ഖത്തറിനെതിരായ ആരോപണം നീതിക്ക് നിരക്കാത്തത് –ഉർദുഗാൻ

ദോഹ: ഖത്തറിനെതിരെ ഉപരാധ രാജ്യങ്ങൾ ഉന്നയിച്ച  ആരോപണങ്ങൾ അടിസ്​ഥാനരഹിതവും നീതിക്ക്  നിരക്കാത്തതുമാണെന്ന് തുർക്കി പ്രസിഡൻറ്​ റജബ് ത്വയ്യിബ്  ഉർദുഗാൻ. സഹോദരങ്ങൾക്കിടിയിലെ ഭിന്നത ആർക്കും ഗുണം ചെയ്യില്ല. അംഗീകരിക്കാൻ  കഴിയാത്ത നടപടിയാണ് ഖത്തറിന് മേൽ  അയൽ രാജ്യങ്ങൾ അടിച്ചേൽപിച്ചിരിക്കുന്നത്. ജർമനിയിലെ ഹാംബർഗിൽ നടത്തിയ വാർത്താസമ്മേളനത്തിൽ ഉർദുഗാൻ പറഞ്ഞു. 

ഒരു സ്വതന്ത്ര രാജ്യത്തിനും ഇത്തരത്തിലുള്ള അവസ്​ഥ  ഉണ്ടാകരുതെന്ന് അഭിപ്രായപ്പെട്ട ഉർദുഗാൻ ഓരോ രാജ്യത്തി​​െൻറയും  പരമാധികാരം അംഗീകരിക്കാൻ മറ്റ് രാജ്യങ്ങൾ ബാധ്യസ്​ഥരാണെന്നും  വ്യക്​തമാക്കി. സഹോദര രാജ്യങ്ങൾക്കിടയിൽ യുദ്ധം ഉണ്ടാകുന്ന സാഹചര്യം വന്നാൽ ഒരു രാജ്യവും രക്ഷപ്പെടാൻ പോകുന്നില്ലെന്നും  അദ്ദേഹം പറഞ്ഞു. ചർച്ചകളാണ് പ്രശ്ന പരിഹാരത്തിന് അടിസ്​ഥാനമാകേണ്ടത്. അതിന് ഉപരോധ രാജ്യങ്ങൾ സന്നദ്ധമാകണമെന്നും  അദ്ദേഹം ആവശ്യപ്പെട്ടു.