപനമാണ്​ വെള്ളിയാഴ്​ച നടന്നത്​. ഒരു മിനിറ്റ് ​ദൈർഘ്യമുള്ള പ്രസംഗ വിഡിയോ അയച്ച്​ 500ഓളം പേരാണ്​ അപേക്ഷിച്ചത്​. അവരിൽ നിന്നും തിരഞ്ഞെടുക്കപ്പെട്ട 60 പേരായിരുന്നു ഒന്നാം റൗണ്ടിൽ മത്സരിച്ചത്​്​. ഒരു വിഷയം നേരത്തെ നൽകിയും ഒരു വിഷയം തത്സമയം നൽകിയും നടന്ന മത്സരത്തിനൊടുവിലാണ്​ ഫൈനൽ റൗണ്ടിലേക്കുള്ള 24 പേരെ നിശ്ചയിച്ചത്​.

വിജയികൾ ജൂനിയർ മലയാളം:

1 സെഹ്​റാൻ അബീബ്​ (ഡി.പി.എസ്​ മോഡേൺ സ്​കൂൾ, ഏഴാം ക്ലാസ്​)

2-ആനറ്റ്​ ഹന്ന ജെറ്റി (എം.ഇ.എസ്​ ഇന്ത്യൻ സ്​കൂൾ, ഏഴാം ക്ലാസ്​)

3 ഇശാൽ സൈന (ഡി.പി.എസ്​ മോഡേൺ ഇന്ത്യൻ സ്​കൂൾ, എട്ടാം ക്ലാസ്​)

സീനിയർ മലയാളം

​1-ഷെസ ഫാത്തിമ (എം.ഇ.എസ്​ ഇന്ത്യൻ സ്​കൂൾ, ഒമ്പതാം ക്ലാസ്​)

2-സ്​നേഹ ടോം (ശാന്തിനികേതൻ ഇന്ത്യൻ സ്​കൂൾ, 11ാം ക്ലാസ്​)

3- തീർത്ഥ അരവിന്ദ്​ (ഡി.പി.എസ്​ ഇന്ത്യൻ സ്​കൂൾ, 11ാം ക്ലാസ്​)

ജൂനിയർ ഇംഗ്ലീഷ്​

1- മയൂഖ രഘുനാഥ്​ (എം.ഇ.എസ്​ ഇന്ത്യൻ സ്​കൂൾ, എട്ടാം ക്ലാസ്​)

2-ശ്രീനന്ദ (ബിർല പബ്ലിക്ക്​​ സ്​കൂൾ, ഏഴാം ക്ലാസ്​)

3- ഗൗരി പുമൽകുമാർ (ഡി.പി.എസ്​ മോഡേൺ ഇന്ത്യൻ സ്​കൂൾ, ആറാം ക്ലാസ്​)

സീനിയർ ഇംഗ്ലീഷ്​

1-സ്​നേഹ ടോം (ശാന്തിനികേതൻ ഇന്ത്യൻ സ്​കൂൾ, 11ാം ക്ലാസ്​)

2-എ.എം. രക്ഷ (ബിർല പബ്ലിക്ക്​​ സ്​കൂൾ, ഒമ്പതാം ക്ലാസ്​)

3- ജോൺ പോൾ ലോറൻസ്​ (എം.ഇ.എസ്​ ഇന്ത്യൻ സ്​കൂൾ, 11ാം ക്ലാസ്​)

എല്ലാവർക്കും അഭിമാനിക്കാം

'നല്ല അനുഭവമായിരുന്നു. തങ്ങളുടെ സത്വത്തെ മനോഹരമായി ആവിഷ്​കരിക്കാൻ കുട്ടികൾക്ക്​ കഴിഞ്ഞു. എല്ലാവരുടെയും ഉള്ളിൽ ഒരുപാട്​ കാര്യങ്ങൾ പറയാനുണ്ടാവും. അത്​ മനോഹരമായി പറയാൻ കഴിയുന്നതാണ്​ മികച്ച പ്രസംഗം. ആ തരത്തിൽ പ​ങ്കെടുത്തവരെല്ലാം അവതരിപ്പിച്ചു. അതുകൊണ്ട്​ ഇവിടെ പ​ങ്കെടുത്ത എല്ലാവർക്കും അഭിമാനിക്കാൻ അവകാശമുണ്ട്​. ചിലർക്ക്​ ആഗ്രഹിച്ച മുഴുവനും പറയാൻ കഴിഞ്ഞിട്ടുണ്ടാവില്ല.

