റിപ്പബ്ലിക്​ ദിനം: എംബസിയിൽ പതാക ഉയർത്തൽ രാവിലെ 6.45ന്​

ദോഹ: ഇന്ത്യയുടെ 73ാം റിപ്പബ്ലിക്​ ദിനാഘോഷങ്ങൾക്കായി ഖത്തറിലെ ഇന്ത്യൻ എംബസിയും പ്രവാസി സമൂഹവും ഒരുങ്ങി. ആഘോഷങ്ങളുടെ ആസ്ഥാനമാവുന്ന ഇന്ത്യൻ എംബസിയിൽ ബുധനാഴ്ച രാവിലെ 6.45ന്​ ദേശീയ പതാക ഉയർത്തും. കോവിഡ്​ പശ്ചാത്തലത്തിൽ സാമൂഹിക അകലം പാലിച്ചായിരിക്കും ചടങ്ങുകൾ. രണ്ട്​ ഡോസ്​ വാക്​സിൻ സ്വീകരിക്കുകയും ഇഹ്​തിറാസിൽ ഗ്രീൻ സ്​റ്റാറ്റസ്​ ഉള്ളവർക്കും മാത്രമായിരിക്കും റിപ്പബ്ലിക്​ ദിന ചടങ്ങിലേക്ക്​ പ്രവേശനം. ചടങ്ങ്​ എംബസിയുടെ ഫേസ്​ബുക്ക്​​, യുട്യൂബ്​ ചാനൽ വഴി തത്സമയം സംപ്രേഷണം ചെയ്യും.