Top
Begin typing your search above and press return to search.
keyboard_arrow_down
Login
exit_to_app
exit_to_app
Homechevron_rightGulfchevron_rightQatarchevron_rightകോവിഡ്​ പ്രതിസന്ധികൾ...

കോവിഡ്​ പ്രതിസന്ധികൾ തട്ടിമാറ്റി; കോയമ്പത്തൂർ സ്വദേശിയുടെ മൃതദേഹം ദോഹയിൽ നിന്ന്​ നാട്ടിലേക്ക്​

text_fields
bookmark_border
കോവിഡ്​ പ്രതിസന്ധികൾ തട്ടിമാറ്റി; കോയമ്പത്തൂർ സ്വദേശിയുടെ മൃതദേഹം ദോഹയിൽ നിന്ന്​ നാട്ടിലേക്ക്​
cancel

ദോഹ: കോവിഡ്​ കാലത്തെ സകല പ്രതിസന്ധികളും തട്ടിമാറ്റിയതോടെ ദോഹയിൽ മരിച്ച കോയമ്പത്തൂർ സ്വദേശിയായ പ്രവാസിയുടെ മൃതദേഹം കടൽകടന്ന്​ ജൻമനാട്ടിലേക്ക്​. ഇതിന്​ പിന്നിൽ അഹോരാത്രം പരിശ്രമിച്ചതാക​​ട്ടെ ഖത്തറിലെ മലയാളി സാമൂഹിക പ്രവവർത്തകനായ അബ്​ദുൽ സലാമും.

നിലവിൽ ഖത്തറും​ ഇന്ത്യയും എല്ലാ അന്താരാഷ്​ട്രയാത്രാവിമാനങ്ങൾക്കും വിലക്കേർപ്പെടുത്തിയിരിക്കുകയാണ്​. മാർച്ച്​ 30നാണ്​​ കോയമ്പത്തൂർ മേട്ടൂർ സ്വദേശിയായ വിനോദ്​ അയ്യൻ ദുരൈ (29) ദോഹയിൽ മരിച്ചത്​. എഞ്ചിനീയറിങ്​ കമ്പനിയിൽ സിവിൽ എഞ്ചിനീയറായിരുന്നു. യാത്രവിമാനങ്ങൾക്ക്​ നിരോധമുള്ള കാര്യമടക്കമുള്ള പ്രതിസന്ധി അറിയിച്ചെങ്കിലും മൃതദേഹം അവസാനമായി കാണാനുള്ള അടങ്ങാത്ത ആഗ്രഹം നാട്ടിലെ ഉറ്റവർ അറിയിക്കുകയായിരുന്നു. ഇതോടെയാണ്​ അബ്​ദുൽസലാം ദൗത്യവുമായി മുന്നിട്ടിറങ്ങിയത്​. നിലവിൽ ഖത്തറിലേക്കും തിരിച്ചും ചരക്കുവിമാനങ്ങളും ട്രാൻസിറ്റ്​ വിമാനങ്ങളും മാത്രമേ അയക്കുന്നുള്ളൂ. ഖത്തർ എയർവേയ്​സിൻെറ ചരക്കുവിമാനത്തിൽ മൃതദേഹം അയക്കാനുള്ള സാധ്യത തേടി രാവുംപകലുമില്ലാതെ അബ്​ദുൽസലാം ഓഫിസുകൾ കയറിയിറങ്ങി.

