സിറ എ.ഐ ഓഫിസ് ഉദ്ഘാടനം

ദോഹ: ഖത്തർ ആസ്ഥാനമായി പ്രവർത്തിക്കുന്ന സിറ എ.ഐയുടെ പുതിയ ഓഫിസ് ഉദ്ഘാടനവും സോഫ്റ്റ് ലോഞ്ചും സഫാരി ഗ്രൂപ്പ് ഡെപ്യൂട്ടി ചെയർമാനും മാനേജിങ് ഡയറക്ടറുമായ സൈനുൽ ആബിദീൻ നിർവഹിച്ചു. ബിസിനസ് മേഖലയിൽ ആർട്ടിഫിഷ്യൽ ഇന്റലിജൻസിന്റെ സാധ്യതകൾ പ്രയോജനപ്പെടുത്തി കൂടുതൽ ബുദ്ധിപരവും കാര്യക്ഷമവുമായ പ്രവർത്തന സംവിധാനങ്ങൾ ഒരുക്കുക എന്ന ലക്ഷ്യത്തോടെയാണ് സിറ എ.ഐ പ്രവർത്തനങ്ങൾക്ക് തുടക്കം കുറിച്ചത്. പരമ്പരാഗത സോഫ്റ്റ്‌വെയർ സംവിധാനങ്ങളിൽ നിന്ന് വ്യത്യസ്തമായി, ബിസിനസുകളുടെ ദൈനംദിന പ്രവർത്തനങ്ങളിലേക്കും വർക്ക്‌ഫ്ലോകളിലേക്കും എ.ഐ സാങ്കേതികവിദ്യ നേരിട്ട് സംയോജിപ്പിച്ച് കൂടുതൽ കാര്യക്ഷമമായ പരിഹാരങ്ങൾ നൽകുകയാണ് കമ്പനിയുടെ ലക്ഷ്യം.

ചടങ്ങിൽ സിറ എ.ഐ സ്ഥാപകനും ഡയറക്ടറുമായ ജസീൽ, ഡയറക്ടർ ജംസീർ മുഹമ്മദ്, എ.എം. ജാലിസ്, മുഹമ്മദ് ഇർഷാദ് ഹുദവി, ഷിഹാബ് തൂണേരി, പി.പി. ഫഹദ്, ശംസുദ്ധീൻ വാണിമേൽ, അതീഖ് റഹ്മാൻ, മുഹമ്മദ് ചാവട്ട് എന്നിവരും മറ്റ് പ്രമുഖ അതിഥികളും പങ്കെടുത്തു. ബിസിനസ് മേഖലയിൽ എ.ഐ അധിഷ്ഠിതമായ പുതിയ സാധ്യതകൾ സൃഷ്ടിക്കുന്നതിനൊപ്പം, പ്രായോഗികവും ബുദ്ധിപരവുമായ എ.ഐ സംവിധാനങ്ങൾ വികസിപ്പിച്ച് ജി.സി.സി രാജ്യങ്ങളിലേക്കും തുടർന്ന് ആഗോള വിപണികളിലേക്കും പ്രവർത്തനം വ്യാപിപ്പിക്കുകയാണ് സിറ എ.ഐയുടെ ലക്ഷ്യം.