യാത്ര ആവശ്യത്തിനുള്ള പി.സി.ആറിന്​ ബുക്ക്​​ ചെയ്യണമെന്ന്​ സിദ്ര

ദോഹ: യാത്ര ആവശ്യങ്ങൾക്കുള്ള കോവിഡ്​ ആർ.ടി.പി.സി.ആർ പരിശോധനകൾക്ക്​ ഓൺലൈൻ വഴി ബുക്ക്​ ചെയ്യണമെന്ന്​ നിർദേശിച്ച്​ സിദ്ര മെഡിസിൻ. ഖത്തറിൽനിന്ന്​ വിദേശരാജ്യങ്ങളിലേക്ക്​ യാത്രചെയ്യുന്നവർക്ക്​, അതത്​ രാജ്യങ്ങൾ ആവശ്യപ്പെടുന്ന പ്രകാരം വിവിധ സമയ കാലയളവിനുള്ളിലെ പരിശോധനാ ഫലത്തിനായി സമീപിക്കുമ്പോൾ ​ഓൺലൈൻ വഴി രജിസ്റ്റർ ചെയ്ത്​ അപ്പോയിൻമെന്‍റ്​ സ്വീകരിക്കണമെന്നാണ്​ സിദ്ര വീണ്ടും നിർദേശിച്ചത്​.

കോവിഡ്​ മൂന്നാം തരംഗത്തിന്​ പിന്നാലെ സിദ്രയിലെ എല്ലാ പരിശോധനകളും ബുക്കിങ്​ വഴിയാക്കിയിരുന്നു. അതിവേഗത്തിൽ പരിശോധനാഫലം ലഭിക്കുന്ന വിവിധ ടെസ്റ്റിങ്​ സംവിധാനങ്ങൾ ഉള്ളതിനാൽ ഖത്തറിൽനിന്നുള്ള കൂടുതൽ യാത്രക്കാരും സിദ്രയെ ആണ്​ ആശ്രയിക്കുന്നത്​. രോഗവ്യാപനത്തിന്‍റെ കൂടി പശ്​ചാത്തലത്തിൽ നേരിട്ടുള്ള വരവ്​ ഒഴിവാക്കാനാണ്​ ഓൺലൈൻ വഴി ബുക്ക്​​ ചെയ്ത്​ അപ്പോയിൻ​മെന്‍റ്​ എടുത്ത ശേഷം മാത്രം വരാൻ നിർദേശിക്കുന്നത്​.

'വേഗത്തിൽ ലഭ്യമാവുന്ന പി.സി.ആർ പരിശോധന ആവശ്യമുള്ളവരും ഓൺലൈൻ വഴി ബുക്ക്​ ചെയ്യണം. ഇതുസംബന്ധിച്ച കൂടുതൽ വിവരങ്ങളും നിരക്കും വെബ്​സൈറ്റിൽ ലഭ്യമാവും. തിരക്ക്​ വർധിക്കുമ്പോൾ ബുക്കിങ്​ നിയന്ത്രിക്കുമെന്നതിനാൽ, ആവശ്യമുള്ളവർ നേരത്തെ ബുക്ക്​​ ചെയ്യണം. കാൻസലേഷന്​ അനുസരിച്ച്​ യാത്രക്കാർക്ക്​ കൂടുതൽ അപ്പോയിൻ​മെന്‍റുകൾ അനുവദിക്കുന്നതാണ്​. യാത്രാതീയതി കണക്കാക്കി നേരത്തെ ബുക്ക്​​ ചെയ്യുന്നതു​വഴി കാര്യക്ഷമമായ സർവിസും ഉപയോഗപ്പെടുത്താം'-സിദ്ര മെഡിസിനിലെ പാത്തോളജി മേധാവി ഡോ. ജാസൺ ഫോഡ്​ പറഞ്ഞു.

കോവിഡ്​ മൂന്നാം തരംഗത്തിൽ ലോകത്തെല്ലായിടത്തും എന്നപേലെ ഇവിടെയും ​പരിശോധന കൂടിയതിനാൽ സിദ്രയിലും തിരക്കനുഭവപ്പെട്ടു. ഇത്​ പലപ്പോഴും യാത്രക്കാർക്ക്​ വേഗത്തിൽ ഫലം നൽകാൻ തടസ്സമായിരുന്നു -ഡോ. ഫോഡ്​ പറഞ്ഞു. നിലവിൽ മൂന്നുനാല്​ മണിക്കൂറിനുള്ളിൽ ഫലം ലഭ്യമാവുന്ന പി.സി.ആർ പരിശോധന സിദ്രയിൽ ലഭ്യമാണ്​. സ്രവം ശേഖരിച്ച്​ മൂന്ന്​ മുതൽ നാല്​ മണിക്കൂറിനുള്ളിൽ ഫലം ലഭ്യമാക്കും. 660 റിയാലാണ്​ അതിവേഗത്തിൽ ഫലം ലഭിക്കാനുള്ള നിരക്ക്​. എട്ട്​ മണിക്കൂറിൽ ഫലം ലഭിക്കുന്ന പി.സി.ആറിന്​ 300 റിയാലും 18 മണിക്കൂറിനുള്ളിൽ ഫലം ലഭിക്കാൻ 160 റിയാലുമാണ്​ നിരക്ക്​.