പ്രവാസി തിരിച്ചുപോക്ക്: ആദ്യഘട്ട പട്ടിക തരംതിരിക്കൽ, ഖത്തർ ഇന്ത്യൻ എംബസി രജിസ്​ട്രേഷൻ നിർത്തി

ദോഹ: കോവിഡിൻെറ പശ്​ചാത്തലത്തിൽ നാട്ടിലേക്ക്​ തിരിച്ചുപോകാൻ ആഗ്രഹിക്കുന്ന ഇന്ത്യക്കാരു​െട  രജിസ്​സ്​ട്രേഷൻ ഖത്തറിലെ ഇന്ത്യൻ എംബസി നിർത്തി. ഇന്ത്യൻ എംബസിയിൽ ഇതുവരെ പേര് ചേർത്തവർ  40000 ആണ്. ആദ്യഘട്ട പട്ടിക തരംതിരിക്കുന്നതുമായി ബന്ധപ്പെട്ടാണ്​ രജിസ്​ട്രേഷൻ നിർത്തിയതെന്ന്​  എംബസി അധികൃതർ ‘ഗൾഫ്​മാധ്യമ’ത്തോട്​ പറഞ്ഞു. https://forms.gle/SeB52ZJymC8VR8HN8 എന്ന  ലിങ്കിലൂടെയാണ്​ രജിസ്​ട്രേഷൻ നടന്നിരുന്നത്​. ഈ ലിങ്കിൽ ചൊവ്വാഴ്​ച രാത്രിയോടെ സേവനം ലഭ്യമല്ല. 

അതേസമയം പ്രവാസികളെ നാട്ടിലേക്ക് കൊണ്ടുപോകുന്ന പ്രക്രിയ വ്യാഴാഴ്ച തുടങ്ങും. ദോഹയിൽ നിന്ന് ആദ്യ  ആഴ്ച പോകുന്നത് രണ്ടു വിമാനങ്ങളായിരിക്കും. ഖത്തറിൽ നിന്ന്​ ഓരോവിമാനത്തിലും 200 പേരെ വീതമാണ്​ കൊണ്ടുപോവുക. ആകെ 400 പേർ. മേയ്​ ഏഴ്​ മുതൽ ഒരാഴ്​ചത്തെ വിവരങ്ങളാണ്​ നിലവിൽ  കേന്ദ്രസർക്കാർ പുറത്തിറക്കിയിരിക്കുന്നത്​. ഏഴിന് കൊച്ചിയിലേക്കും പത്തിന് തിരുവനന്തപുരത്തേക്കുമാണ്  ദോഹയിൽ നിന്ന്​ വിമാനം ഉണ്ടാവുക. ഇന്ത്യൻ എംബസിയിൽ ഇതുവരെ പേര് ചേർത്തവരിൽ നിന്ന്  പോകേണ്ടവരെ തിരഞ്ഞെടുത്ത് എംബസി ഫോണിലൂടെയോ ഇമെയിൽ മുഖേനയോ വിവരം അറിയിക്കും.  ഗർഭിണികൾ, രോഗികൾ, ബുദ്ധിമുട്ടുന്ന സാഹചര്യങ്ങളിലുള്ള തൊഴിലാളികൾ തുടങ്ങിയവർക്കാണ്  മുൻഗണനയെന്ന്​ എംബസി അറിയിച്ചു. 

ഇതിനാൽ തന്നെ ആദ്യ ഘട്ടത്തിൽ രജിസ്റ്റർ ചെയ്ത എല്ലാവർക്കും  പോകാൻ ആകില്ല. ടിക്കറ്റുകൾ വിമാന കമ്പനികൾ നേരിട്ട് ആണ് നൽകുക. എംബസി നൽകുന്ന പേര്​ വിവരങ്ങൾക്കനുസൃതമായിട്ടായിരിക്കും ഇത്​. ടിക്കറ്റ് തുക യാത്രക്കാർ വഹിക്കണം. നാട്ടിലെത്തിയാലുള്ള  ചികിൽസയുമായി ബന്ധപ്പെട്ടുള്ള ചിലവുകളും പോകുന്നവർ തന്നെ വഹിക്കണം. ദോഹയിൽ നിന്ന്​ ഇന്ത്യയിലെ  മറ്റ്​ വിമാനത്താവളങ്ങളിലേക്കുള്ള വിമാനങ്ങളുടെ വിവരം പിന്നീട്​ അറിയിക്കും. കൂടുതൽ വിവരങ്ങൾക്ക് ഇന്ത്യൻ  എംബസിയുടെ കോവിഡ് സെല്ലുമായി ബന്ധപ്പെടാം. ഫോൺ: 55667569, 55647502. ഇമെയിൽ:  covid19dohahelpline@gmail.com