ഖത്തറിൽ സന്ദർശക വിസക്ക്​ ശമ്പള പരിധി

ദോഹ: ഖത്തറിലേക്കുള്ള കുടുംബ സന്ദർശക വിസാ നടപടികളുടെ വിശദാംശങ്ങൾ വ്യക്​തമാക്കി ആഭ്യന്തര മന്ത്രാലയം. കുടുംബ സന്ദർശക വിസയിൽ ബന്ധുക്കളെയും മറ്റും ഖത്തറിലേക്ക്​ കൊണ്ടുവരാൻ ശമ്പള പരിധി നിശ്​ചയിച്ചതായി അധികൃതർ അറിയിച്ചു. ഇതുപ്രകാരം ഭാര്യയെയും മക്കളെയും കൊണ്ടുവരാൻ അപേക്ഷകന്​ ചുരുങ്ങിയത്​ 5,000 റിയാൽ ശമ്പളം വേണം.

മാതാപിതാക്കൾ, സഹോദരങ്ങൾ ഉൾപ്പെടെ മറ്റു ബന്ധുക്കളെ കൊണ്ടുവരാൻ അപേക്ഷകന്​ ചുരുങ്ങിയത്​ 10,000 റിയാലും ശമ്പളം വേണമെന്ന്​ സർവിസ്​ ഓഫിസ്​ സെക്ഷൻ മേധാവി ലഫ്​. കേണൽ ഡോ. സാദ്​ ഉവൈദ അൽ അഹ്​ബാബി അറിയിച്ചു. മെട്രാഷ്​ രണ്ട്​ ആപ്ലിക്കേഷൻ വഴിയാണ്​ വിസക്ക്​ അപേക്ഷ സമർപ്പിക്കേണ്ടത്​.

ഭാര്യക്കും മക്കൾക്കുമായി സന്ദർശക വിസക്ക്​ അപേക്ഷിക്കു​േമ്പാൾ തൊഴിലുടമയിൽ നിന്നുള്ള നിരാക്ഷേപ പത്രം (നോ ഒബ്​ജക്ഷൻ ലെറ്റർ), കമ്പനികാർഡിൻെറ പകർപ്പ്​, സന്ദർശകരുടെ പാസ്​പോർട്ട്​ കോപ്പി, അപേക്ഷകന്‍റെ ഐ.ഡികാർഡ്​ പകർപ്പ്​, ഹെൽത്​ ഇൻഷുറൻസ്​, റി​ട്ടേൺ ടിക്കറ്റ്​, ബന്ധം തെളിയിക്കുന്ന തിരിച്ചറിയൽ രേഖ (ഭാര്യയെ കൊണ്ടുവരാൻ ആണെങ്കിൽ വിവാഹ സർട്ടിഫിക്കറ്റ്​, മക്കൾക്ക്​ ജനന സർട്ടിഫിക്കറ്റ്​), തൊഴിൽ വകുപ്പ്​ സാക്ഷ്യപ്പെടുത്തിയ വർക്​ കോൺട്രാക്​ട്​, എന്നിവ സഹിതമാണ്​ മെട്രാഷ്​ വഴി ​അപേക്ഷ സമർപ്പിക്കേണ്ടത്​.

അപേക്ഷകന്​ 5000 റിയാൽ ശമ്പളം ഉണ്ടായിരിക്കണം. മറ്റു ബന്ധുക്കൾക്ക്​ വിസക്കായി അപേക്ഷിക്കു​​േമ്പാഴും നിശ്​ചിത രേഖകൾ സമർപ്പിക്കണം. നവജാത ശിശുക്കൾക്ക്​ രാജ്യത്ത്​ പ്രവേശിക്കാനും അസ്സൽ പാസ്​പോർട്ട്​, ജനന സർട്ടിഫിക്കറ്റ്​, ഫോ​ട്ടോ, അപേക്ഷകന്‍റെ റസിഡന്‍റ്​ പെർമിറ്റ്​ പകർപ്പ്​, മാതാവിന്‍റെ വിസ എന്നിവ ആവശ്യമാണെന്ന്​ ​ലഫ്​. കേണൽ ഡോ. അൽ അഹ്​ബാബി അറിയിച്ചു.

അതേസമയം, അപേക്ഷകന്‍റെ സ്​പോൺസർഷിപ്പിലാണ്​ മാതാവെങ്കിൽ കുട്ടികൾക്ക്​ വിസ ഓൺ അറൈവൽ ലഭ്യമാവും. വിസ നടപടികൾക്കായി ആഭ്യന്തര മന്ത്രാലയത്തിന്‍റെ 18 സർവിസ്​ ​െസൻററുകൾ രാജ്യത്തിൻെറ വിവിധ ഭാഗങ്ങളിലായി പ്രവർത്തിക്കുന്നതായും അദ്ദേഹം അറിയിച്ചു. വിസ, റസിഡൻസ്​, ​ഐ.ഡി സംബന്ധമായ സേവനങ്ങൾ എന്നിവ ഇവിടെ ലഭ്യമാവുമെന്നും അറിയിച്ചു.

ആഭ്യന്തര മന്ത്രാലയത്തിന്‍റെ സർവിസ്​ സെൻററുകളുടെയും ഹ്യൂമനിറ്റേറിഷൻ സർവിസ്​ ഓഫിസിന്‍റെയും സേവനങ്ങൾ സംബന്ധിച്ച്​ ​പബ്ലിക്​ റിലേഷൻസ്​ വിഭാഗം സംഘടിപ്പിച്ച വെബിനാറിലാണ്​ അധികൃതർ കാര്യങ്ങൾ വിശദീകരിച്ചത്​.