പ്രവാസികൾക്ക്​ സൗജന്യ ക്വാറൻറീന്​ വീടുകൾ വിട്ടുനൽകി ഖത്തർ പ്രവാസികൾ

ദോഹ: ദുരിതത്തിൽ പെട്ട്​ വിദേശത്ത്​ നിന്ന്​ നാട്ടിൽ​ തിരിച്ചെത്തുന്ന പ്രവാസികൾക്ക്​ സൗജന്യ ക്വാറൻറീൻ സൗകര്യം ഏർപ്പെടുത്താനായി സ്വന്തം വീടുകൾ തന്നെ വിട്ടുനൽകി രണ്ട്​ ഖത്തർ പ്രവാസികൾ. പ്രവാസികളെ സര്‍ക്കാറുകള്‍ കയ്യൊഴിയുമ്പോഴും സേവനത്തിൻെറ മഹാമാതൃക തീർക്കുകയാണ്​ കള്‍ച്ചറല്‍ ഫോറം കോഴിക്കോട് ജില്ലക്കമ്മിറ്റി അംഗം നാദാപുരം കുമ്മങ്കോട് സൈനുദ്ദീന്‍ തിര്‍ച്ചിലോത്തും ജില്ലവൈസ്​ പ്രസിഡൻറ്​ വില്ല്യാപ്പള്ളി സ്വദേശിനി സക്കീന അബ്​ദുല്ലയും.പ്രവാസികളില്‍ നിന്നും ക്വാറൻറീന്​ പണം ഈടാക്കുമെന്ന സർക്കാർ പ്രഖ്യാപം വന്നയുടൻ തന്നെ സൈനുദ്ദീന്‍ നാട്ടിലെ വെല്‍ഫെയര്‍ പാര്‍ട്ടി ഭാരവാഹികളെ ബന്ധപ്പെടുകയും വീടുവിട്ടുനല്‍കാന്‍ സന്നദ്ധമാവുകയുമായിരുന്നു. 

നിലവിൽ ഖത്തറിൽ കോവിഡ്​ സേവനരംഗത്തും സജീവമാണ്​ ഇദ്ദേഹം. ‘പ്രവാസി മടക്കയാത്രാ പദ്ധതി’യിലൂടെ, നാട്ടിലേക്ക് പോകാന്‍ പ്രയാസപ്പെടുന്നവർക്ക്​ സൗജന്യവിമാനടിക്കറ്റുകള്‍ നൽകുന്ന പദ്ധതിയിലും സജീവമാണ്​.വില്ല്യാപ്പള്ളി സ്വദേശിനിയായ സക്കീന അബ്​ദുല്ല ഖത്തറിലെ ആദ്യ കോവിഡ് പോസിറ്റീവ് രോഗികളില്‍ ഒരാളാണ്​. രോഗത്തെ തോൽപിച്ച സക്കീനയുടെ വിശേഷങ്ങൾ സമൂഹമാധ്യമങ്ങളിലടക്കം ഏറെ ചർച്ചയായിരുന്നു. ചികിത്സ കഴിഞ്ഞെത്തിയ അവര്‍ ആദ്യമായി ചെയ്തത് കോഴിക്കോട്​ ജില്ലയുടെ ഭക്ഷണകിറ്റ്​ വിതരണത്തിൻെറ ചുമതല ഏറ്റെടുക്കുകയായിരുന്നു. രണ്ടുപേരെയും ജില്ല കമ്മിറ്റി അഭിനന്ദിച്ചു.