അവർക്ക്​ സങ്കടപ്പെടാനില്ല. മറ്റു ചിലർ ഓരോരുത്തരും അവരവരുടേതായ രീതിയിൽ നന്നായി അവതരിപ്പിച്ചിട്ടുണ്ട്​. പ്രഭാഷണത്തിൽ മാത്രമല്ല, ജീവിതത്തിൻെറ എല്ലാ മേഖലയിലും മനുഷ്യർക്ക്​ വ്യത്യസ്​തങ്ങളായ കഴിവുകളുണ്ട്​. ചിലർ വേഗം അംഗീകരിക്കപ്പെടും, മറ്റുചിലരെ അംഗീകാരങ്ങൾ പിന്നീട്​ തേടിയെത്തും. പക്ഷേ, മത്സരങ്ങൾക്ക്​ ചില പരിമിതിയുണ്ട്​. ഇവിടെ കഴിവുള്ളവരുടെ എണ്ണം കൂടുതലും പുരസ്​കാരങ്ങളുടെയും സ്​ഥാനങ്ങളുടെയും എണ്ണം കുറവുമായിരിക്കു​ം. എല്ലാവർക്കും ഒരേ സമയം സ്​ഥാനം ലഭ്യമായില്ല എന്നുവരും. അത്​ വ്യക്​തികളുടെ പ്രശ്​നമല്ല.

ഒന്നും രണ്ടും സ്​ഥാനം കിട്ടു​േമ്പാഴും ഒരു സ്​ഥാനം കിട്ടാതിരിക്കു​േമ്പാഴും നാം നമ്മുടെ സാധ്യത വിപുലപ്പെടുത്തണം, പരിമിതികൾ മനസ്സിലാക്കണം. അതിനുള്ളിൽ നിന്നും പുറത്തുകടക്കുകയും ചെയ്യണം. അതിനുള്ള വേദിയായി മത്സരങ്ങളെ കാണുക. ഒത്തുചേരലിൻെറ മനോഹാരിതയായാണ്​ സ്​പീക്കപ്​ ഖത്തർ വേദിയെ കണക്കാക്കുന്നത്​. വിഷയങ്ങളെല്ലാം കാലിക പ്രസക്​തമായിരുന്നു. വായനയും അന്വേഷണവും തുടരുക. ഒന്നിനും ഫുൾസ്​റ്റോപ്പില്ലാതെ 'കോമ' ഇട്ടുകൊണ്ട്​ തുടരുക'.

വിഷയ ഗാംഭീര്യം; ഉദ്ധരണികൾ സന്ദർഭോചിതമാവണം

'വിഷയങ്ങൾ വളരെ മനോഹരമായി അവതരിപ്പിക്കാൻ കഴിഞ്ഞു. ആശയപരമായി സമ്പുഷ്​ടിയുള്ള അവതരണമായിരുന്നു. അതേസമയം, മത്സരാർഥികളുടെ ആംഗ്യവും അംഗവിക്ഷേപങ്ങളും അൽപം നിയന്ത്രിച്ചാൽ നന്നായിരുന്നു. ഉദ്ധരണികളും കവിവാക്യങ്ങളും സന്ദർഭോചിതമായി അവതരിപ്പിക്കാൻ ശ്രമിക്കണം.

എല്ലാറ്റിലുമുപരി ശ്രദ്ധേയമായ വിഷയങ്ങളെക്കുറിച്ച്​ ചിന്തിക്കാനും മനസ്സിലാക്കാനും അവതരിപ്പിക്കാനുമുള്ള കുട്ടികളുടെ നല്ല മനസ്സിന്​ അഭിവാദ്യം. മലയാളവും മലയാണ്മയെയും സ്​നേഹിക്കുന്ന കുട്ടികളുടെ തലമുറ ഉയർന്നുവര​ട്ടെ. വിദ്യാഭ്യാസത്തിൻെറ ചുമതലയുള്ള വ്യക്​തി എന്ന നിലയിൽ തീർച്ചയായും പ്രവാസി സഹോദരങ്ങളുടെയും കുടുംബത്തിൻെറയും മലയാളത്തോടുള്ള താൽപര്യം അറിയു​േമ്പാൾ ഏറെ സന്തോഷമുണ്ട്​'.

