ദോഹയിലേക്ക്​ സർവീസുകൾ വർധിപ്പിച്ച് ടർക്കിഷ് എയർലൈൻസ്​

ദോഹ: തുർക്കിയിലെ ഇസ്​താംബൂളിൽ നിന്നും ദോഹയിലേക്കുള്ള പ്രതിവാര വിമാന സർവീസുകൾ വർധിപ്പിച്ച് ടർക്കിഷ് എയർലൈൻസ്​. ഖത്തറിൽ കോവിഡ് 19 നിയന്ത്രണങ്ങൾ നീക്കുന്നതി​​െൻറ ആദ്യ ഘട്ടമായ ജൂൺ 15നാണ് ഇസ്​ തംബൂൾ–ദോഹ സെക്ടറിൽ ടർക്കിഷ് എയർലൈൻസ്​ സർവീസ്​ പുനരാരംഭിച്ചത്. 

കൂടുതൽ നിയന്ത്രണങ്ങൾ നീങ്ങിയതോടെ പ്രതിവാര സർവീസുകളുടെ എണ്ണം രണ്ടിൽ നിന്ന്​ അഞ്ച് സർവീസാക്കി കമ്പനി ഉയർത്തി. നിലവിൽ ആഭ്യന്തര–അന്താരാഷ്ട്ര  നഗരങ്ങളിലായി 1,528 വിമാനങ്ങളാണ് തുർക്കി ദേശീയ എയർലൈനായ ടർക്കിഷ് പ്രവർത്തിപ്പിക്കുന്നത്.

അതേസമയം, 2020 മാർച്ച് 21നും 2020 ആഗസ്​റ്റ് 31നും ഇടയിൽ ടിക്കറ്റ് ബുക്ക് ചെയ്തവർക്ക് എത്ര തവണ വേണമെങ്കിലും ടിക്കറ്റിൽ മാറ്റം വരുത്താനുള്ള അനുമതിയുണ്ടെന്ന് ടർക്കിഷ് എയർലൈൻസ്​ വെബ്സൈറ്റിൽ അറിയിച്ചു. 2021 ഡിസംബർ 31ന് മുമ്പായി ടിക്കറ്റ് തീയതി മാറ്റാനാകും. എത്ര തവണ വേണമെങ്കിലും തീയതി മാറ്റാം. ഇതിന് ചാർജ് ഈടാക്കില്ലെന്നും കമ്പനി വ്യക്തമാക്കുന്നു.

മറ്റൊരു വിമാനത്താവളത്തിലേക്ക് ടിക്കറ്റ് മാറ്റുമ്പോൾ ഉണ്ടാകുന്ന നിരക്കിലെ വ്യത്യാസം ഉപഭോക്താവ് വഹിക്കേണ്ടതാണ്​. ടർക്കിഷ് എയർലൈൻസി​​െൻറ ഓഫീസ്​, കാൾ സ​​െൻറർ, ഒൺലൈൻ ചാനൽ, ടിക്കറ്റിംഗ് ഏജൻസികൾ എന്നിവ വഴി മാത്രമേ  മാറ്റം വരുത്താനാകൂ. ടിക്കറ്റ് ഓപൺ ടിക്കറ്റാക്കുന്നതിന് യാത്രാ തീയതിക്ക് മുമ്പായി നിലവിലെ ബുക്കിങ്​ റദ്ദാക്കണം. ഇതിലുണ്ടാകുന്ന നിരക്ക് വ്യത്യാസവും യാത്രക്കാരൻ വഹിക്കണം. കോവിഡ് 19 സാഹചര്യത്തിൽ യാത്രക്കാർക്ക് പ്രത്യേക ആരോഗ്യ സുരക്ഷാ നിർദേശങ്ങളും യാത്രാ മാനദണ്ഡങ്ങളും ടർക്കിഷ് എയർലൈൻസ്​ പുറത്തിറക്കിയിട്ടുണ്ട്.