‘കടലാസ്​ രഹിത ദിനം’ ഖത്തര്‍- ക്യാമ്പയിന്‍ ഏപ്രില്‍ രണ്ടിന് തുടങ്ങും

ദോഹ: ഖത്തര്‍ ഗ്രീന്‍ ബില്‍ഡിങ് കൗണ്‍സില്‍ രാജ്യവ്യാപകമായി സംഘടിപ്പിക്കുന്ന അഞ്ചാമത് വാര്‍ഷിക ‘കടലാസ്​ രഹിത ദിനം’ ഖത്തര്‍ ക്യാമ്പയിന്‍ ഏപ്രില്‍ രണ്ടിന് തുടങ്ങും. സമൂഹത്തില്‍ പാരിസ്ഥിതിക സൗഹൃദ പരിശീലനങ്ങള്‍ വളര്‍ത്താനും സുസ്ഥിരതയുടെ പ്രാധാന്യത്തെക്കുറിച്ച് ബോധവല്‍ക്കരണം വര്‍ധിപ്പിക്കാനും ലക്ഷ്യമിട്ടാണ് ക്യു.ജി.ബി.സി ഈ സംരംഭം നടപ്പാക്കുന്നത്.  രാജ്യത്തെ വിദ്യാലയങ്ങളും കമ്പനികളും സ്ഥാപനങ്ങളും പേപ്പറി​​െൻറ  ഉപയോഗം കുറയ്ക്കുന്നതിനും സുസ്ഥിരമായൊരു ഭാവിക്ക് വഴിയൊരുക്കുന്നതിനും വേണ്ടിയാണ്  ‘കടലാസ്​ രഹിത ദിനം’ എന്ന ആശയം ക്യുജിബിസി സ്ഥാപിച്ചത്. പുനരുപയോഗയോഗ്യമായ മാലിന്യങ്ങള്‍ രാജ്യവ്യാപകമായി കുറയ്ക്കുക എന്ന ഉദ്ദേശ്യത്തോടെയാണ് ഇത് ആരംഭിച്ചത്.

രാജ്യം പുറംതള്ളുന്ന മാലിന്യങ്ങളുടെ അളവ് കുറയ്ക്കുന്നതിനുവേണ്ടിയുള്ള ശ്രമങ്ങളുടെ വിജയാഘോഷമായും ഈ ക്യാമ്പയിന്‍ കണക്കാക്കപ്പെടുന്നു.  ഈ വര്‍ഷം, ന്യൂസ് പേപ്പറുകള്‍, മാഗസിനുകള്‍, മറ്റു പേപ്പറുകള്‍, കാര്‍ഡ് ബോര്‍ഡ്, പ്ലാസ്റ്റിക് കുപ്പികള്‍, കപ്പുകള്‍, ജഗ്ഗുകള്‍, അലൂമിനിയം-സ്റ്റീല്‍ ക്യാനുകള്‍ എന്നീ പുനരുപയോഗയോഗ്യമായ മാലിന്യങ്ങളാണ് ഇതി​​െൻറ ഭാഗമായി ശേഖരിക്കുന്നത്. മോശമാവാത്ത പഴയ വസ്ത്രങ്ങളും കളിപ്പാട്ടങ്ങളും ശേഖരിച്ച് ദാരിദ്ര്യമായ ചുറ്റുപാടില്‍ ജീവിക്കുന്നവര്‍ക്കെത്തിക്കുന്നതിനായി ഖത്തര്‍ ചാരിറ്റിയെ ഏല്‍പിക്കാനും ക്യുജിബിസി ശ്രമിക്കുന്നുണ്ട്. ഇതുവഴി മാലിന്യങ്ങള്‍ കുറയ്ക്കാന്‍ സാധിക്കുന്നതോടൊപ്പം ഒരു സമൂഹത്തെ സഹായിക്കാനും സാധിക്കും.  സംരംഭത്തി​​െൻറ  ഭാഗമായി കമ്പനികള്‍ ശേഖരിക്കുന്ന പുനരുപയോഗപ്രദമായ മാലിന്യങ്ങള്‍ ഏപ്രില്‍ രണ്ടുമുതല്‍ നാലുവരെ ക്യു.ജി.ബി.സി വില്ലയില്‍ എത്തിക്കേണ്ടതാണെന്ന്​ അധികൃതർ അറിയിച്ചു. രാജ്യത്തെ ജനങ്ങളെ കൂടുതല്‍ പാരിസ്ഥിതിക ബോധമുള്ളവരാക്കുകയാണ് ‘കടലാസ്​ രഹിത ദിനം ഖത്തര്‍ ക്യാമ്പയിന്‍ ചെയ്യുന്നത്. 

മനുഷ്യ പ്രവൃത്തികള്‍ പരിസ്ഥിതിയിലുണ്ടാക്കുന്ന പ്രതിഫലനം മനസ്സിലാക്കാന്‍ അവരെ സഹായിക്കുകയാണ് ഈ വര്‍ഷത്തെ ക്യാമ്പയിനി​​െൻറ ഉദ്ദേശ്യമെന്ന് ക്യു.ജി.ബി.സിയുടെ ഡറക്ടര്‍ മെഷാല്‍ അല്‍ ഷമാരി പറഞ്ഞു.  ഖത്തര്‍ ചാരിറ്റി, ഗ്ലോബല്‍ മെറ്റല്‍സ്, അല്‍ സുവൈദി പേപ്പര്‍ ഫാക്ടറി എന്നിവയുടെ സഹകരണത്തോടെയാണ് ക്യു.ജി.ബി.സി ഈ വര്‍ഷത്തെ ‘കടലാസ്​ രഹിത ദിനം ഖത്തര്‍ ക്യാമ്പയിന്‍ സംഘടിപ്പിക്കുന്നത്.