വായിച്ചും കേട്ടും അറിവ്​ വർധിപ്പിക്കുക

'വിദ്യാർഥികളുടെ ഭാഷാ നൈപുണ്യവും, വിഷത്തിലെ അവഗാഹവും അഭിനന്ദനീയമായിരുന്നു. നന്നായി പ്രസംഗിക്കുകയെന്നത്​ ദൈവം തരുന്ന സമ്മാനമാണ്​.

അറിവാണ്​ മികച്ച പ്രഭാഷണത്തിൻെറ കാതൽ. നന്നായി വായിച്ചും, പ്രഗത്​ഭരുടെ പ്രസംഗങ്ങൾ കേട്ടും അറിവ്​ വർധിപ്പിക്കണം. അതാണ്​ മികച്ച പ്രസംഗകൻെറ അടിത്തറ'

പ്രതീക്ഷ നൽകുന്ന പ്രകടനങ്ങൾ

'വിദ്യാർഥികളുടെ പ്രകടനം മികച്ചതായിരുന്നു. തങ്ങളുടെ ആശയങ്ങളും, അറിവും അവർ മനോഹരമായി അവതരിപ്പിച്ചു. നന്നായി പ്രസംഗിക്കണമെങ്കിൽ നല്ല അറിവു വേണം. അറിവ്​ വർധിപ്പിക്കാൻ വിശാലമായ വായനയും വേണം. ആശയം നന്നായി അവതരിപ്പിക്കാൻ, വാക്കുകൾ മാത്രം പോര.

ശരീര ഭാഷയും ശബ്​ദ വിന്യാസവും ശരിയാവണം. അവതരിപ്പിക്കാൻ ശ്രമിക്കുന്ന കാര്യങ്ങൾ ഉള്ളിൽ നിന്ന്​ വരു​േമ്പാഴാണ്​, ശരീരവും ശബ്​ദവും, ബുദ്ധിയും വൈകാരികതും പ്രസംഗത്തിൻെറ ഭാഗമാവുന്നത്​. എല്ലാവരുടെയും പ്രകടനങ്ങൾ പ്രതീക്ഷ നൽകുന്നതാണ്​. നിങ്ങളുടെ കഴിവ്​ കൂടുതൽ മെച്ചപ്പെടുത്തുക. വിജയാശംസകൾ'

ഭാവി ഖത്തറിനും കേരളത്തിനും വാഗ്​ദാനം

'മനോഹരമായിരുന്നു എല്ലാ പ്രസംഗങ്ങളും. ചില മാനദണ്ഡങ്ങളു​െട അടിസ്​ഥാനത്തിൽ ഒന്നാം സ്​ഥാനം ഒരാൾക്കേ നൽകാനാവൂ. ബാക്കിയുള്ളവർ മോശമായി എന്ന്​ അതിന്​ അർഥമില്ല. ജൂനിയർ-സീനിയർ തലത്തിൽ മികച്ച രീതിയിൽ അവതരിപ്പിച്ചു. വളരെ ഭംഗിയായ ഭാഷയിൽ അവതരിപ്പിക്കാൻ കുട്ടികൾക്ക്​ കഴിഞ്ഞു. നമ്മുടെ ചുറ്റിലും സംഭവിക്കുന്ന കാര്യങ്ങളെ കുട്ടികൾ ഗൗരവത്തോടെ സമീപിക്കുന്നു എന്നതും സന്തോഷം നൽകുന്നു. ​

ഒരു പ്രസംഗ മത്സരത്തെ സമീപിക്കു​േമ്പാൾ, വിഷയാധിഷ്​ഠിതമായി കാര്യങ്ങൾ പഠിച്ചെടുത്ത ശേഷം, സ്വന്തം നിലയിൽ അവതരിപ്പിക്കാൻ ശ്രമിക്കുക. സ്വന്തം മനസ്സ്​ അപ്പോൾ എന്തു പറയുന്നുവോ അങ്ങനെ സംസാരിക്കാൻ ശ്രമിച്ചാൽ, അൽപം കൂടി സ്വാഭാവികത നിലനിർത്താൻ കഴിയും. ഭാവി ഖത്തറിനും കേരളത്തിനും വാഗ്​ദാനമാണ്​ നിങ്ങളൊക്കെ എന്ന്​ ഉറപ്പുനൽക​ുന്നു. എല്ലാവർക്കും നല്ല ഭാവി നേരുന്നു'.