സമുദ്ര യാത്രക്ക് ഇനി മെട്രാഷ് രണ്ടിലൂടെ അപേക്ഷിക്കാം

ദോഹ: സമുദ്ര യാത്രക്കാർക്ക് അപേക്ഷ സമർപ്പിക്കുന്നതിന് ഇനി സ്​മാർട്ട് ഫോൺ മതിയാകും. സമുദ്രയാത്രക്ക് അപേക്ഷ സമർപ്പിക്കുന്നതടക്കമുള്ള സേവനങ്ങൾ ആഭ്യന്തരമന്ത്രാലയത്തിൻെറ മെട്രാഷ് രണ്ട്​ ആപ്പിൽ ഉൾപ്പെടുത്തിയതോടെയാണിത്​.

സമുദ്രയാത്ര ചെയ്യാനാഗ്രഹിക്കുന്നവർക്ക് അവരുടെ പരിശ്രമവും സമയവും ലാഭിക്കാൻ മെട്രാഷിലെ പുതിയ സേവനം ഏറെ സഹായകമാകുമെന്ന് കോസ്​റ്റ് ആൻഡ് ബോർഡർ സെക്യൂരിറ്റി ജനറൽ ഡയറക്ടറേറ്റിലെ കിഴക്കൻ മേഖല മേധാവി മേജർ അഹ്മദ് അൽ സുലൈതി പറഞ്ഞു.

വാരാന്ത്യദിവസങ്ങളിലും അവധി ദിവസങ്ങളിലുമായി പ്രത്യേകിച്ച് വേനലവധിക്കാലത്ത് നിരവധി ആളുകളാണ് കടലിൽ പോകുന്നത്​. പുതിയ ഒാൺലൈൻ സേവനം രജിസ്​േട്രഷൻ ഓഫിസിലും ഫ്ലോട്ടിങ്​ സെൻററുകളിലുമെത്തുന്ന കടൽ യാത്രക്കാരുടെ തിരക്ക് കുറക്കും. ഖത്തർ റേഡിയോയിലെ പരിപാടിയിൽ സംസാരിക്കുകയായിരുന്നു അദ്ദേഹം. മെട്രാഷ് രണ്ട്​ ആപ്പിലെ കോസ്​റ്റ് ഗാർഡ് സർവിസ്​ എന്ന ഐക്കണിലാണ് റിക്വസ്​റ്റ് സെയിലിങ് ട്രാൻസാക്​ഷൻ സേവനം ലഭ്യമാകുക.

ഇവിടെ അപേക്ഷകർ യാത്ര ചെയ്യുന്ന രീതിയുടെ വിശദാംശങ്ങൾ, യാത്രക്കുള്ള ഉദ്ദേശ്യം, യാത്ര ചെയ്യുന്ന സ്​ഥലം, പുറത്തു പോകുന്നതിനുള്ള സ്​ഥലം, മടങ്ങുന്ന സ്​ഥലം, സമയം, ബന്ധപ്പെടാനുള്ള നമ്പർ തുടങ്ങിയ വിവരങ്ങൾ നൽകണം. വാട്ടർ സ്​കൂട്ടർ റൈഡർമാർ ലൈഫ് ജാക്കറ്റ് പോലെയുള്ള സുരക്ഷ മാർഗനിർദേശങ്ങൾ പാലിക്കണം. സ്​കൂട്ടറിൻെറ രജിസ്​േട്രഷൻ നമ്പർ കാണാൻ വിധത്തിൽ സ്​ഥാപിക്കണം. റൈഡർമാർ എണ്ണ വ്യവസായ സ്​ഥാപനങ്ങളിൽ നിന്നും ഒരു നോട്ടിക്കൽ മൈൽ സുരക്ഷിത അകലം പാലിക്കണം. ഇത് ലംഘിക്കുന്നവർക്കെതിരെ നിയമനടപടികളുണ്ടാകുമെന്നും അദ്ദേഹം വ്യക്തമാക്കി.