ഖത്തരി വാഹനങ്ങൾ സൗദിയിൽ പ്രവേശിച്ചുതുടങ്ങി

ദോഹ: ഖത്തറിൽ നിന്നുള്ള വാഹനങ്ങൾ ​ അബൂസംറ അതിർത്തി വഴി സൗദിയിലേക്ക്​ പോകാൻ ആരംഭിച്ചു. സൗദി മാധ്യമങ്ങളാണ്​ ഇക്കാര്യം റിപ്പോർട്ട്​ ചെയ്​തത്​. ഖത്തരി വാഹനം അതിർത്തി കടക്കുന്നതിൻെറ വീഡിയോ സൗദി ചാനലായ 'അൽ അക്​ബറിയ' പുറത്തുവിട്ടു. വാഹനത്തിൽ ഉള്ളവരെ സൗദി ഉദ്യോഗസ്​ഥർ അഭിവാദ്യം ചെയ്യുന്നുമുണ്ട്​.

അതിനിടെ അബൂസംറ അതിർത്തി വഴി സൗദിയിലേക്കും തിരിച്ചുമുള്ള പ്ര​വേശനത്തിനുള്ള ചട്ടങ്ങൾ ​ഖത്തർ പുറത്തിറക്കി. നിലവിലുള്ള ഖത്തറിൻെറ കോവിഡ്​ പ്രതിരോധ നടപടികളുടെ ഭാഗമായാണിത്​. മൂന്നര വർഷത്തെ ഉപരോധത്തിന്​ ശേഷം ഖത്തറിനെതിരെയുള്ള ഉപരോധം പിൻവലിക്കുകയും കര കടൽ വ്യോമ പാതകൾ തുറക്കുകയും ചെയ്​തിരുന്നു​.

ഖത്തറിൻെറ ഏക കര അതിർത്തിയായ അബൂസംറ വഴി സൗദിയിലേക്കുള്ള പ്ര​വേശനത്തിനുള്ള മാനദണ്ഡങ്ങൾ പുറത്തിറക്കിയതായി ഖത്തർ ഗവൺമെൻറ്​മെൻറ്​ കമ്യൂണിക്കേഷൻ ഓഫിസാണ്​ (ജി.സി.ഒ) അറിയിച്ചിരിക്കുന്നത്​. ഇത്​ ജനുവരി ഒമ്പതുമുതൽ പ്രാബല്യത്തിൽ വന്നിട്ടുണ്ട്​. സൗദിയിൽ നിന്ന്​ ഖത്തറിലേക്ക്​ വരുന്നവർ യാത്രയുടെ 72 മണിക്കൂർ മുമ്പ്​ കോവിഡ്​ പരിശോധന നടത്തണം. കോവിഡ്​ ബാധിതനല്ലെന്നുള്ള നെഗറ്റീവ്​ സർട്ടിഫിക്കറ്റ്​ യാത്രക്കാരൻ കൂടെ കരുതണം. എല്ലാവരും ഖത്തറിലെത്തിയാലുടൻ ഒരാഴ്​ചത്തെ ഹോട്ടൽ ക്വാറൻറീനിൽ കഴിയണം. യാത്ര പുറ​െപ്പടുന്നതിന്​ മുമ്പുതന്നെ 'ഡിസ്​കവർ ഖത്തർ' പോർട്ടൽ വഴി ക്വാറൻറീൻ ഹോട്ടൽ ബുക്ക്​ ചെയ്​തിരിക്കണം.

ഇനി ഖത്തറിൽ നിന്ന്​ അബൂസംറ വഴി സൗദിയിലേക്ക്​ പോകാൻ ആഗ്രഹിക്കുന്നവർ തിരിച്ച്​ ഖത്തറിൽ എത്തി ഹോട്ടൽ ക്വാറൻറീനിൽ കഴിയണം. ഇതിനായുള്ള ക്വാറൻറീൻ ഹോട്ടൽ ബുക്കിങ്​ നടത്തിയ രേഖകൾ ഖത്തറിൽ നിന്ന്​ പുറത്തുപോവുന്നതിന്​ മുമ്പ്​ തന്നെ കാണിക്കണം. ഹോട്ടൽ ക്വറൻറീനിൽ കഴിയുമെന്നും കോവിഡ്​ പ്രതിരോധ നടപടികളെല്ലാം പാലിക്കുമെന്നുമുള്ള പ്രതിജ്​ഞാപത്രത്തിൽ രാജ്യത്ത്​ എത്തുന്ന എല്ലാവരും ഒപ്പിട്ടുനൽകണം. ഇഹ്​തിറാസ്​ ആപ്പ്​ ഫോണിൽ ഇൻസ്​റ്റാൾ ചെയ്​തിരിക്കണം. ഈ നടപടികൾ ആഗോളതലത്തിലുള്ള കോവിഡ്​ കാര്യങ്ങൾ വിലയിരുത്തി മാറാവുന്നതാണെന്നും ഗവൺമെൻറ്​ കമ്മയൂണിക്കേഷൻ ഓഫിസ്​ അറിയിച്ചു.