വാക്​സിൻ എടുത്തവർക്ക്​ ഖത്തറിൽ ക്വാറൻറീൻ ഒഴിവാക്കി

ദോഹ: ഇന്ത്യക്കാർ ഉൾപ്പെടെയുള്ള പ്രവാസികൾക്ക്​ ആശ്വാസമായി യാത്രാ നിയന്ത്രണങ്ങളിൽ കൂടുതൽ ഇളവുകൾ പ്രഖ്യാപിച്ച്​ ഖത്തർ. അംഗീകൃത വാക്​സിനേഷൻ സ്വീകരിച്ച യാത്രക്കാർക്ക്​ 10 ദിവസത്തെ ക്വാറൻറീൻ ഒഴിവാക്കുന്നതായി ആരോഗ്യ മന്ത്രാലയം അറിയിച്ചു. ജൂലായ്​ 12 മുതൽ പുതിയ ഇളുവുകൾ പ്രാബല്ല്യത്തിൽ വരും. വാക്​സിൻ സ്വീകരിച്ച്​ 14 ദിവസം കഴിഞ്ഞവർക്കാണ്​ തിരിച്ചെത്തു​േമ്പാൾ ക്വാറൻറീൻ ഒഴിവാക്കിയത്​. എന്നാൽ, യാത്രക്ക്​ മുമ്പ്​ 72മണിക്കൂറിനുള്ളിലും, ഖത്തറിലെത്തിയ ശേഷം വിമാനത്താവളത്തിലും ആർ.ടി.പി.സി. ആർ പരിശോധനയിൽ ഇവർ കോവിഡ്​ നെഗറ്റീവായിരിക്കണം.

റെസിഡൻറ്​ പെർമിറ്റ്, ​ഫാമിലി വിസ, ടൂറിസ്​റ്റ്​-ബിസിനസ്​ ആവശ്യത്തിന്​ വര​ുന്നവർ എന്നിവർക്കാണ്​ നിർബന്ധിത ക്വാറൻറീൻ ഒഴിവാക്കാൻ തീരുമാനമായത്​. 11 വയസ്സുവരെയുള്ള കുട്ടികൾക്ക്​ മാതാപിതാക്കൾ വാക്​സിൻ സ്വീകരിച്ചവരായാൽ ക്വാറൻറീൻ ഒഴിവാക്കപ്പെടും. എന്നാൽ, 12നും 17നുമിടയിൽ പ്രായമുള്ള കുട്ടികൾ വാക്​സിൻ സ്വീകരിച്ചവരല്ലെങ്കിൽ മാതാപിതാക്കളിൽ ഒരാൾക്കൊപ്പം ക്വാറൻറീനിൽ കഴിയണം.

ഇന്ത്യ ഉൾപ്പെടെയുള്ള റെഡ്​ കാറ്റഗറിയിൽ പെടുന്ന രാജ്യങ്ങളിൽ നിന്നും തിരിച്ചു വരുന്നവർക്ക്​ ഇളവുകൾ പ്രഖ്യാപിച്ചത്​ മലയാളികൾ ഉൾപ്പെടെയുള്ള ആയിരക്കണക്കിന്​ യാത്രക്കാർക്ക്​ ആശ്വാസകരമാണ്​.