രേഖകളും നടപടിക്രമങ്ങളുമെല്ലാം പൂർത്തിയാക്കിയെങ്കിലും സാ​ങ്കേതിക കാരണങ്ങളാൽ ഉദ്ദേശിച്ച വിമാനം കഴിഞ്ഞ ദിവസം മുടങ്ങി. ഇനി ഏ​പ്രിൽ അഞ്ചിന്​ മാത്രമേ മൃതദേഹം കൊണ്ടുപോകാൻ കഴിയൂവെന്നാണ്​ ഖത്തർ എയർവേയ്​സ്​ അധികൃതർ അറിയിച്ചിരുന്നത്​. എന്നാൽ ഏ​പ്രിൽ മൂന്നിന്​ തന്നെയുള്ള വിമാനത്തിൽ കൊണ്ടുപോകാമെന്ന അറിയിപ്പ്​ പിന്നീട്​ ലഭിച്ചു. ഇതോടെ ഹമദ്​ അന്താരാഷ്​ട്ര വിമാനത്താവളത്തിലടക്കമുള്ള എല്ലാ നടപടികളും പൂർത്തിയാക്കി. ഇന്ന്​ വൈകുന്നേരത്തെ ഖത്തർ എയർവേയ്​സ്​ ചരക്കുവിമാനത്തിൽ മറ്റ്​ തടസങ്ങളില്ലെങ്കിൽ മൃതദേഹം കൊണ്ടുപോകുമെന്ന്​ സലാം ‘ഗൾഫ്​മാധ്യമ’ത്തോട്​ പറഞ്ഞു. സലാമിന്​ എല്ലാ സഹായവും നൽകി ദോഹയിലെ ഇന്ത്യൻ എംബസിയും എംബസിയുടെ അപെക്​സ്​ സംഘടനയായ ഐ.സി.ബി.എഫും കൂടെ നിന്നു. കോവിഡ്​ പ്രതിസന്ധിക്ക്​ ശേഷം ആദ്യമായാണ്​ ഒരു ഇന്ത്യക്കാരൻെറ മൃതദേഹം നാട്ടിലേക്ക്​ കൊണ്ടുപോകാനാവുന്നത്​. ആറുവർഷമായി ഖത്തറിൽ ജോലിചെയ്യുന്ന വിനോദ് അയ്യൻ ദുരൈക്ക് ആറുമാസം പ്രായമായ ഒരുമകളുണ്ട്. ഭാര്യ: ദിവ്യ. പിതാവ്: അയ്യൻ ദുരൈ. മാതാവ്: സരസ്വതി.

abdul-salam
ഖത്തറിലെ മലയാളി സാമൂഹികപ്രവർത്തകൻ അബ്​ദുൽസലാം

കോവിഡ്​ നിയന്ത്രണങ്ങളുടെ ഭാഗമായുള്ള നടപടി മൂലം ഇന്ത്യയിലേക്കുള്ള വിമാനസർവീസുകൾ റദ്ദായതോടെ ഖത്തറിൽ മരിച്ച മലയാളികളുടെ ഇന്ത്യക്കാരുടെ മൃതദേഹം ഉറ്റവർക്ക്​ ഒരുനോക്കുകാണാൻ പോലുമാകാതെ ഇവിടെ തന്നെ സംസ്​കരിക്കേണ്ടിവന്നിട്ടുണ്ട്​. ഇതിനകം വയനാട്​, തൃശൂർ സ്വദേശികളടക്കം നാല്​ ഇന്ത്യക്കാരുടെ മൃതദേഹം ഇവിടെ തന്നെ സംസ്​കരിക്കേണ്ടിവന്നിട്ടുണ്ട്​​. പാലക്കാട്​ ഒറ്റപ്പാലം സ്വദേശിയായ അബ്​ദുൽസലാം ഖത്തറിലെ പ്രമുഖ സാമൂഹിക പ്രവർത്തകനായിരുന്ന പരേതനായ ഹാജിക്കയുടെ ശിഷ്യനാണ്​. 24 വർഷമായി ദോഹയിൽ ഉണ്ട്​. ഇൻനർനാഷനൽ മെരിടൈം കമ്പനിയിൽ റീജിയനൽ മാനേജറാണ്​.

Show Full Article
TAGS:covid 19 corona virus qutar malayalam news 
Web Title - Qutar coimbathore native return-Gulf news
Next Story