വെസ്​റ്റ് ബേയിലും ഖുദ്സിലും റെഡ്ക്രസൻറിെൻറ 2.1 മില്യൻ റിയാലിെൻറ ആരോഗ്യ പദ്ധതികൾ

ദോഹ: ഫലസ്​തീനിലെ വെസ്​റ്റ് ബാങ്കിലും ഖുദ്സിലുമായി ഖത്തർ റെഡ്ക്രസൻറ് സൊസൈറ്റി വമ്പൻ ആരോഗ്യ പദ്ധതികൾ പ്രഖ്യാപിച്ചു. 
ഫലസ്​തീൻ റെഡ്ക്രസൻറ് സൊസൈറ്റിയുമായി സഹകരിച്ച് 1.2 മില്യൻ റിയാലി​െൻറ പദ്ധതികളാണ് ക്യൂ.ആർ .സി.എസ്​ ആസൂത്രണം ചെയ്തിരിക്കുന്നത്. ഖുദ്സിലെ ആശുപത്രികളുടെ അടിസ്​ഥാന സൗകര്യങ്ങൾ മെച്ചപ്പെടുത്തുക, പൊതു ആരോഗ്യ മേഖലക്ക് പിന്തുണ നൽകുക, ആശുപത്രികളിലെ സേവനങ്ങളുടെ ഗുണമേന്മ വർധിപ്പിക്കുക, രോഗികൾക്ക് കൃത്യസമയം ആരോഗ്യപരിരക്ഷ ഉറപ്പുവരുത്തുക, ഫലസ്​തീൻ റെഡ്ക്രസൻറി​െൻറ കാര്യക്ഷമത ഉയർത്തുക തുടങ്ങിയ ലക്ഷ്യങ്ങൾ മുൻനിർത്തിയാണ് പദ്ധതികൾ ആസൂത്രണം ചെയ്തിരിക്കുന്നത്. 

ഒരു ദശാബ്​ദത്തിലേറെയായി വെസ്​റ്റ്ബാങ്കിലും ഖുദ്സിലുമായി 45 ആരോഗ്യ, ദുരിതാശ്വാസ, വികസന, സാമ്പത്തിക പദ്ധതികളാണ് ഖത്തർ റെഡ്ക്രസൻറ് സൊസൈറ്റി നടപ്പാക്കിയിട്ടുള്ളത്. ആറുദശലക്ഷം റിയാലി​െൻറ പദ്ധതികളിൽ നിന്നായി 840,000 പേരാണ് ഗുണഭോക്താക്കളായിരിക്കുന്നത്. ഫലസ്​തീൻ ആരോഗ്യ മേഖലയുടെ നട്ടെല്ലായ മകാസിദ് ഇസ്​ലാമിക് ചാരിറ്റബിൾ സൊസൈറ്റിക്ക് പുതിയ മെഡിക്കൽ ഉപകരണങ്ങൾ വാങ്ങുന്നതിനായുള്ള മേജർ പദ്ധതിയും ക്യൂ.ആർ.സി.എസ്​ ആസൂത്രണം ചെയ്യുന്നുണ്ട്.