ക്യൂ.എൻ.ബി; മേഖലയിലെ അതിസമ്പന്ന ബാങ്ക്​

ദോഹ: മധ്യേഷ്യ - ആഫ്രിക്ക മേഖലയിലെ ഏറ്റവും ആസ്​തിയുള്ള ബാങ്കായി ഖത്തർ നാഷനൽ ബാങ്കിനെ തെരഞ്ഞെടുത്തു. 'ദ ബാങ്കർ മാഗസിൻ' നടത്തിയ തെ​രഞ്ഞെടുപ്പിൽ ആഗോള തലത്തിൽ 79ാം റാങ്കിലാണ്​ ഖത്തർ നാഷനൽ ബാങ്ക്​. ലോകത്തെ ആയിരം ബാങ്കുകളെ പരിചയപ്പെടുത്തുന്ന പട്ടികയിലാണ്​ മധ്യേഷ്യ-ആഫ്രിക്കൻ മേഖലയിൽ ഏറ്റവും സമ്പന്ന ബാങ്കായി ക്യൂ.എൻ.ബി മാറിയത്​. 2019 ഡിസംബർ മുതലുള്ള കണക്കെടുപ്പിൽ മുൻ വർഷത്തെക്കാൾ ഒമ്പതു​ ശതമാനം ആസ്​തി വർധിപ്പിച്ചു. നിലവിൽ 28,200 കോടി ഡോളറാണ്​ ബാങ്കിൻെറ ആസ്​​തി.

ബാങ്കുകളുടെ മികവും പോരായ്​മകളും എട്ടു​ വിഭാഗങ്ങളിലായി പരിശോധിച്ചാണ്​ 'ദ ബാങ്കർ മാഗസിൻ' റാങ്കിങ്​ തയാറാക്കിയത്​. വളർച്ച, ലാഭസാധ്യത, പ്രവർത്തന മികവ്​, ആസ്​തി മികവ്​, റിസ്​ക്​ റി​ട്ടേൺ തുടങ്ങിയ വിഭാഗങ്ങളിലെ പ്രകടനമാണ്​ വിലയിരുത്തിയത്​.

മൂന്നു​ വൻകരകളിലെ 31 രാജ്യങ്ങളിലായി ഉപകേന്ദ്രങ്ങളും ബാങ്കിന്​ നിക്ഷേപമുള്ള കമ്പനികളും വ്യാപിപ്പിച്ചാണ്​ കഴിഞ്ഞ സാമ്പത്തിക വർഷത്തിൽ ക്യൂ.എൻ.ബി ചരിത്ര നേട്ടം കൊയ്​തത്​. രണ്ട​ു​ കോടി ഉപഭോക്താക്കളും 27,000 ജീവനക്കാരുമായി ലോകത്തിൻെറ വിവിധ ഭാഗങ്ങളിലായി ആയിരത്തിലേറെ കേന്ദ്രങ്ങളിലാണ്​ ഖത്തർ നാഷനൽ ബാങ്കിൻെറ പ്രവർത്തനം. 4400ലേറെ എ.ടി.എമ്മുകളുമുണ്ട്​്​.

നാല്​ ചൈനീസ്​ ബാങ്കുകളാണ്​ ലോകത്തെ ഏറ്റവും സമ്പന്നമായ ആയിരം ബാങ്കുകളുടെ പട്ടികയിൽ മുന്നിൽ. ഐ.സി.ബി.സി, ചൈന കൺസ്​ട്രക്​ഷൻ ബാങ്ക്​, അഗ്രികൾചറൽ ബാങ്ക്​ ഓഫ്​ ചൈന, ബാങ്ക്​ ഓഫ്​ ചൈന എന്നിവയാണ്​ ഒന്നു​ മുതൽ നാലു വരെ സ്ഥാനങ്ങളിൽ. അമേരിക്കയിലെ ജെ.പി മോർഗൻ ചേസാണ്​ അഞ്ചാമത്​. ആദ്യ 20 ബാങ്കുകളുടെ പട്ടികയിൽ ഒമ്പതും ചൈനയിൽനിന്നുള്ളവയാണ്​.